Murowe mpantta wa sirimuhina

Murowe mpantta wa myaha sirimuhina

Anamoona a Yehova

Muthanle nttaava Emakhuwa

 MURU 5

“Muthiyana Òrera Murima”

“Muthiyana Òrera Murima”

1, 2. (a) Muteko xeeni aavara awe Ruthi? (b) Etthu xeeni yooloka Ruthi aaxuntte awe voohimya sa Nlamulo na Muluku ni atthu awe?

RUTHI onnikhoroma ohoolo wa esevada ettontte awe nihiku notheene. Emakaaripi anamuteko otheene annikhuma mmatta muttetthe wa oBethelehemu ni anamunceene aneetta mphironi arowaka mmawannyeya, akina yaakhala mittetthe saamukhaani vakhiviru ni muttetthe ole. Tthiri Ruthi erutthu awe yaaninwereya mwaha wa muteko aavanre awe okhuma vaasiisu mpakha wiila. Hata vari siiso owo aanivikaniha ovara muteko, eepetthaka ni oveera ipyo saattontte awe nihiku nle. Nnaamwi muteko ole waari woovila, waahikumiherya mureerelo munceene.

2 Nto okathi xeeni itthu saapacenrye aya okhumela saana wa Ruthi? Ntoko soonale ahu muru ovinre, Ruthi ahaataana saana ni amaathi awe, ni aahilakela okhala ni yena, ni omukokhorela Yehova, Muluku a Nowemi. Anaamukhweli ale anli yaakhumale oMowabi yaahiphiya oBethelehemu, nuumala-vo, Ruthi aahisuwela wira Yehova aahikumiherya Nlamulo naaweemya atthu oothoiwa vamosa ni anamurwa ophwanya yoolya wIsarayeli. Owo ahaaphwanya atthu a Yehova yaakhala moovarihana ni Nlamulo nle, yaaxuttihiwe ni nlamulo nle, ni yooniherya omoova Muluku ni oreerela murima waavanre murima awe yoowo woona othunku.

3, 4. (a) Bowazi aamulipihale sai Ruthi? (b) Mahiku ala oothowa musurukhu ntakiheryo na Ruthi ninrowa onikhaliherya sai?

3 Mmosa wa atthu a Muluku aari Bowazi, yoowo aari mulopwana oothaaciri oowunnuwela, mwaneene ematta yeele Ruthi aattotta awe ipyo. Nihiku nle Bowazi aahinweha, khumoonela othunku wuulupale. Nave aahitteeliwa murima ni masu yaalavuliwe ni Bowazi, omuttottopelaka mwaha wa waakhapelela wawe saana amaathi awe ni othanla wawe otthyawela mmapuphani mwa Yehova Muluku.Mmusome Ruthi 2:11-14.

4 Masi nlelo Ruthi aanixankiheya sa moota saarowa awe okhala. Pooti wira aahuupuwela oriki: okhala wira miyo namurwa, nkitheliwe, nkirina anamwane, ohoolo kinrowa owerya sai ophwanya mireerelo saka ni sa Nowemi? Niireke wamphiyerya ottotta paahi? Nave ti pani aarowa omukhapelela yena nuumala wuuluvala? Tthiri itthu iyo sanimuxankiha vanceene. Mahiku ala oothowa musurukhu, anamunceene  sinnaaphwanya mixankiho ntoko Ruthi. Okathi onirowa ahu wiixutta moota waamini wa Ruthi waamukhalihenrye aya oxintta mixankiho, ninrowa ophwanya inamuna sa otakiha waamini wawe.

Nuulumo Noowi Etthoko Ninhimya Exeeni?

5, 6. Itthu seettale sai wa Ruthi nihiku noopacerya ottotta mmatta mwa Bowazi? (b) Nowemi aahimyale exeeni okathi Ruthi aaphiyale awe owaani?

5 Nuumala Ruthi omaliha weepettha ipyo saattottale awe, aahoona wira saanisarya mphimo muulupale yoowo waarina iliitru 22 sa esevada. Nihuta naakuxa awe woonasa wene naahiphiya ikiilu 14! Nihuta nle naari na ekuwo woonasa wene aateexale vamuru, oneetta orowaka oBethelehemu vailale ene.Ruth. 2:17.

6 Nowemi aahitteeliwa murima nuumala omoona Ruthi, woonasa wene aahitikinihiwa nuumala woona wunnuwa wa nihuta nle. Ruthi aahiruuha-tho yoolya yaahanle, yeele Bowazi aavaha awe anamuteko awe, nto yaahiphiyerya olyiwa ni atthu ale anli. Nowemi aahimukoha: “Muttottale vai olelo? Mwavara vai muteko? Apwiya emurerihe ole òkhalihenryeni”. (Ruth. 2:19) Nowemi ahuupuwela khoona wira mutthu mmosa ooreera murima tanvahale Ruthi yoolya ele.

7, 8. (a) Nowemi oona wira oreera murima wa Bowazi waakhuma vai, ni mwaha xeeni? (b) Moota xeeni Ruthi oonihenrye awe omphenta saana maathi awe?

7 Nowemi ni Ruthi, yaahipacerya ovaanela, nto Ruthi aahimutthokiherya Nowemi moota aareereliwe awe murima ni Bowazi. Nto eyo yaahimwiiriha waakhula ohimyaka so: “Apwiya khanihiya wamorela ikharari atthu akumi n’ale akhwiye”. (Ruth. 2:20) Owo ahoona wira oreera murima wa Bowazi waakhuma wa Yehova, yoowo oniwiiriha arumeyi awe okhala oovaha ni onaalaiherya waatthuvela mwaha wa oreera waya murima. *Musome Miruku 19:17.

8 Nowemi aahimutumererya Ruthi wiiwelela miruku sa Bowazi wira oroweke khula nihiku ottotta ipyo ni wira eetteke vakhiviru ni athiyana akina a etthoko ya Bowazi wira ahiirihiwe etthu yootakhala ni anamuteko akina. Ruthi aahiiwelela miruku iye. Nto owo “animaka w’apwiyamwan’awe”. (Ruth. 2:22, 23) Moolumo awo annooniherya-tho mukhalelo wootepexa otthuneya waarina Ruthi, niire so, niphento nuulupale. Tthiri ntakiheryo na Ruthi nihaana oniiriha hiyo waathokorerya saana amusi ahu, waaphenta ni waakhaliherya okathi wa mixankiho. Yehova khonihiya omutthuvela mutthu oororomeleya.

Sowiira sa Ruthi ni Nowemi sinnuupuxerya exeeni voohimya sa amusi arina ahu?

9. Etthu xeeni eniixutta ahu wa ntakiheryo na Ruthi ni Nowemi voohimya sa emusi?

 9 Niireke Ruthi ni Nowemi paahi yaari emusi? Anamunceene anihimya wira emusi “yekeekhai”, tiile erina mulopwana ni mwaarawe, anamwane, axitaata ni atthu akina. Masi ntakiheryo na Ruthi ni Nowemi, nihaana onuupuxerya wira hiyo nikhanle arumeyi a Yehova, natthukuleleke murima atthu otheene a emusi ahu, enayevaru, nareerelaka murima ni waaphenta. Nto niireke nyuwo munnivaha efaita emusi erina anyu? Yesu aahiwuupuxerya atthareli awe wira muloko wa eKristau onnaaphwanyiha emusi hata ale ahirina emusi.Mar. 10:29, 30.

Ruthi ni Nowemi yaanikhaliheryana mukina ni mukhwaawe

“Ti Yowo Onakelela Mpani Aiy’anyu Akhwiye”

10. Enamuna xeeni Nowemi aaphavela awe omukhaliherya Ruthi?

10 Okhuma okathi wa ohepha esevada mweeri wa Abril mpakha okathi woohepha etrigu, Junyo, Ruthi aanittotta ipyo mmatta mwa Bowazi. Okathi saavira aya isumana sinceene, Nowemi aanimananiha wuupuwela enamuna ya omukhaliherya Ruthi. Khalai, oMowabi, Nowemi aahimuhimeerya wira khaarowa owerya omwaaverya mulopwana mukina wira omuthele Ruthi. (Ruth. 1:11-13) Vano Nowemi aahipacerya wuupuwela etthu ekina. Owo aahimwiitthana Ruthi khuhimya so: “Mwan’aka! Ti muteko aka wophavelelani mukhalelo worera, wira mureriwe”. (Ruth. 3:1) Okathi ole, yaari etthu yoolema anamuyari omphavela mutthu aarowa othelana ni mwanaya, nto Ruthi aari ntoko mwaana a Nowemi. Nowemi aaphavela omphwanyiha Ruthi ‘oreriwa’, eyo piiyo, nipuro noophumurya nenlo naarowa awe okhapeleliwaka ni aiyawe. Nto Nowemi aarowa opaka exeeni?

11, 12. (a) Nowemi aahimya exeeni sa Nuulumo na Muluku, omuhimyaka Bowazi wira ‘toonakelela mpani aiy’anyu akhwiye’? (b) Ruthi oonenle sai miruku sa amaathi awe?

11 Okathi Ruthi aamuromonle awe Bowazi, Nowemi aalavunle so: “Mulopwan’owo mmus’ihu, ti yowo onakelela mpani aiy’anyu akhwiye”. (Ruth. 2:20) Anitaphulela exeeni masu awo? Nlamulo Muluku aavanhe awe aIsarayeli, naahela muhina okhapeleliwa imusi saakhala soothoiwa mwaha wookhweliwa. Akhala wira muthiyana aanikhweliwa ni aiyawe ohinatthi oyarihiwa, owo aaniriipiwa murima vanceene okhala wira nsina na aiyawe naamurimeela, nto ohoolo emusi awe yammala-mala. Masi Nlamulo na Muluku naneemya wira munnawe mulopwana ole okhwiiye, omutheleke  naamukhweli, wira amuyarihe mwaana, yoowo aarowa okuxaka nsina na tiithi awe okhwiiye ni okhapelela mihakhu sa emusi ele. *Otum. 25:5-7.

12 Vano Nowemi aahimuleela Ruthi enamuna yootheliwa-tho. Woonasa wene, owiitho waahimutteela okathi amaathi awe yamuleela aya. Ruthi khaalimalenle Nlamulo notheene naavahiwe aIsarayeli, okhala wira nlelo khaasuwela itthu sikina. Hata vari siiso, owo aanimuttittimiha vanceene Nowemi, tivonto aawiriyana awe khula etthu yaahimeeriwa awe. Etthu Nowemi yaamutumerenrye awe Ruthi, woonasa wene yaakhala ntoko yoohikhalela, yowuuliha muru, aahiiso etthu yoothanyeya, masi Ruthi aaheemya. Moowiiyeviha Ruthi aakhunle so: “Kinimwira sothene sikihimenryanyu”.Ruth. 3:5.

13. Etthu xeeni eniixutta ahu sa Ruthi wiiwelela wawe miruku sa mutthu oowunnuwela? (Munwehe-tho Yobi 12:12.)

13 Okathi mukina, amiravo waavila wiiwelela miruku sa atthu oowunnuwela arina miruku sooreera. Vannikhweya wuupuwela wira atthu oowunnuwela khanisuwela mixankiho sinaaphwanya amiravo. Ntakiheryo na wiiyeviha wa Ruthi, ninnuupuxerya hiyo wira niiweleleke miruku sa atthu oowunnuwela yaawo anniphenta ni aniphavela mureerelo ahu, okhala wira nnoophwanya oreeriwa. (Musome Esalimo 71:17, 18.) Nto miruku xeeni saari sooreera sa Nowemi, nto niireke Ruthi aahiphwanya mureerelo mwaha wowiiwelela?

 Ruthi Oryeene Nipuro Neepetthiwa Ipyo

14. Waakhala sai opuro weepetthiwa ipyo, nto waarumeeliwa sai?

14 Emakaaripi yeele, Ruthi aahirowa nipuro neepetthiwa ipyo, waakhala opuro wowataleya yoowo alimi anceene weepettha aya ni oveera ipyo saya. Okhala wene waathanliwa opuro woottukhuwa wala etturuuru waavira epheyo yinceene makaaripi vahalaka wiila. Wira yeepetthe ni oveera ipyo iye, anamuteko yaarumeela ekaruma emosa yaakhala ntoko egaarfu yuulupale, aahiiso epoxolo yeeyo yaarumeela aya wira ayeeherye ipyo osulu nto sivaveke ikokhola, masi ipyo sooreera simoreleke vathi.

15, 16. (a) Muhimye itthu siiraneyale opuro weephettiwa ipyo nuumala Bowazi orupa. (b) Bowazi aasuwenle sai wira Ruthi aarupaathale vakhiviru ni yena?

15 Ruthi anweha paahi okathi anamuteko yaamaliha aya muteko oxekuwa. Bowazi taaweherya muteko woweepettha ipyo sawe, nto ipyo sahuukeliwa khukhala sinceene. Nuumala olya, aahirupaathi opuro wowaattamela ipyo sawe. Mahiku ale, okhala wene atthu yahaana orupaka opuro weepetthiwa ipyo saya wira sihiiyiwe ni alavilavi. Nto Ruthi aahisuwela opuro Bowazi waarupale awe. Nto waahiphiya okathi woopaka ele yaarummwale awe ni Nowemi.

16 Murima wa Ruthi waanitthimaka, okathi eetta awe vakhaani-vakhaani. Ruthi aanoona wira Bowazi aamurupa ikhove suulupale. Ntoko saatthokiheriwa awe ni Nowemi, owo aahirowa vaamettoni vawe, khokhunula inawe sawe nto khurupaathi vakhiviru.Khuyalipelela etthu yaarowa wiiraneya. Okathi khuyavira. Ruthi oona wira aamutepa opisa. Nto ohiyu eriyari, Bowazi aahipacerya weeteteya. Othukumelaka mwaha wa oriiriwa, aahivenya khuphavela okhuneela metto sawe. Masi aahoona wira ookhala mutthu aari-vo. Biibiliya onihimya wira Bowazi: “Ahirukunuwa, khututuxiwa ni muthiyan’ole, ammathalene vamettoni vawe”.Ruth. 3:8.

17. Itthu xeeni ahinsuwela aya, atthu yaale anuupuwela wira Ruthi ni Bowazi yaahipaka etthu yoohiloka?

 17 Bowazi aahimukoha wira ‘Nyuwo mwà pani?’ Woonasa wene Ruthi aahimwaakhula othukumelaka mwaha wa woova, oriki: “Ti miyo, Ruthi, murumeyi anyu. Xontte, mukithele! Ti nyuwo mukelamp’awe iy’aka okhwiye”. (Ruth. 3:9) Mahiku ala, atthu akina anihimya wira moolumo ni sowiira sa Ruthi sinooniherya wira yaahipakiwa etthu yoohiloka, masi sihaavo itthu piili ahinsuwela aya. Yoopacerya, ele Ruthi yaapanke awe yaari yoolema ya mahiku ale, yeeyo olelo-va ehiniireya. Nto vaarowa okhala voohireerela olikanyiha ele yaapanke awe Ruthi ni makhalelo oohiisumaaliha a atthu a mahiku ala. Yanenli, enamuna Bowazi yaamukhapelenle awe, enooniherya wira mweettelo wa Ruthi waari wooloka waatthuneya ottottopeliwa vanceene.

Ohikhalana nrima ti etthu yaamwiirihale Ruthi ophavela nikhaliheryo na Bowazi

18. Bowazi aahimyale exeeni wira omulipihe Ruthi, ni itthu xeeni aaromonle awe voohimya sa oreera wawe murima?

18 Ninnikupali wira moolumo ookhalela ni ooreerela murima a Bowazi, yahiriiriha murima wa Ruthi. Owo aalavunle so: ‘Mwan’aka, Apwiya yoreriheni. Tthiri nyuwo mokhala òroromeleya, mwattharaka apwiyamwan’anyu anamukhweli, vano motepa ororomeleya, muhitthunaka otheliwa ni mmiravo mukina, thajiri walá òthoiwa’. (Ruth. 3:10) Masu oowi “mokhala òroromeleya”, anihimya ororomeleya wa Ruthi mwaha wa omutthara wawe Nowemi otthikelaka elapo ya wIsarayeli ni omukhapelela. Nto moolumo oowi “vano motepa ororomeleya”, yaahimya etthu yeele Ruthi aamanle awe opaka. Bowazi aanisuwela wira muthiyana mmiravo ntoko ole, khivaarowa ovila otheliwa ni mmiravo oothaaciri wala oothoiwa. Masi, Ruthi aaphavela mureerelo wa Nowemi ni iyawe aakhwiiye wira omuyare mwaana aarowa ohalana nsina na tiithi awe. Tivonto varyaaya vookhweya woona wira Ruthi aahivara murima wa Bowazi mwaha wa oreera wawe murima.

19, 20. (a) Exeeni yaamwiirihale Bowazi ohaakuvela omuthela Ruthi? (b) Bowazi oonihenrye sai omureerela murima ni ottittimiha nsina nooloka na Ruthi?

19 Bowazi aahihimya-tho: “Vano, mwan’aka, muhové, kinowirelani sothene sinkivekelanyu. Atthu othene èlapo ela annisuwela wira mwá muthiyana òrera murima”. (Ruth. 3:11) Bowazi aahitteeliwa murima ni muupuwelo wa omuthela Ruthi; woonasa wene khaatikinihiwe nuumala ovekeliwa wira omuthele  muthiyana ole. Bowazi aari mutthu eettela exariya, tivonto khaarowa opaka etthu ophavelaka mureerelo awe paahi. Owo aahimuleela wira aahikhala mmusi mukina aakhanle oopacerya okohiwa, yoowo aari mmusi oohirakamelana a namukhwa, iyawe Nowemi. Bowazi aarowa omuleela toko mulopwana ole wira onvahe eparakha ya omuthela Ruthi.

Mwaha wa waakhapelela ni waattittimiha wawe atthu akina, Ruthi aahihimmwa okhala mutthu ooreera murima

20 Bowazi aahimwiirela Ruthi wira otthikele orupaathi, mpakha oxaaka; ni wira aahaana okhuma ohooniwe ni atthu akina. Owo khaaphavela ohonona nsina nooloka na Ruthi, ni nsina na owo muneene, okhala wira atthu yaarowa woonaka wira Ruthi ni Bowazi yahiraruwasa. Ruthi aahitthikela orupa opuro wowaattamela metto sa Bowazi, masi murima waahimutteela okhala wira etthu yaavekale awe yaahaakhuliwa vooreerela. Nto vahalaka vakhaani oxa, nlelo variipale ene, Ruthi aahivenya. Vano Bowazi aahinvaha yoolya yinceene, nto Ruthi khutthikela oBethelehemu.Mmusome Ruthi 3:13-15.

21. Exeeni yaamwiirinhe Ruthi okhala “muthiyana òrera murima”, nto ninrowa omutakiha sai?

21 Tthiri Ruthi aahitteeliwa Murima okathi uupuwelela awe masu yaalavuliwe ni Bowazi wira atthu otheene yaanimoona Ruthi okhala “muthiyana òrera murima!” Tthiri otepexa wawe ophavela omusuwela Yehova ni omurumeela ti waamwiirinhe okhalana mweettelo wooloka. Ruthi ahooniherya oreera wawe murima ni omuttittimiha wawe Nowemi ni amusi awe, vaavo eemerenrye awe soolema soovirikana ni sa elapo awe. Vakhala wira ninrowa omutakiha Ruthi, nnimweemererya waakhapelela ni waattittimiha atthu hata soolema saya sivirikanaka ni hiyo. Niira siiso, nnoowerya okhalana mweettelo wooloka.

Nipuro Noophumurya wa Ruthi

22, 23. (a) Woonasa wene yaataphulela exeeni yoolya Bowazi anvahale awe Ruthi? (Nwehe enoota.) (b) Exeeni Nowemi yaamurumale awe opaka Ruthi?

22 “Mwan’aka, yokhumelenleni exeni”? Ala ti masu yaalavuliwe ni Nowemi nuumala Ruthi otthika. Woonasa wene etthu yaamwirihale opaka nikoho nlo, okhala wira nlelo vaari ohiyu, ni Nowemi aaniphavela-tho osuwela akhala wira Ruthi nlelo aari naamukhweli paahi wala aaniwehererya otheliwa. Nto Ruthi aahimutthokiherya itthu sotheene saakhumelenle okathi aaryaawe ni Bowazi. Ruthi aahimooniherya Nowemi yoolya yowaatta yaavahiwa awe ni Bowazi. *Ruth. 3:16, 17.

23 Mwa miruku, Nowemi aahimutumererya Ruthi wira ohirowe  omatta nihiku nle. Nowemi aahimuhimeerya Ruthi wira: “Nosuwela wira Bowazi owo khanìtthyala olelo mpakha omaliherya sothene”.Ruth. 3:18.

24, 25. (a) Bowazi oonihenrye sai wira aari mulopwana a xariya ni ahaarina nrima? (b) Mwa inamuna xeeni Ruthi aaryaawe ooreelihiwa?

24 Tthiri Nowemi aahimyale ekeekhai. Bowazi aahirowa vamukhora wa muttetthe ole, opuro waakumana aya axitokweene a muttetthe ole, khuyanwehererya mulopwana ole aarina ehakhi ya omuthela Ruthi. Ohoolo wa atthu otheene Bowazi aahinvaha eparakha mulopwana ole wira omuthele Ruthi. Masi mulopwana ole aahikhootta, khuhimya wira amuthela muthiyana ole, anamwane khiyaarowa okhala awawe. Nuumala-vo Bowazi aahilavula wira aarowa, woopola mihakhu sa iyawe Nowemi, Elimileki, omuthelaka Ruthi, yoowo aari naamukhweli a Mahaloni mwanawe Elimeleki. Bowazi aahihimya wira vakhala wira ammuthela Ruthi, “vano nsina nawe [Mahaloni] khaninrowa omalihiwa mulaponi mwawe”. (Ruth. 4:1-10) Tthiri Bowazi aari mulopwana a xariya ahaarina nrima.

25 Vano Bowazi aahimuthela Ruthi. Nuuvira okathi, Biibiliya onihimya wira Yehova] ‘ahimureriha Ruthi, khunvaha mwana. Owo aahimuyara mwana mwamulopwana’. Athiyana oBethelehemu yaahimuttottopela Nowemi ahimyaka wira Ruthi aari ooloka waavikana anamwane 7 a Nowemi. Ohoolo nnimoona wira mwaana a Ruthi aari muhavinre a Mwene muulupale Davidi. (Ruth. 4:11-22) Nto Davidi, khukhala muhavinre a Yesu Kristu.Math. 1:1. *

Yehova aahimureeliha Ruthi khunvaha eparakha ya okhala muhavinre a Mesiya

26. Sowiira sa Ruthi ni Nowemi sinnuupuxerya exeeni?

26 Ruthi aahireelihiwa, Nowemi aahireelihiwa-tho maana aahimutthokorerya mwaana ole ntoko awawe. Ekumi ya athiyana ala anli, ennuupuxerya wira Yehova Muluku onniwoona atthu otheene animurumeela mowiiyeviha ni moororomeleya vamosa ni atthu awe. Owo khonihiya waareeliha atthu awe oororomeleya ntoko Bowazi, Nowemi ni Ruthi.

^ etti. 7 Nowemi aanisuwela wira Yehova aanaareerela murima atthu akumi ni ale ookhwa. Nowemi aahikhweliwa aiyawe ni anaawe axilopwana anli. Ruthi aahikhweliwa-tho aiyawe. Tthiri alopwana ale yaaniphentiwa vanceene ni Nowemi vamosa ni Ruthi. Khula nikhaliheryo aavahiwa awe Nowemi ni Ruthi, naakhala ntoko yaavahiwa alopwana ale yaakhwiiye, yaawo aryeene akumi yaarowa waakhapelelaka.

^ etti. 11 Ehakhi ya omuthela naamukhweli, opacerya wene yaavahiwa atthu yaale yaari axinnawe mulopwana ole okhwiiye, yaahikhale, yaaniphaveliwa amusi akina a vakhiviru, wira avahereriwe naamukhweli owo.Moth. 27:5-11.

^ etti. 22 Bowazi aahinvaha Ruthi miphimo 6 sa esevada seiyo sihinihimmwa waatta waya, woonasa wene yooniherya wira ntoko siisaale waavariwa awe muteko mahiku 6 khula esumana nto khiyaphiya eSaabadu ya ophumurya, mahiku a ohasuwa wa Ruthi ntoko naamukhweli yaahanle vakhaani omala, nto ophiyeke okathi wa “ophumurya” vaavo aarowa awe otheliwa ni okhapeleliwa ni iyawe. Mwa enamuna ekina, miphimo 6, aahiiso ipoxolo soosarya, sooniherya wira ole ti waari mwaattelo Ruthi aarowa awe oteexa.

^ etti. 25 Ruthi ori mmosa wa athiyana athanu anihimmwa mBiibiliyani wira ti amuhavinre awe Yesu. Mukina ti Rahabi, yoowo aari maama awe Bowazi. (Math. 1:3, 5, 6, 16) Voolikana ni Ruthi, owo khahiyo aari a nloko na Isarayeli.