Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Biibiliya Onniixuttiha Exeeni?

 MURU 12

Vanniweryaneya Okhala Mpatthani a Muluku?

Vanniweryaneya Okhala Mpatthani a Muluku?

1, 2. Tani yaari apatthani a Yehova?

TI PANI onimuthanla anyu okhala mpatthani anyu? Niireke munimuthanla khuta mutthu? Niireke munipacerya omusuwela toko muhinatthi opatthana? Aahiiso munimuthanla mutthu yoole orina mikhalelo sinoosivelani?

2 Masi Yehova Muluku onnaathanla atthu onipatthana awe. Mwa ntakiheryo, Abrahamu aari mpatthani a Yehova. (Yesaya 41:8; Yakobo 2:23) Nave Davidi aari-tho mpatthani a Yehova. Yehova aahimuhimya Davidi okhala “mulopwana onettela murim’aka”. (Miteko 13:22) Nave-tho profeta Daniyeli aahihimmwa okhala ole ‘Muluku amphenta awe wavikana atthu akina’.Daniyeli 9:23.

3. Nthowa xeeni Abrahamu, Davidi, ni Daniyeli yaakhanle aya apatthani a Yehova?

3 Abrahamu, Davidi, ni Daniyeli yaawenrye sai okhala apatthani a Yehova? Yehova aahimuhimya Abrahamu wira: Nyuwo “muhìwelela molumo aka”. (Maphattuwelo 22:18) Yehova onnikhala mpatthani wa atthu yaale mowiiyeviha animwiiwelela. Nave nloko na aIsarayeli naahikhala mpatthani awe. Yehova aahitthokiherya nloko na aIsarayeli wira: “Mwiwe masu aka: mwirá siso, miyo kinokhala Muluku anyu, nyuwo munokhala nloko naka”. (Yeremiya 7:23) Tivonto, nyuwo-tho muhaana omwiiwelela Yehova akhala wira muniphavela tthiri okhala mpatthani awe.

YEHOVA ONNIWAAKIHERYA APATTHANI AWE

4, 5. Yehova oniwaakiherya sai apatthani awe?

4 Biibiliya onihimya wira Yehova onniweha ‘ilapo sothene wira akhaliherye ale animuroromela ni murim’aya wothene’. (2 Wahala 16:9) Esalimo 32:8, Yehova onnaaleiherya  apatthani awe wira: “Miyo kinimovahani miruku, kinimothonyeryani ephiro yorera, kinowixuttihani, kinimokhapelelani”.

5 Nwanani mmosa oowerya oniphavela onihiiha okhala mpatthani a Muluku. Masi Yehova onninaakiherya. (Musome Esalimo 55:23.) Nimmurumeela ni murima ahu wotheene okhala wira na apatthani awe. Hiyo ninniroromeleya hata okathi onihaawa ahu vanceene. Nave ninnikupali ntoko saakupali awe nasaalimo. Olavulaka sa Yehova nasaalimo owo aahimmye so: ‘Onnikivarela mono, nkinova etthu’. (Esalimo 16:8; 63:8) Satana oneererya sai onikhoottiherya okhala apatthani a Muluku?

OVAANYIHA WA SATANA

6. Satana aawoothenrye sai apinaatamu?

6 Muru 11, nihiixutta wira Satana aahinvaanyiha Yehova omuhimyaka okhala nawoothe ni oohixariya. Satana uupuwela wira Yehova aahaana waahiya Adamu ni Eva apakaka soothanla saya voohitthara malakiheryo awe. Eliivuru ya Yobi enniixuttiha wira Satana aahiwootherya apinaatamu aniphavela okhala apatthani a Muluku. Satana aahimmye wira atthu animurumeela Muluku mwaha wa ophavela etthu, ohiya mwaha woophenta. Nave Satana aahihimya wira anwerya omuhiiha khuta mutthu omurumeela Muluku. Nrowe niwehe ele eniixutta ahu wa Yobi ni moota Yehova aamukhalihenrye awe.

7, 8. Yehova aamoonela sai Yobi? (b) Satana aahimmye exeeni voohimya sa Yobi?

7 Ti pani aari Yobi? Owo aari mutthu ooreera murima aakhanle iyaakha 3.600 sivinre. Yehova aahimmye wira okathi ole khuuvo mutthu aalikana nuuwo valaponi. Maana Yobi aanimoova Muluku, ni aaninyokha itthu sootakhala. (Yobi 1:8) Tthiri, Yobi aari mpatthani a Yehova.

8 Satana aahimmye wira Yobi khaamurumeela Muluku  mahala ene. Maana aahimuhimeerya Yehova wira: “Nyuwo munnimwakiherya sotakhala sothene vamosá n’itthoko awe ni mihakhu sawe sothene. Nyuwo moreriha miteko sawe sothene: muhinjereriha muhuwo awe mpakha okhunela elapo. Masi mmwehererye yowo: mpwetexe mihakhu sawe sothene. Munimona wira owo onrowa wovehani”.Yobi 1:10, 11.

9. Exeeni Yehova aamweemerenrya awe Satana opaka?

9 Satana aahimmye wira Yobi aamurumeela Yehova mwaha woophavela waakhela etthu paahi. Nave-tho Satana oothale wira anwerya omwiiriha Yobi omuhiya omurumeela Yehova. Nnaamwi Yehova aheemerenrye wootha wa Satana, aahimuhiya wira omweehererye Yobi wira owehe akhala wira aari mpatthani a Yehova mwaha woophenta tthiri.

SATANA ONIMWEEHERERYA YOBI

10. Satana aamuhaaxale sai Yobi nto Yobi aapanke exeeni?

10 Wanipacerya, Satana aahiiva inama sotheene sa Yobi. Moottharelana aahiwiiva arumeyi anceene a Yobi. Tthiri Yobi aahipweteiwa sotheene. Wanikisa waya, Satana aahimurumeela munamukhaya khowiiva anamwane 10 a Yobi. Masi Yobi aahivikaniha ororomeleya wa Yehova. “Ahaweru siso, Yobi khatthenke: khanvehale Muluku”.Yobi 1:12-19, 22.

Yehova aahimureeliha Yobi mwaha wa okhala mpatthani oororomeleya

11. (a) Etthu xeeni ekina Satana aamwiirinha awe Yobi? (b) Yobi aapanke exeeni?

11 Nto Satana khooceyale. Masi aahivikaniha omunyoonyiha Muluku oriki: “Mmuhaxeke mmakhuvani mwawe ni mwerutthuni mwawe. Munimona wira onimovehani”. Tivonto, Satana aahimphwanyiha Yobi eretta yoohiirya, ni yoowereya. (Yobi 2:5, 7) Nave ekwaha ela, Yobi aahiroromeleya wa Yehova. Yobi aahimmye so: “Kinolaleya ohittheka waka mpakha okhwa”.Yobi 27:5.

12. Yobi oonihenrye sai wira Satana nawoothe?

 12 Yobi khaasuwela wira mixankiho iye saakumiheriwa ni Satana. Owo uupuwela wira Yehova aakumiherya mixankiho iye. (Yobi 6:4; 16:11-14) Hata vari siiso, Yobi aahivikaniha ororomeleya wa Yehova. Vano khivaakhanle-tho waaniherya, okhala wira Yobi aahimoothiha Satana. Owo aari mpatthani a Muluku mwaha wa omphenta. Satana ammootherya paahi!

13. Ororomeleya wa Yobi woonihenrye exeeni?

13 Vano nnaamwi Yobi ahaasuwenle ele yiiraneyale wiirimu, owo aahivikaniha ororomeleya wa Muluku ooniheryaka wira Satana aamootha. Nto Yehova aahimureeliha Yobi mwaha woohihonona ompatthani awe ni Muluku.Yobi 42:12-17.

MOOTA SATANA ONIWOOTHERYAWENI

14, 15. Satana oniwootherya exeeni apinaatamu otheene?

14 Nyuwo munoowerya wiixutta etthu ni yowiiraneya ya Yobi. Maana olelo-va, Satana oniwootheryani wira munimurumeela Yehova mwaha woophavela mireerelo paahi. Yobi 2:4, Satana onihimya oriki: “Atthu annivaha sothene sirinaya wira esuke ekumi aya”. Tivonto Satana onniwootherya atthu otheene, alopwana ni athiyana, wira ananrima ntoko aamoothenrye awe Yobi. Iyaakha emiya nuumala Yobi okhwa, nlelo Satana aaninveeha Yehova owootheryaka arumeyi awe. Mwa ntakiheryo, Miruku 27:11, onihimya so: “Mwan’aka, nwetteleke ankhili: siso miyo kinotteliwa murima, kinowerya omwakhula onkiveha [aahiiso onkinyohola]”.

15 Nyuwo-tho munoowerya omwiiwelela Yehova ni olipiha ompatthani anyu nuuwo, mooniheryaka wira Satana nawoothe. Hata vatthuneyaka opaka marukunuxo maalupale mookumini mwanyu wira mukhale mpatthani a  Muluku, eyo yoothanla yootepa oreera enrowa anyu opaka! Tthiri yoothanla eyo ti yootthuneya. Satana onihimya wira nyuwo khamunrowa ovikaniha okhala oororomeleya wa Muluku sookhumelelani mixankiho. Okathi wotheene oniphavela wira nihiye ororomeleya wa Muluku. Moota xeeni?

16. (a) Inamuna xeeni sa olavilavi Satana onirumeela awe wira aahiihe atthu omurumeela Yehova? (b) Exeeni Diabo oneererya awe opaka wira oohiiheni omurumeela Yehova?

16 Satana onirumeela inamuna sinceene ophavelaka onihiiha okhala mpatthani a Muluku. Nto Satana onnituphela “ntoko kharamu onòpa murukulu, aphavelaka òmukhura”. (1 Pedru 5:8) Vano muhitikhineke vaavo apatthani, amusi, aahiiso atthu akina aniphavela aya woohiihani omwiixutta Biibiliya wala opaka itthu sooloka. Nyuwo pooti woonaka ntoko munootupheliwa. * (Yohani 15:19, 20) Nave Satana onniipaka “okhala nlaikha nowarya”. Tivonto, owo pooti weererya oniiriha ohimwiiwelela Yehova. (2 aKorinto 11:14) Enamuna ekina Satana enirumeela awe wira onihiihe omurumeela Yehova, ti oniiriha wuupuwela wira khanrina efaita wira nimurumeeleke Muluku.Miruku 24:10.

MWIIWELELEKE SOORUMA SA YEHOVA

17. Exeeni enniiriha omwiiwelela Yehova?

17 Vaavo vanimwiiwelela ahu Yehova, hiyo nnooniherya wira Satana nawoothe. Exeeni enrowa onikhaliherya okhala oowiiwelela? Biibiliya onihimya so: “Mwaphenteke Apwiya Muluku anyu ni murim’anyu wothene ni eroho  anyu yothene n’ikuru sanyu sothene”. (Otumererya 6:5) Hiyo ninnimwiiwelela Yehova mwaha woomphenta. Vaavo omphenta wahu Yehova vaninnuwa aya, ninnipaka khuta etthu enniruma awe. Murummwa Yohani aalempe wira: “Vano, nnimphenta sai Muluku? Nnimphenta nettelaka soruma sawe. Vano, soruma sa Muluku khasinnirikela wettela”.1 Yohani 5:3.

18, 19. (a) Itthu xeeni Yehova onihimya awe okhala soohiloka? (b) Ninsuwela sai wira Yehova khonnivekela etthu ehiniwerya ahu?

18 Sookhala itthu Yehova oninyokha awe. Itthu xeeni? Nwehe ekaaxa eni: “ Munyokheke Ele Yehova Oninyokha Awe”. Naahithokorerye saana itthu iyo pooti woonaka wira khasitempe otthekeya. Masi vaavo vanimusoma anyu Biibiliya ni ephoole, munrowa woona otthuneya waya wiiwelela malamulo a Yehova. Nave, munimoona wira muhaana opaka marukunuxo mookumini mwanyu. Hata vavilaka opaka marukunuxo awo, masi akhala wira munoopaka, munrowa ophwanya murettele onikhumelela mwaha wookhala  mpatthani oororomeleya a Muluku. (Yesaya 48:17, 18) Ninsuwela sai wira vanniweryaneya opaka marukunuxo awo?

19 Vanniweryaneya okhala wira Yehova khonnivekela etthu ehiniwerya ahu opaka. (Otumererya 30:11-14) Mwaha wookhala Mpatthani eekeekhai, owo onninsuwela saana onivikana hiyo. Onnisuwela ele eniwerya ahu ni ehiniwerya ahu. (Esalimo 103:14) Murummwa Paulo onnilipiherya oriki: “Muluku t’òroromeleya: khanihiya wira mwehereriwe ovikana ikuru sanyu. Okathi onehereriwanyu, Muluku onimovahani ikuru sinweryananyu ovilela n’uxintta”. (1 aKorinto 10:13) Tthiri nikupaliki wira okathi wotheene Yehova onoonivaha ikuru wira niwerye opaka itthu sooloka. Owo onoonivaha ‘owerya wulupalexa’ wira nivilele mixankiho. (2 aKorinto 4:7) Nuumala murummwa Paulo okhaliheriwa ni Yehova, owo ohimmye so: “Kinniwerya sothesene mwa yowo onkilipiha”.aFilipi 4:13, BE.

 MWIIXUTTE OSIVELIWA ELE MULUKU ENIMUSIVELA

20. Mikhalelo xeeni sinireerela anyu otakiha, ni nthowa xeeni?

20 Akhala wira nimphavela okhala mpatthani a Yehova, sookhala itthu sikina sinireerela ahu opaka ohiya paahi okhootta ele ehinimusivela Yehova. (aRoma 12:9) Maana apatthani awe aniphenta ele Muluku eniphenta awe. Nto atthu awo annooniherya mikhalelo silempwale eliivuru ya Esalimo 15:1-5. (Musome.) Apatthani a Yehova annitakiha ni wooniherya mikhalelo iya: “ophenta, otteliwa, murettele, ovilela, othunku, orera murima, ororomeleya, wiyeviha, wisumaliha”.aGalasia 5:22, 23.

21. Munrowa owerya sai wiixutta ni wooniherya mikhalelo sinimusivela Muluku?

21 Munrowa owerya sai wiixutta ni wooniherya mikhalelo iyo sooreera? Muhaana wiixutta ele Yehova eniphenta awe mmusomaka Biibiliya khuta nihiku. (Yesaya 30:20, 21) Vaavo vanipaka anyu eyo, omphenta wanyu Yehova onimunnuwa, nto vaavo ophenta onilipa aya munoophavelaka omwiiwelela.

22. Exeeni enrowa wiiraneya mwamwiiwelela Yehova?

22 Marukunuxo anitthuneya anyu opaka mookumini mwanyu pooti olikanyihiwa ni orula ikuwo sa khalai ni owara sa niinano. Biibiliya onihimya wira muhaana ‘orula omutthu wa khalaiʼ ni owara “omutthu wa nanano”. (aKolosi 3:9, 10) Hata vari siiso, opaka eyo pooti ohikhweya, masi vaavo vanipaka ahu marukunuxo awo ni omwiiwelela Yehova, owo oolakela wira ‘nnoreriwa’ vanceene. (Esalimo 19:12) Tivonto, muthanle omwiiwelela Yehova ni wooniherya wira Satana nawoothe. Mmurumeeleke Yehova ohiya mwaha woophavela otthuveliwa masi mwaha woowi munnimphenta. Mwiira siiso, munrowa okhala mpatthani awe eekeekhai!

^ etti. 16 Ela khentaphulela wira Satana oniweettiha atthu yaale aniphavela onihiiha omusoma Biibiliya. Masi Satana ti “muluku a vathí-va” ni “atthu othene anniweriwa ni mutakhali”. Tivonto, nihitikhineke vaavo atthu akina aneererya aya onihiiha omurumeela Yehova.2 aKorinto 4:4; 1 Yohani 5:19.