Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Biibiliya Onniixuttiha Exeeni?

Inoota

Inoota

1 YEHOVA

Nsina na Muluku ti Yehova, nsina nno nintaphulela wira “Owo Onniiriha Okhala”. Tthiri Yehova Muluku toowerya sotheene, ni topattunxe khuta etthu. Nave ookhalana owerya woopaka khula etthu enitthuna awe.

Nttaava na eHeeberi, nsina na Muluku ninlempwa ni ileetera xexe. Nttaava na Enkelexi, ninrumeela ileetera iya YHWH aahiiso JHVH. Nsina na Muluku ninniphwanyaneya soolepa soopacerya sa Biibiliya a nttaava na eHeeberi, waattamela 7.000. Atthu a olumwenku wotheene annilepa nsina noowi Yehova mwa inamuna sinceene, nto khiyaaromola moovarihana ni nttaava naya.

Muru 1, etti. 15

2 BIIBILIYA ‘ÙPUXERIWE NI MULUKU’

Biibiliya ta Muluku, masi aarumme apinaatamu wira amulepe. Ela enlikana ni tiithi onimuruma mwanawe olepa ekarta. Muluku aarumenle munepa awe wootteela wira aalakiherye alipa-oomulepa Biibiliya olepa muupuwelo awe.Nto munepa wa Muluku waahaakhaliherya mwa inamuna sinceene, okathi mukina waaniwuupuxerya aahiiso owooniherya moolohani itthu soolepa.

Muru 2, etti. 5

3 MALAKIHERYO

Sowiixuttiha sa Biibiliya sinitthokiherya ekeekhai. Mwa ntakiheryo, malakiheryo oowi “wetta n’alavilavi, opwetexa makhalelo òrera”, anniixuttiha wira hiyo pooti olipiha aahiiso ohonona makhalelo ahu mwaha wa atthu anipatthana ahu. (1 aKorinto 15:33) Nave-tho malakiheryo oowi “[ele] mutthu enàlawe, yeyo t’inhephawe”, anniixuttiha wira khaninwerya osyaka sookhumelela sa miteko sahu.aGalasia 6:7.

Muru 2, etti. 12

  4 EPROFESIA

Muhupi onikhuma wa Muluku. Pooti okhala muhupi onitthokiherya yootthuna ya Muluku, mwiixuttiho, yooruma, aahiiso ophukela. Nave muhupi owo pooti okhala etthu enrowa wiiraneya muhoolo. MBiibiliyani sookhala iprofesia sinceene siiranen’ye.

Muru 2, etti. 13

5 IPROFESIA VOOHIMYA SA MESIYA

Iprofesia sinceene sa Biibiliya voohimya sa Mesiya, sihiiraneya ni Yesu. Nwehe ekaaxa eni: “ Iprofesia Voohimya sa Mesiya”.

Muru 2, etti. 17, enoota

6 YOOLAKELA YA YEHOVA NI ELAPO ELA

Yehova aapattunxe elapo ela wira ekhale eparayiisu, wira akhaleke apinaatamu animphenta. Nto yoolakela eyo kheturuken’ye. Moohipisa, Muluku onoomaliha otakhala ni waavaha arumeyi awe okumi woohimala.

Muru 3, etti. 1

7 SATANA DIABO

Satana nsina nivahiwe nlaikha nimmwarenle Muluku. Nlaikha nno nniihaniwa Satana, nuulumo nintaphulela “Nwanani”, okhala wira ninninvaanyiha Yehova. Nave nniihaniwa Diabo, nuulumo nintaphulela “Nawoothe”. Nto oovahiwa nsina nna mwaha woowi onimootherya Muluku ni waawoka apinaatamu.

Muru 3, etti. 4

  8 MALAIKHA

Yehova aahipattuxa malaikha ohinatthi opaka elapo. Malaikha yaapakiwe wira akhaleke wiirimu. Aakhala malaikha imiya ikonto sinceene. (Daniyeli 7:10) Aakhalana masina ni mikhalelo soovirikana, nto malaikha oowiiyeviha annikhootta okokhoreliwa ni atthu. Nave aakhalana soothanleliwa ni miritti soovirikana. Egrupu emosa ya malaikha anirumeela veehiceni ya Yehova, ahimyaka mihupi sinirummwa aya, awaakiheryaka ni waalakiherya arumeyi a Muluku ari valaponi, arumeelaka ntoko alipa-oophuka, ni okhaliherya muteko woolaleerya. (Esalimo 34:8; Wisupulula 14:6; 22:8, 9) Muhoolo, anrowa omukhaliherya Yesu ekhotto ya Harmagedoni.—Wisupulula 16:14, 16; 19:14, 15.

Muru 3, etti. 5; Muru 10, etti. 1

9 ETAMPI

Khuta etthu enoona ahu, wuupuwela, aahiiso opaka ehinivarihana ni otthuna aahiiso yoolakela ya Yehova, etampi. Okhala wira etampi ennihonona wataana wahu ni Muluku, nto owo oonivaha malamulo ni malakiheryo wira anikhaliheryeke osyaka etampi. Wanipacerya, itthu sotheene saapattuxiwe ni Yehova saari sooloka, masi vaavo Adamu ni Eva yaathanlale aya ohimwiiwelela Yehova, awo yaahittheka ni khukhala oohimalela. Nto yaahuuluvala ni okhwa; okhala wira nikhumme wa Adamu, hiyo ninnuuluvala ni okhwa.

Muru 3, etti. 7; Muru 5, etti. 3

10 HARMAGEDONI

Ekhotto ya Muluku enrowa opwetexa olumwenku wa Satana ni atakhali otheene.

Muru 3, etti. 13; Muru 8, etti. 18

 11 OMWENE WA MULUKU

Omwene wa Muluku, eguvernu ya Yehova eri wiirimu. Yesu Kristu tori Mwene. Muhoolo, Yehova onrowa orumeela Omwene owo wira omalihe otakhala wotheene. Omwene wa Muluku onrowa olamulelaka elapo ya vathi.

Muru 3, etti. 14

12 YESU KRISTU

Muluku aahimpattuxa Yesu ohinatthi opaka itthu sikina. Yehova aahimuruma Yesu orwa valaponi wira aakhwele apinaatamu. Nuumala Yesu wiiviwa, Yehova aahimuhihimuxa. Vano Yesu onilamulela wiirimu ntoko Mwene a Omwene wa Muluku.

Muru 4, etti. 2

13 EPROFESIA YA ISUMANA 70

Biibiliya aahihimya vahinatthi okathi aarowa awe orwa Mesiya. Eyo yaarowa wiiraneya wanikisa wa isumana 69, waapacenrye mwaakha wa 455 AEC onamala mwaakha wa 29 EC.

Ninsuwela sai wira okathi owo waamanle mwaakha 29 EC? Isumana 69 sipacenrye mwaakha wa 455 AEC vaavo Nehemiya aatthikenle awe oYerusalemu nto khupacerya otekiwa-tho epooma ya oYerusalemu. (Daniyeli 9:25; Nehemiya 2:1, 5-8) Nuulumo noowi “duzia” ninnuupuxerya nummuru 12, nto nuulumo noowi “esumana” ninnuupuxerya nummuru 7. Isumana sa eprofesia ela khahiyo isumana sirina mahiku 7, masi isumana sa iyaakha, ntoko sinooniherya awe Biibiliya, oriki: “nihiku nimosa kinnilikanyiha n’iyakha emosá”. (Mothakoni 14:34; Ezekiyeli 4:6) Ela enitaphulela wira esumana emosa erina mwaattelo wa iyaakha 7, tivonto iyaakha 483 sinithoonyerya isumana 69, niire so, (69 x 7). Nto naalikela iyaakha 483 okhuma mwaakha wa 455 AEC, nimphwanya mwaakha wa 29 EC. Mwaakha yoola Yesu aabatiziwa awe ni khukhala Mesiya!Luka 3:1, 2, 21, 22.

 Eprofesia emosaru yaahihimya esumana ekina, niire so, iyaakha 7 sikina. Okathi owo, Mesiya aarowa wiiviwa mwaakha wa 33 EC, nto wanipacerya wa mwaakha 36 EC, ihapari sooreera sa Omwene wa Muluku saarowa olaleeriwa maloko otheene, ohiya wa aYuda paahi.Daniyeli 9:24-27.

Muru 4, etti. 7

 YOWIIXUTTIHA YOOHILOKA YA AMULUKU ARARU

Biibiliya oniixuttiha wira Yehova Muluku tori Mpattuxa. Nave tompattunxe Yesu ohinatthi opaka itthu sotheene. (aKolosi 1:15, 16) Yesu khahiyo Muluku Oowerya Sotheene. Nave Yesu khonahimye wira onoolikana ni Muluku. Masi owo aahimmye so: “ATithi t’alupale okivikana miyo”. (Yohani 14:28; 1 aKorinto 15:28) Masi itiini sikina sinniixuttiha wira Muluku ori atthu araru masi mmosaru, niire so, Tiithi, Mwaana, ni munepa wootteela. Nuulumo noowi “Amuluku Araru” khanikhanle mBiibiliyani. Nto ola mwiixuttiho wowootha.

Munepa wootteela ikuru soowerya sa Muluku, owerya ohinooneya Yehova onirumeela awe wira opake yootthuna awe. Tthiri khahiyo mutthu. Mwa ntakiheryo, maKristau oopacerya “yahisareya eroho [munepa] yowarya”, nto Yehova aahimmye wira: “Miyo kinimwamwarexela eroho [munepa] aka atthu othene”.—Miteko 2:1-4, 17.

Muru 4, etti. 12; Muru 15, etti. 17

15 MWIIKIMANYO

Okathi maKristau eekeekhai animukokhorela aya Muluku, khanirumeela mwiikimanyo. Nthowa xeeni?

  1. Okhuma khalai mwiikimanyo onnirumeeliwa ni itiini sowootha. Khalai mwiikimanyo waarumeeliwa ni okokhorela itthu seephattu ni soolema sa amalapo sa okokhorela arumeelaka itthu sa okhoveni. Etthu yowiiraka iyaakha 300 nuumala Yesu okhwa, maKristau khiyaarumeela mwiikimanyo okathi wa okokhorela. Masi nuuvira okathi owo, Namalamulela ooRoma iihaniwa Constantino, aahipakiha mwiikimanyo ntoko ethoonyeryo ya eKristau. Nto aahirumeela mwiikimanyo ophavelaka wira eKristau yuulaane. Masi mwiikimanyo khonavarihane ni Yesu Kristu. Eliivuru Nova Enciclopédia Católica enitthokiherya so: “Mwiikimanyo onniphwanyaneya mipantta sotheene, niire so, mwa soolema ehinatthi eKristau ni wa ale yahaakhanle maKristau”.

  2.   Yesu khaakhwiiye vamwiikimanyo. Nuulumo na eKriki noowi “mwiikimanyo” nintaphulela “nripu”, “nivatta”, aahiiso “mwiri”. Nave The Companion Bible onitthokiherya so: “Mwa nttaava na eKriki [Wataana wa Niinano] khinikhanle nuulumo nnooniherya miri miili sowiikimanyiwa”. Yesu aakhwiiye vamwirini.

  3. Yehova khoniphavela wira nirumeeleke ilatarato aahiiso ithoonyeryo okathi onimukokhorela ahu.—Okhuma 20:4, 5; 1 aKorinto 10:14.

Muru 5, etti. 12

16 WUUPUWELELA OKHWA WA YESU

Yesu aahaaruma awiixutti awe wira Yuupuweleleke nihiku na okhwa wawe. Awo yaanuupuwelela khuta mwaakha nihiku na 14 a Nisani, okathi omosaru aIsarayeli yaamuupuwelela aya Paasikha. Ephaawu ni eviinyu, seiyo sinithoonyerya erutthu ni ephome ya Yesu, ennivirihiwa wa atthu otheene arwiiye Wuupuwelela okhwa wa Yesu. Nto ale anrowa olamulelaka ni Yesu wiirimu annikhuura ephaawu ni owurya eviinyu. Masi ale anilipelela okhala moohimala valaponi, annoorwa mwa nttittimiho Wuupuwelela okhwa wa Yesu ntoko alipa-ooweha paahi, masi khankhuura ephaawu nnakhala owurya eviinyu.

Muru 5, etti. 21

17 EROOHO

Biibiliya Tradução do Novo Mundo a Ekunya, nuulumo noowi “erooho” ninnirumeeliwa niphavelaka ohimmwa (1) mutthu, (2) enama, aahiiso (3) khula etthu enimumula. Nwehe matakiheryo vakhaani:

  • Mutthu. Mahiku a Nowe “atthu vakhani, athanu n’araru pahi, yahikela mukalawani-mmo, khòpoliwa mmàsini”. (1 Pedru 3:20) Atthu awo yaari Nowe, ni amwaarawe, anaawe araru, ni axaaraya.

  • Enama. “Muluku ahìra-tho: Mmàsini sàtteke itthu ikumi, nave vatthayani osulusulu evaveke axinuni. Muluku ahìra-tho:  Mulaponi sitotholaneke itthu ikumi sa khula enamuna: inama sa vaté n’iye sinìpurula n’inama sa mutakhwani, khula enama muxovo aya. Siso vahìraneya”.Maphattuwelo 1:20, 24.

  • Khula etthu enimumula. Yehova aahimuhimeerya Moise wira: “Othene ale yaphavela owivani, àkhwasa”. (Okhuma 4:19) Okathi Yesu aaryaawe valaponi, owo aahimmye wira: “Miyo ka makampusi òrera murima. Makampusi òrera murima onnileva ekumi awe mwaha wa ipwittipwitthi sawe”.Yohani 10:11.

    Nave, vaavo mutthu vanipaka awe etthu ʼnʼiroho awe yotheneʼ, enitaphulela wira onipaka mootaphuwa ni orumeelaka owerya wawe wotheene. (Matheyo 22:37; Otumererya 6:5) Nuulumo noowi ʼerohoʼ pooti-tho orumeeliwa ehimmwaka otthuna aahiiso ophavela orina aya khula yoopattuxiwa ekumi. Mutthu okhwiiye aahiiso murutthu pooti ohimmwa okhala erooho yookhwa.Mothakoni 6:6; Miruku 23:2; Yesaya 56:11; Hagayo 2:13.

Muru 6, etti. 5; Muru 15, etti. 17

18 MUNEPA

Nuulumo na eHeeberi ni eKriki noowi “munepa” Biibiliya a Tradução do Novo Mundo pooti otaphulela itthu sinceene. Okhala wene munepa ontaphulela etthu apinaatamu ahinwerya aya woona, ntoko epheyo aahiiso omumula wa atthu wala axinama. Nave-tho pooti otaphulela malaikha ni munepa wootteela, eyo piiyo, ikuru soowerya sa Muluku. Nto Biibiliya khoniixuttiha wira mpantta wa mutthu onnihala orina okumi nuumala okhwa.Okhuma 35:21; Esalimo 104:29; Matheyo 12:43; Luka 11:13.

Muru 6, etti. 5; Muru 15, etti. 17

19 GEHENA

Nuulumo na eKriki noowi Gehena, mBiibiliyani a emakhuwa onirumeela masu oowi “omoroni“, nto nna nsina ninrumeeliwa niphavelaka ohimmwa nlitti naari waattamela  oYerusalemu, opuro yoowo waariheliwa ikokhola wira sipahiwe. Khiivo ethoonyeryo enooniherya wira mahiku a Yesu, axinama wala atthu yaanihaaxiwa aahiiso opahiwa opuro ole nlelo ari akumi. Tivonto Gehena aahiiso omooroni khonitaphulela nipuro nihinooneya nipakeliwe ohaaxiwa wala opahiwa atthu ookhwa. Vaavo Yesu aalavula awe voohimya sa ale aniriheliwa oGehena wala omooroni, aahimya opwetexiwa voohikhalana nlipelelo na ohihimuxiwa.—Matheyo 5:22; 10:28.

Muru 7, etti. 20

20 NIVEKELO NAAPWIYA

Nivekelo nenno Yesu aawiixuttinha awe atthareli awe. Nave-tho, nniihaniwa Tiithi Ihu Muri Wiirimu aahiiso nivekelo na ntakiheryo. Mwa ntakiheryo, Yesu ooniixuttiha ovekela so:

  • “Nsina nanyu nivuwihiwe”

    Ninvekela wira Yehova omalihe onyoholiwa nsina nawe aahiiso wootheriwa wala oveehiwa. Wira atthu otheene wiirimu ni vathi attittimiheke ni ovuwiha nsina na Muluku.

  • ‘Omwene anyu orwe’

    Ninvekela wira eguvernu ya Muluku epwetexe olumwenku ola wa Satana, ni wira olamuleleke elapo ni wiiriha okhala eparayiisu.

  • “Otthuna wanyu wireye . . . vathí-va”

    Ninvekela wira yoolakela ya Muluku yiiraneye valaponi mmureerelo wa atthu oowiiwelela, nto atthu oomalela akhaleke moohimala mParayiisu valaponi, ntoko siisaale Yehova saaphavela awe aapattuxaka atthu.

Muru 8, etti. 2

21 YOWOOPOLA

Yehova oovaha yowoopola wira owoopole apinaatamu etampi ni okhwa. Yowoopola esisapo yaavekeliwa wira eliveriwe ele Adamu, mulopwana oopacerya aapweteiwale  awe, niire so, okumi woomalela, vamosa ni olokiherya wataana wooloka ni Yehova weiwo ohononiwe. Muluku aahimuruma Yesu orwa valaponi wira aakhwele anamattheka otheene. Tthiri okhwa wa Yesu, ohaavaha apinaatamu otheene eparakha ya otthikela okhalana okumi woomalela ni woohimala valaponi.

Muru 8, etti. 21; Muru 9, etti. 13

22 XEENI 1914 ORYAAWE MWAAKHA WOOTTHUNEYA?

Eprofesia ya Daniyeli ekapitulu 4 enniixuttiha wira Muluku aarowa otikitherya Omwene awe 1914.

Eprofesia: Yehova aahimwiiriha Mwene Nabukhodonosori oloha voohimya sa mwiri wiikitthiwe. Moolohani, aahoona ebronze ni eyuuma yeeyo yaarumeeliwe wira otthukiwe mwiri ole wira ohiphuwe mpakha okathi “thanu na pili”. Nuumala okathi owo, mwiri ole waamphuwa-tho.Daniyeli 3:98; 4:7-13.

Ele eprofesia enitaphulela aya wa hiyo: Mwiri onithoonyerya olamulelo wa Muluku. Mwa iyaakha sinceene, Yehova aahaarumeela atthu aahiiso mamwene, oYerusalemu wira yeettiheke nloko na aIsarayeli. (1 Wahala 29:23) Masi mamwene ale khiyaaroromelen’ye, nto olamulelo aya waahimala. Yerusalemu aahipwetexiwa mwaakha wa 607 AEC. Mwaakha yoola waapacenrye aya okathi “thanu na pili”. (2 Mamwene 25:1, 8-10; Ezekiyeli 21:25-27) Vaavo Yesu aahimmye awe wira: “oYerusalemu ononyakattiwa n’amalapo mpakha omalela okathi w’amalapo yawo”, aahimya Omwene wa okathi “thanu na pili”. (Luka 21:24) Tivonto okathi “thanu na pili” khaamanle okathi Yesu aaryaawe valaponi. Maana Yehova aahimuleiherya omukhaliha Mwene wanikisa wa okathi “thanu na pili”. Olamulela wa Mwene ola musya, Yesu, onrowa oruuha mareeliho manceene oohimala wa atthu otheene anikhala valaponi.Luka 1:30-33.

 Opisa wa okathi “thanu na pili”: Okathi “thanu na pili” waamalinhe iyaakha 2.520. Nakontari iyaakha 2.520 okhuma mwaakha wa 607 AEC, ninrowa omalela mwaakha wa 1914. Ola mwaakha yoole Yehova aamukhalinha awe Yesu, Mwene a Omwene wa wiirimu.

Nimphwanya sai nummuru nna 2.520? Biibiliya onihimya wira okathi miraru nnimeya ontaphulela mahiku 1.260. (Wisupulula 12:6, 14) Nto okathi “thanu na pili” ohaana okhala ikwaha piili sa nummuru nna, eyo piiyo, mahiku 2.520. Tivonto mahiku 2.520 anithoonyerya iyaakha 2.520, okhala wira Biibiliya onihimya so: “nihiku nimosa kinnilikanyiha n’iyakha emosá”.—Mothakoni 14:34; Ezekiyeli 4:6.

Muru 8, etti. 23

23 MIKHAYELI NLAIKHA NUULUPALE

Nuulumo noowi “nlaikha nulupale” nintaphulela “xeefi a malaikha”. Biibiliya onihimya nlaikha nimosa paahi okhala nlaikha nuulupale, niire so, Mikhayeli.Daniyeli 12:1; Yuda 9.

Mikhayeli Tonihoolela malaikha oororomeleya a Muluku. Wisupulula 12:7 onihimya so: “Nlaikha Mikhayeli ni makhw’aya nahiwana n’inow’eyo: vano enowa yakhaliheriwa ni malaikh’aya”. Eliivuru ya Wisupulula ennimuhimya Yesu okhala Mukhulupale aanakhotto a Muluku, tivonto Mikhayeli nsina nikina na Yesu.Wisupulula 19:14-16.

Muru 9, etti. 4

24 MAHIKU OOKISERYA

Moolumo ala anithoonyerya okathi oniiraneya aya itthu suulupale valaponi, Omwene wa Muluku ohinatthi opwetexa olumwenku wa Satana. Nave moolumo makina oowi “ethonyeryo . . . y’omala olumwenku t’ivi” ni “orwa wa Mwana a mutthu”, annirumeeliwa mBiibiliyani ahimyaka okathi omosaru. (Matheyo 24:3, 27, 37) “Okathi wokiserya” opacenrye nuumala Omwene wa Muluku opacerya  olamulela wiirimu mwaakha wa 1914, nto onrowa omala ni opwetexiwa wa olumwenku wa Satana ekhotto ya Harmagedoni.—2 Timótheyo 3:1; 2 Pedru 3:3.

Muru 9, etti. 5

25 OHIHIMUXIWA

Ohihimuxiwa ontaphulela Muluku omuttikiherya okumi mutthu yoole okhwiiye. MBiibiliyani sookhala soohimmwa 9 sa atthu yaahihimuxiwe. Eliya, Eliseyo, Yesu, Pedru, ni Paulo yaahaahihimuxa atthu. Miiriirya iyo sahiiraneya mwaha woowi Muluku aahaavaha owerya atthu awo. Yehova ooleiherya waahihimuxa “atthu othene, ale òrera murima n’ale òtakhala murima” wira akhaleke valaponi. (Miteko 24:15) Nave Biibiliya onnihimya ohihimuxiwa wa ale anrowa wiirimu. Ohihimuxiwa waya oniiraneya vaavo ale anithanliwa aahiiso woottihiwa ni Muluku, vanihihimuxiwa aya wira yakhaleke wiirimu ni Yesu.Yohani 5:28, 29; 11:25; aFilipi 3:11; Wisupulula 20:5, 6.

Muru 9, etti. 13

26 ONAMMUNEPANI

Onammunepani enamuna atthu anirumeela aya aphavelaka olavula ni minepa sootakhala, mooluluwanya aahiiso amurumeelaka nahako, nookhwiri wala namaxintta. Atthu annirumeela onammunepani maana annikupali yowiixuttiha yoowootha wira minepa sa alipa-ookhwa sinnivikaniha okhala ni sinnaahaaxa atthu. Tthiri minepa sootakhala sinneererya owiiriha atthu ohimwiiwelela Muluku. Waaxerya ehako ya itheneeri, maxintta, iliivuru sa maxintta, okupali ethiru, waaxerya ehako ophavelaka osuwela etthu ehinsuweliwa, siniirela mpantta onammunepani. Minepa sootakhala ni anamaxintta anniiriha iliivuru sinceene, irevista, ifilme, ikartau sa maxintta, televisau, masipo, wooneyaka ntoko itthu sooloka aahiiso soohakalaliha. Soolema sinceene sa moota atthu anivithana aya sinihela muhina omulaxerya namukhwa, othukumana nihiku  na neeraru, opaka matthanka, isatakha, ni ometthiwa ale akhweliwe, nto itthu iyo sinivarihana ni minepa sootakhala. Ikwaha sinceene atthu anirumeela mirette aphavelaka orumeela owerya wa minepa sootakhala.aGalasia 5:20; Wisupulula 21:8.

Muru 10, etti. 10; Muru 16, etti. 4

27 OKHULUPALE WA YEHOVA

Yehova tori Muluku Oowerya Sotheene, ni topattunxe olumwenku wotheene. (Wisupulula 15:3) Tivonto owo tori Mwaneene itthu sotheene, ni ookhalana ehakhi aahiiso owerya wira olamuleleke soopattuxiwa sotheene. (Esalimo 24:1; Yesaya 40:21-23; Wisupulula 4:11) Yehova oopaka malamulo aneettiha khula etthu epattunxe awe . Nave, Yehova ookhalana owerya wa waathanla akina wira akhale anamalamulela. Ninnikhaliherya okhulupale awe vaavo vanimphenta ahu ni omwiiwelela.1 Wahala 29:11.

Muru 11, etti. 10

28 OKUMIHA ERUKULU

Okumiha erukulu moolakelela onniiriha okhwa mwaana aarowa oyariwa. Nto mwaana owo khokhwiiye mwaha wa ehasara aahiiso oyiiheya erukulu moohilakelela. Okumi wa mwaana onipacerya okathi onirupaliwa awe. Owo mutthu aarowa oyariwa.

Muru 13, etti. 5

29 OHELELIWA EPHOME

Ela etthu enipakiwa oxipitaali vaavo ephome aahiiso mipantta mixexe suulupale sa ephome siniheleliwa aya mweerutthuni mwa mutthu, pooti okhala ele ekumihiwe wa mutthu mukina wala esukiwe mmurupani. Mipantta suulupale mixexe sa ephome tiiya: plasma, ikoloobulu sooxeerya, ikoloobulu sootteela, ni iplaqueta.

Muru 13, etti. 13

 30 OLAKA

MBiibiliyani, nuulumo noowi ‘olaka’ khanrina muupuwelo wa ohukhumu. Vaavo vanimulaka ahu mutthu, hiyo nnoomwiixuttiha, omulakiherya, ni omuttaruxa. Yehova khonaalaka atthu mootakhala aahiiso moowali. (Miruku 4:1, 2) Yehova oovaha ntakiheryo nooloka wa anamuyari. Onnilaka mwa enamuna yooloka okhala wira pooti omwiiriha mutthu osiveliwa ni yoolaka eyo. (Miruku 12:1) Yehova onnaaphenta atthu awe, tivonto onaalakiherya awe. Nto onniwiixuttiha wira alokiherye miyuupuwelo soohiloka, aakhaliheryaka wiixutta opaka itthu mwa enamuna enimuhakalaliha. Nyuwo anamuyari, olaka onihela muhina waakhaliherya aniinyu osuwela mwaha aya anitthuneya aya wiiwelelaka. Nave-tho, ontaphulela owiixuttiha omphenta Yehova, ni osiveliwa Biibiliya, ni wiiwelela malakiheryo awe.

Muru 14, etti. 13

31 MINEPA SOOTAKHALA

Malaikha ootakhala arina owerya waavikana apinaatamu. Tthiri axetwani malaikha ootakhala. Yaahikhala ootakhala okathi yammwarenle aya Muluku khukhala awanani awe. (Maphattuwelo 6:2; Yuda 6) Aamutakiha Satana nwanani a Yehova.Otumererya 32:17; Luka 8:30; Miteko 16:16; Yakobo 2:19.

Muru 16, etti. 4