Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Okumi ni Orummwa Ekaderno Enirumeeliwa Omuthukumanoni  |  Março 2016

 MAKHALELO A MAKRISTAU

Yowoopola Ennikumiherya Ohihimuxiwa wa Atthu

Yowoopola Ennikumiherya Ohihimuxiwa wa Atthu

Okathi wa Wuupuwelela okhwa wa Yesu onninivaha eparakha yuulupale ya otthokelela mareeliho anrowa ahu waakhela muhoolo mwaha wa yowoopola. Etthu emosa yuulupale eniwehererya ahu ti ohihimuxiwa wa atthu. Yehova khaaphavela wira atthu akhweeke. Tivonto okhweliwa mutthu amphenta ahu oryaaya etthu yootepexa oriipiha murima ekhanle oomukhumelela mutthu. (1aKor 15:26) Yesu aahiriipiwa murima vanceene okathi aawoona awe awiixutti awe amunlelaka Laazaro. (Yoh 11:33-35) Okhala wira Yesu aanimutakiha Tiithi awe moomalela, nto nnoowerya woona wira Yehova onniriipiwa murima vanoona awe ninlaka mwaha wa okhweliwa ole amphenta ahu. (Yoh 14:7) Yehova onniwehererya mooluttuweliwa okathi onirowa awe waahihimuxa atthu akhwiiye, ni hiyo ninniphavela wira eyo yiiraneye voohipisa.Yobi 14:14, 15.

Okhala wira Yehova tootthokiheya, tthiri ninnikupali wira owo onrowa waahihimuxa atthu mwa enamuna yootthokiheya. (1aKor 14:33, 40) Ohiya orowa onaakhwani, atthu anrowa othukumanaka wira awaakhele ale ahihimuxiwe. Niireke nyuwo munnuupuwelela voohimya sa ohihimuxiwa wa atthu, vanceenexa okathi onikhweliwa anyu mmusi? (2aKor 4:17, 18) Niireke nyuwo munnimuxukhuru Yehova mwaha wa onivaha yowoopola ni orumiha olempwa mBiibiliyani wira atthu akhwiiye anootthikela okhala akumi?aKol 3:15.

  • Mmusi xeeni wala mpatthani oniphavela anyu otthikela onweha ori mukumi?

  • Atthu xeeni aniromoliwa mBiibiliyani aniphavela anyu okumanana ni olavulana?