Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Okumi ni Orummwa Ekaderno Enirumeeliwa Omuthukumanoni  |  Março 2016

 MAKHALELO A MAKRISTAU

Niwaakheleke Saana Ale Annixukurya

Niwaakheleke Saana Ale Annixukurya

Nihiku na 23 a Março ninniwehererya wira atthu anivikana imilyau 12 animoorwa onixukurya ni owiriyana muthukumano wa Wuupuwelela okhwa wa Yesu. Tthiri owo onrowa okhala okathi wooreerela waalaleerya atthu awo, vaavo mulipa-oolavula mwaha onrowa awe otthokiherya yoovaha ya Yehova ya yowoopola ni mareeliho anrowa aya okumiherya muhoolo wa apinaatamu! (Yes 11:6-9; 35:5, 6; 65:21-23; Yoh 3:16) Masi, khahiyo mulipa-oolavula mwaha paahi onirowa olaleerya okathi owo wa vameekhaaya. Otheene ahu nnoowerya okhaliherya olaleerya niwaakhelaka moohakalala ale annixukurya. (aRo 15:7) Xontte muttharihele malakiheryo ala.

  • Ohiya waakuvelaka orowa okilaathi nto khiyawehererya eprograma opacerya paahi, mwiilipiherye owaakhela moohakalala ni moovara murima atthu otheene anrowa onixukurya waahela muhina ale ahiiye olaleerya.

  • Nnaamwi nrowaka owaakhela ni waakhapelela amusi ni apatthani yaalattunle ahu, nihaana ovaha ephoole wira niwaakhele-tho atthu akina anirwa mwaha wa ekampaanya ya nlattulo. Mwaalattule ale anampacerya orwa wira akilaathiki ni nyuwo. Munweheke hoothe Biibiliya ni eliivuru ya isipo.

  • Nuumala owiriyana mwaha, mwiivahererye wira mwaakhule makoho anrowa aya opakaka. Vakhala wira khamurina okathi munceene mwaha woowi empa ya Omwene enrowa orumeeliwa ni muloko mukina, mulavulane mutthu owo wira mwiiwanane moota wootthikela omuxukurya voohipisa. Vakhala wira khamurina nummuru nawe wala khamunsuwela ephiro ya owannyawe mutthu owo, nyuwo pooti olavula so: “Kaaniphavela osuwela moonelo anyu voohimya sa eprograma ela. Vanweryaneya otthikela ovaanela nihiku nikina?”