Moota Biibiliya onaakhula awe

 Aayo, ohaana. Okhala wira Muluku oniphavela wira atthu ootheene athukumaneke wiira amukokhoreleke. Nave Biibiliya onihimya wira: “Nto, nuupuwelaneke mukina ni mukhwaawe, wira nilipiheryaneke wooniherya ophenta ni miteko sooreera, nihihiyaka othukumana”.— aHeeberi 10:24, 25, enoota.

 Yesu aahaaleela arumeyi awe wira yaarowa okhala oowiiraana. Owo aahimmye wira: “Atthu otheene anoosuwela wira mwa awiixutti aka, mwaaphentanaka mukina ni mukhwaawe”. (Yohani 13:35) Enamuna emosa yuulupale ya wooniherya niphento nno, awo yaahaana othukumanaka ni arumeyi akina. Nto awo yaahaana othukumanaka mmulokoni wiira amukokhoreleke Muluku. (1 aKorinto 16:19) Vano, ootheene aya yaarowa okhala anna a olumwenku wootheene.— 1 Pedru 2:17.

Niireke vanniphiyerya paahi mutthu okhalana etiini?

 Biibiliya onnooniherya wira atthu ahaana othukumanaka wira amukokhoreleke Muluku. Masi khonooniherya wira mutthu onnimuhakalaliha Muluku mwaha woowi ookhalana etiini paahi. Nto wira mutthu omuhakalaliheke Muluku, ohaana ovarihelaka muteko khula nihiku itthu oniixutta awe mookumini mwawe. Mwa ntakiheryo, Biibiliya onihimya wira: “Etiini yooloka ni yoohinanarihiwa vamaithoni va Muluku, Tiithi ihu, tiila: okhapelela ikwaasuni ni waakhapelela athiyana anaamukhweli moohaawani mwaya; nave okhootta onanarihiwa ni olumwenku ola”.— Yakobo 1:27, enoota.