Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Okumi ni Orummwa Ekaderno Enirumeeliwa Omuthukumanoni  |  Outubro 2017

 MAKHALELO A MAKRISTAU

Ninrowa Owerya Sai Okhalela Nthiti Omusoma Biibiliya?

Ninrowa Owerya Sai Okhalela Nthiti Omusoma Biibiliya?

Niireke nyuwo munniphavela okhala oororomeleya okathi wa mixankiho ntoko Daniyeli? Daniyeli aanitokosa Nuulumo na Muluku, ohela muhina iprofesia soovila. (Da 9:2) Omutokosa oratteene Biibiliya onoowerya wookhaliheryani okhala oororomeleya. Moota xeeni? Eyo enoolipiha waamini wanyu wira sooleiherya sa Yehova sinimwiiraneya tthiri. (Yox 23:14) Eyo enimookhaliheryani-tho wuncererya omphenta wanyu Muluku, nave enimookhaliheryani opaka itthu sooloka. (Esa 97:10) Nto munrowa opacerya sai? Muthokorerye malakiheryo ala anittharelana.

  • Etthu xeeni enireerela aka osoma? Enamuna emosa ya osoma moohihiyererya ti olokiherya mithukumano sa mmulokoni. Omusoma Biibiliya wa khula esumana onimoophwanyihani mireerelo sinceene vakhala wira munnitokosa iponto sihiniiwexexa anyu. Ohiya-vo, anamunceene onnaasivela wiiwexexa iprofesia sa mBiibiliyani, inamuna soovirikana sa muhokorokho wa munepa wa Muluku, mikwaha sa olaleerya sa murummwa Paulo, wala itthu sipattuxiwe ni Yehova. Vakhala wira munniphwanya nikoho nnaakhuliwa mBiibiliyani, mulepeke wira mwarumeele okathi onipaka anyu yoosoma anyu.

  • Kinrowa ophwanya vai soohimmwa iyo? Nwehe malakiheryo ari eviidiyu eni: Ikaruma Sahu sa Otokosa Wira Niphwanye Mihakhu sa Omunepani. Wira moone mwaasuwelaka, mweererye otokosa sa mamwene a olumwenku wotheene anilikanyihiwa ni inama sowoopiha ekapiitulu 7 ya eliivuru ya Daniyeli.

  • Okathi mikavi kinireerela aka oviriha kisomaka? Okhalana eprograma ya omusoma Biibiliya etthu yooloka. Nyuwo pooti opacerya murumeelaka okathi vakhaani, nto vaatthuneyaka muncereryeke. Osoma Nuulumo na Muluku onoolikana ni othola mihakhu soovithiwa; okathi oniphwanya anyu vakhaani, munrowa oomutepaka ophavela! (Mir 2:3-6) Osiveliwa wanyu Nuulumo na Muluku onrowa oomutepaka wunnuwa, nto munrowa okhalelaka nthiti khula nihiku.​—1 Pe 2:2.

SINITAPHULELA EXEENI INAMA SOOWOOPIHA SIRI EKAPIITULU 7 YA ELIIVURU YA DANIYELI?

MAKOHO MAKINA:

Moota xeeni eprofesia ya Daniyeli 7:8 yaakhwanenle aya?

EKWAHA EKINA MUSOMEKE:

Sinitaphulela exeeni inama sowoopiha siri eliivuru ya Wisupulula ekapiitulu 13?