Oteka etemplo wIsarayeli waavekela ovara muteko moowiilipiha ni musurukhu munceene. Hata vari siiso, aIsarayeli yaanikhaliherya muteko owo ni nthiti. (1 Wa 29:2-9; 2 Wa 6:7, 8) Nuumala otekiwa etemplo, moota aIsarayeli saathokorerya aya empa ele waanooniherya ophenta waya itthu sa omunepani wala nnaari. (2 Ma 22:3-6; 2 Wa 28:24; 29:3) Olelo, maKristau annivaha okathi ni ikuru saya wira ateke, arattele, ni olokiherya Ipa sa Omwene ni sa Asembeleya. Tivonto, ovara muteko ni Yehova mwa enamuna ela eparakha yuulupale ni oniirela mpantta muteko oninvarela ahu Muluku.Esa 127:1; Wis 7:15.

NNOOWERYA OKHALIHERYA MWA INAMUNA IYA . . .

  • Orattela nuumala khula muthukumano. Vakhala wira khamuniiweryawerya, pooti orattela opuro waakilaathale anyu.

  • Wiirela mpantta orattela khula esumana ni olokiherya Empa ya Omwene. Maana yakhala atthu anceene anivara muteko onnihakalaliha ni okhweiherya muteko owo.—lv 92-93 etti. 18.

  • Nivahaka musurukhu ahu. Hata okhalaka wa ‘inota pili’ paahi, masi nivahaka ni murima wotheene onoomuhakalaliha Yehova.—Mar 12:41-44.

  • Niivahereryaka wira nikhaliherye oteka ni olokiherya Ipa sa Omwene moovarihana ni ele eniwerya ahu. Hata mutthu ohisuwelaka muteko woteka onoowerya okhaliherya.