Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Tani Anipaka Yootthuna ya Yehova Olelo-va?

 YOOSOMA 14

Ixikola Xeeni Sipakeliwe Mapioneero?

Ixikola Xeeni Sipakeliwe Mapioneero?

Estados Unidos

Exikola ya oGileadi, oPatterson, NovaYork

Panama

Okhuma khalai exikola ya orummwa wa Muluku ennooniherya okhala ethoonyeryo yuulupale ya Anamoona a Yehova. Soopakiwa ixikola wira saakhaliheryeke anna yaale aniviriha okathi munceene avaraka muteko woolaleerya Omwene wira ‘anvareleke Muluku muteko womalela’.2 Timótheyo 4:5.

Exikola ya Muteko wa Opioneero. Nuumaliha eyaakha emosa orumeelaka ntoko pioneero ookilaatheya, munna aahiiso murokora onnilattuliwa orowela exikola enimaliha mahiku 6, yeeyo enipakiwa Empa ya Omwene waattamela opuro onikhala awe. Exikola eyo epakiwe wira emukhaliherye pioneero owo omwaattamela Yehova, okhumela saana mmuteko awe woolaleerya, ni ovikaniha ovara muteko woolaleerya moororomeleya.

Exikola ya Anamalaleerya a Omwene. Oopakiwa murehereryo ola wa oviriha myeeri miili akhaliheriwaka mapioneero yaawo aniphavela ohiya opuro onikhala aya wira yarumeeleke mittetthe sinipaveleya anamalaleerya. Anna ni arokora ala, annimutakiha Namalaleerya muulupale aatonko okhala valaponi, Yesu Kristu, vaavo vanihimya aya wira: “Miyo kiri va: kirumekeni”. (Yesaya 6:8; Yohani 7:29) Mutthu okhuma vate vawe pooti otthuneyaka wiilokiherya wira akhaleke moovarihana ni makhalelo a opuro onrowa awe. Makhalelo awo pooti ohela muhina oriirya ni oviha wa opuro owo, aahiiso yoolya pooti okhala yoovirikana ni ele elimalenle awe. Nave pooti otthuneyaka wiixutta nttaava nikina. Exikola ela enniwiixuttiha anna ni arokora, ni anamathelana yaawo arina iyaakha 23 mpakha 65, yaakhaliheryaka okhalana mikhalelo somunepani seiyo sinrowa owiiriha ovara saana miritti sinivahiwa aya, ni ankhili anrowa waakhaliherya orumeeliwa saana ni Yehova ni otthokeya wawe.

Exikola Enimwiixuttiha Biibiliya ya oGileadi. Nuulumo na eHeeberi noowi “oGileadi” nintaphulela “Waatta wa Onamoona”. Nto okhuma mwaakha wa 1943 vaavo vapacenrye aya exikola ela, aagraduariwa mamisionaario anivikana 8.000, khuroihiwa “mpakha wokiseryani w’elapo” wira yalaleeryeke. (Miteko 13:47) Vaavo mamisionaario oopacerya ograduariwa vaaphiyale aya oPeru, khisaakhanle miloko. Nto vano sookhala miloko sinivikana 1.000. Nave okathi mamisionaario yaapacenrye aya olaleerya oJapão, Anamoona khiyaaphiya 10 mwaattelo aya. Masi vano aavikana 200.000. Myeeri mithanu sa kursu a oGileadi sinihela muhina osoma ni ovarerya saana Nuulumo na Muluku. Anna anirumeela ntoko mapioneero a vameekhaaya, mamisionaario, maBethelita, ni axitokweene a esirkwitu, annilattuliwa orowa wiixuttihiwa exikola ela wira akhaliheryeke ni olipiha muteko onivariwa olumwenku wotheene.

  • Epakeliweni Exikola ya Muteko wa oPioneero?

  • Anna xeeni anilattuliwa Exikola ya Anamalaleerya a Omwene?