Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mutakiheke Waamini Waya

 MURU 11

Owo Aaniwehaweha ni Owehererya

Owo Aaniwehaweha ni Owehererya

1, 2. Muteko xeeni woovila aavahiwe awe Eliya, nto Akhabi ni Eliya yaavirikanne sai?

ELIYA aaphavela okhala ekhawe wira olavule ni Tiithi awe a wiirimu. Masi muttitthi wa atthu waari-vo waahimoona profeta ole ovekelaka nto khumora mooro wiirimu, nave anamunceene yaaphavela wira Eliya aareerele murima. Eliya ohinatthi owela Omwaako Karmelo wira anvekele Yehova Muluku opuro wowiipitheya, aahivahiwa muteko wooxankiha. Owo aahaana orowa olavula ni Mwene Akhabi.

2 Akhabi ni Eliya yaari atthu oovirikana vanceene. Akhabi, aawara ikuwo soolokexa sa emwene, aari nanrima ni nammwareya ootakhala. Eliya aawara ikuwo sa oprofeta, eyo piiyo, ikuwo pure, woonasa wene saapakiwa ni esapala ya mwaamunama ntoko ekameelo wala epuri. Masi Eliya aari mutthu oolipa murima, oororomeleya ni aamwaamini Muluku. Nihinatthi omala nihiku nle, wahooneya saana ovirikana wa atthu ale anli.

3, 4. (a) Xeeni vanihimmwa aya wira nle naari nihiku noohiloka wa Akhabi ni anamakokhorela akina a Bayali? (b) Makoho xeeni anrowa ahu othokorerya?

3 Nle naari nihiku noohiloka wa Akhabi ni anamakokhorela akina a Bayali. Etiini ya amalapo yeeyo yaakhaliheriwa ni Akhabi ni amwaarawe, Piyamwene Yezabeli ni maloko 10 a Isarayeli yaahuulihihiwa muru. Bayali aahooniwa okhala muluku a ethiru. Nnaamwi maprofeta ale yaamananihale wiina, wiivulaliha, ni oxonttela; Muluku ole eethiru khaawenrye okumiherya mooro. Bayali khaawenrye owoopola atthu 450 okathi waarowa aya wiiviwa. Masi yookhala-tho etthu ekina muluku owo a ethiru yahaawenrye awe opaka, nto etthu eyo yahooniherya voomalela wira Bayali aari muluku eethiru. Mwa iyaakha tthaaru, maprofeta a Bayali yaanimuxonttela wira omalihe muxankiho wa ohirupaka epula waakhumelenle elapo ele, masi Bayali khaawenrye. Voohipisa, Yehova aarowa wooniherya okhulupale awe omalihaka muxankiho owo.1 Mam. 16:30–17:1; 18:1-40.

4 Vano Yehova aarowa opaka eyo okathi xeeni? Exeeni Eliya aarowa awe opaka mpakha ophiya okathi owo? Nto nniixutta-ni wa mulopwana ola oowaamini? Nrowe niwehe waakhuliwa wa makoho ala okathi onithokorerya ahu yowiiraneya ela.Musome 1 Mamwene 18:41-46.

 Mulopwana Oosuwela Opaka Mavekelo

5. Eliya aahimyale wira Akhabi aahaana opaka exeeni, niireke Akhabi aahiixutta etthu mwa itthu saakhumelenle nihiku nle?

5 Eliya aahirowa omuleela Akhabi wira: “Murowé, mwalyeke, nwuryeke. Kinnìwa ekakharakakhara y’epula”. Niireke mwene ole ootakhala aahiixutta etthu ni itthu saakhumelenle nihiku nle? Nnaamwi Biibiliya ohihimyaka mooluluwanya, hiyo nnoowerya woona wira Akhabi khaarukununxe murima awe ni khanvekenle profeta ole wira onvekele Yehova wira oleveleliwe. Ohiya-vo, “Akhabi ahirowa olya n’uwurya”. (1 Mam. 18:41, 42) Ankhi Eliya aapanke exeeni?

6, 7. Xeeni Eliya aavekela awe, ni nthowa xeeni?

6 “Vano Eliya ahiwela vasulu va mwako Karmelo: vavale ahikokhora, ahìpopheya ni makutha”. Okathi Akhabi aarowa awe olya, Eliya aahiphwanya eparakha ya orowa onvekela Tiithi awe a wiirimu. Nkawehani makhalelo oowiiyeviha a Eliya anooniheriwa-va: owo aarookokhora vathi, khuurama mpakha waattamela makutha awe. Eliya aapaka exeeni opuro ole? Khivanivila osuwela. Biibiliya onnaakhula va Yakobo 5:18, oriki: Eliya aahivekela wira erupe epula. Woonasa wene owo aavekela oryeene vasulu va mwaako Karmelo.

Mavekelo a Eliya yooniherya ophavelexa wawe woona wiiraneya wa otthuna wa Muluku

7 Ohinatthi ophiya okathi ole, Yehova aalavunle so: “Miyo  kinorupihela epula etthaya yowuma”. (1 Mam. 18:1) Nto Eliya aahivekela wira yiiraneye yoolakela ya Yehova; ntoko siisaale Yesu aawiixuttinhe awe atthareli awe iyaakha ikonto sinceene ohoolo.Math. 6:9, 10.

8. Ntakiheryo na Eliya ninniixuttiha exeeni voohimya sa ovekela?

8 Ntakiheryo na Eliya ninniniixuttiha itthu sinceene voohimya sa ovekela. Okathi ole etthu yuulupale yaari mmuupuweleloni mwa Eliya waari waakhwanela yoolakela ya Muluku. Nto okathi onivekela ahu, ti vooloka wuupuwelaka wira: “Muluku onninìwa nanvekelaka etthu, nanvekelakaru sintthara otthuna wawe”. (1 Yoh. 5:14) Wira nipake eyo nihaana osuwela yoolakela ya Muluku wira nisuwele moota woovekela; eyo enivekela omusoma Biibiliya khula nihiku. Tthiri Eliya aaniphavela wira ohirupa epula omala-male, maana wanaaxankiha atthu a elapo awe. Murima awe waahisareya oxukhuru mwaha wa mwiirirya waapakiwe ni Yehova nihiku nle. Hiyo-tho nipakeke mavekelo ooxukhuru ni wooniherya wira ninnaaphavelela mureerelo atthu akina.Mmusome 2 aKorinto 1:11; aFilipi 4:6.

Oororomela ni Oowehaweha

9. Malakiheryo xeeni Eliya yanvanhe awe namakhaliherya awe, ni mikhalelo xeeni miili sa Eliya ninrowa ahu othokorerya?

9 EliyaaanaaminiwiraYehovaaamukumiheryaepula,masi khaasuwela nihiku Yehova aarowa awe opaka eyo. Nto exeeni yaapaka awe profeta ole owehereryaka ophiya okathi owo? Nwehe ele Biibiliya enihimya awe: “Numalá ahimuhimerya mmiravo awe wira: Murowé, mwawehe epantte y’ophareya! Mmirav’owo ahirowa, khwira: ‘Nkonale etthu’. Imara thanu na pili, Eliya ahimuhimerya wira: ‘Murowé’, mwawehe!” (1 Mam. 18:43) Ntakiheryo na Eliya ninniniixuttiha itthu piili. Yoopacerya, moolumo anooniherya ororomela wawe. Ni okhala wawe oowehaweha.

Eliya aaniphavela woona ethoonyeryo yooniherya wira Yehova aarowa waakhwaniherya ele yaaleihenrye awe

10, 11. (a) Moota xeeni Eliya oonihenrye awe wira aanimuroromela Yehova ni sooleiherya sawe? (b) Xeeni hiyo vanitthuneya ahu okhalana waamini ntoko Eliya?

10 Okhala wira Eliya aanaaroromela anatiri a Yehova, owo aaniwehererya okathi waarowa aya wiiraneya. Owo aahimuruma namakhaliherya awe owela vasuluxa wira oone akhala wira epula yaahanle orupa. Okathi aatthinke awe namakhaliherya ole aahimyale so: “Nkonale etthu”. Wiirimu waari wookokola ni khiyaakhanle meeku. Vano niireke muhoona etthu yootikiniha? Munnuupuwela wira Eliya  aahimuleela Mwene Akhabi wira: “Kinniwa ekakharakakhara ya epula”. Exeeni yaamwiiriha profeta ole owerya ohimya sisaale variki yahaakhanle meeku wiirimu?

11 Eliya aanisuwela ele Yehova aaleihenrye awe. Profeta ole a Yehova, aanaamini wira Muluku aamwaakhwaniherya nuulumo Nawe. Eliya aaniroromela vanceene mpakha ohimya wira aaniwerya wiiwa ekakharakakhara ya epula. Woonasa wene hiyo pooti wuupuwelaka masu ari mBiibiliyani animuhimya Moise wira: “Ahilipiha murim’awe, ntoko amona Muluku ohinòneya”. Niireke munnimukupali Muluku khiyakhala ntoko munomoona? Owo onninivaha mathowa manceene anniiriha omuroromela yena ni sooleiherya sawe.aHéb. 11:1, 27.

12. Eliya oonihenrye sai wira aari mutthu oowehaweha, ni oonenle sai moolumo oowi naahikhumelela neeku naamukhaani?

12 Vano muthokorerye moota Eliya aaryaawe oowehaweha. Owo aahimuruma namakhaliherya awe orowa oweha osulu ohiya ekwaha emosa wala piili, masi ikwaha thanu na piili! Hiyo pooti omananiha omuupuwela namakhaliheya ole okhulumunwe ene, mwaha woomakela owela vasulu, masi Eliya aahivikaniha omuruma okhala wira aaphavela woona ethoonyeryo. Wanikisa waya nuumala namakhaliherya ole owela vasulu ekwaha ya neethanu nenli aahirwa khuhimya so: “Vano neku nankhini ntoko ntata na mutthu, nokhuma ophareya”. Niireke nyuwo munniwerya omoona namakhaliherya ole ohelaka ntata nawe vayuuci wira oone neeku naamukhaani naarina munnuwelo wa ntata na mutthu mpantta wa Ephareya Yuulupale? Woonasa wene namakhaliherya ole oona wira neeku nle naahitepa oyeva. Masi, Eliya aanoona neeku nne okhala nuulupale. Owo aahimuruma namakhaliherya awe orowa omuleela Akhabi oriki: “Murowé, mwamuhimerye Akhabi wira: ‘Mulokihe ekaro, mutthyaweleke owani: epula ehophwanyeni!’”1 Mam. 18:44.

13, 14. (a) Ninrowa otakiha sai owehaweha wa Eliya? (b) Mathowa xeeni anniiriha hiyo waakuvela ovara miteko sa Yehova?

13 Tthiri Eliya oonivaha ntakiheryo noolokexa. Hiyo nave ninkhala okathi yoowo Muluku onrowa awe waakhwaniherya yoolakela awe voohipisa.Eliya aaniwehererya orupa epula; arumeyi a Muluku olelo-va anniwehererya omala wa makhalelo ala ootakhala. (1 Yoh. 2:17) Niwehereryaka wira Yehova Muluku opake itthu iyo, hiyo nihaana okhala oowehaweha ntoko Eliya. Mwaana a Muluku, Yesu, aahaalopola awiixutti awe wira: “Mulipeleleke! Khamusuwenle nihiku ninrwawe pwiy’anyu”. (Math. 24:42) Niireke Yesu aaphavela ohimya wira awiixutti awe yaarowa ophwanyiwa ahisuwelaka wira anikhala wanikisa wa olumwenku? Nnaari, owo aahimya makhalelo yaarowa okhumelela mahiku ookiserya. Otheene ahu  ninniwerya woona waakhwanela wa ethoonyeryo ya “omala wa elapo” ela yootakhala.Mmusome Matheyo 24:3-7.

Neeku naamukhaani naakhumelenle naahimwiiriha Eliya waamini wira Yehova aamwakhwaniherya yooleiherya awe. Nto ithoonyeryo sa mahiku ookiserya sihaana onivaha mathowa manceene wira naakuvele ovara miteko sa Yehova

14 Khula etthu yaahimmwale sa ethoonyeryo eyo ennilipiha waamini wahu. Nto niireke itthu iyo ti soophiyerya onitumererya waakuvela ovara muteko wa Yehova? Neeku naamukhaani naakhumelenle mpantta wa ophareya naahimwiiriha Eliya waamini wira Yehova aamwakhwaniherya yooleiherya awe. Niireke profeta ole aahooceya ovara muteko awe?

Yehova Aahaakhaliherya ni Waareeliha

15, 16. Itthu xeeni saakhumelenle mootutuxerya, ni exeeni woonasa wene Eliya yaawehererya awe wira Akhabi ampaka?

15 Biibiliya onihimya so: “Nanano vavo yahikhuma meku manjene, khuripiha elapo, khòpaka epheyo, epula khurupa vanjene. Akhabi ahiwela ekaro awe, khuvenya arowaka wIzireyeli”. (1 Mam. 18:45) Itthu iye saahiiraneya vowaakuveya. Okathi yoole namakhaliherya awe Eliya iira awe omuhimeeryaka Akhabi muhupi ole wa profeta, neeku nne naamukhaani naahincerereya mpakha oriipiha wiirimu wotheene. Yaahoopa epheyo yuulupale. Vano, nuumala iyaakha tthaaru nnimeya yaahirupa epula wIsarayeli. Etthaya ele yoowuuma yaahinaanihiwa ni epula ele. Nto okathi yaarupa aya epula yinceene, muro Kisoni waahisareya maasi, nto waahikhupa ephome yootheene ya maprofeta a Bayali yaiviwe. Vano aIsarayeli yaamunyanyanle Muluku yaahivahiwa eparakha ya ottharuwa soottheka saya, maana okokhoreliwa Bayali waahimala.

‘Yaahirupa epula yinceene’

16 Tthiri Eliya aaniwehererya wira etthu ele yaamwiiraneya! Woonasa wene owo aanitikinihiwa moota Akhabi aarowa awe woonela itthu iye saakhumelela. Niireke Akhabi aamurukunuxa murima ni ottharuwa omukokhorela Bayali? Itthu saakhumelenle nihiku nne sanwerya omukhaliherya. Ekeekhai wira khannisuwela ele yaari mmuupuweleloni mwa Akhabi okathi ole. Biibiliya onihimya wira “Akhabi ahiwela ekaro awe, khuvenya arowaka wIzireyeli”. Niireke owo aahiixutta etthu? Niireke aahiphavela oturuka mweettelo awe? Nto itthu saakhumelenle ohoolo sinooniherya wira nnaari. Nihiku nle nlelo khinaamanle wa Akhabi hata Eliya.

17, 18. (a) Exeeni yaamukhumelenle Eliya mphironi orowaka wIzireyeli? (b) Exeeni eniiriha okhala mwiiriirya otthimaka wa Eliya okhuma oKarmelo mpakha wIzireyeli? (Nwehe-tho enoota.)

 17 Profeta ole a Yehova aahitthara ephiro yeeyo aavira awe Akhabi. Mukwaha ole waari woorakama, nave epula yaanirupa ni vaahiila. Masi yaahikhumelela etthu yootikiniha.

18 “Owerya w’Apwiya wahimurwela Eliya: owo ahìtthukelela muyununi, khutthyawa, amuholelaka Akhabi mpakha ophiya wIzireyeli”. (1 Mam. 18:46) Moohaaniherya, “Owerya” wa Yehova wahimwiiriha Eliya opaka itthu sootikiniha. Okhuma nipuro nle aaryaawe Eliya mpakha wIzireyeli saari ikiloomo 30 nave Eliya aari oowuuluvala. * Nto nkahaya muupuwele Eliya okuxaka nlaya nawe khiyatthukwelela muyuununi, wira oweryeke otthimaka, vano onavenyerya otthimaka ephiro ele yoosareya maasi, nto moowaakuveya khiyaphwanya ekaaro ya Akhabi ni onvikana!

19. (a) Ikuru ni owerya Eliya aavahiwe awe sinnuupuxerya eprofesia xeeni? (b) Okathi Eliya aatthimaka awe orowaka wIzireyeli, exeeni yuupuwela awe?

19 Tthiri Eliseyo aari mareeliho wa Eliya! Ophwanya owerya ni ikuru mwa mwiiriirya, woonasa wene ovikana okathi wa omiravo awe, tthiri waahimuhakalaliha vanceene Eliya. Pooti wira ninnuupuwela eprofesia ele enileiherya wira atthu oororomeleya anookhalana ekumi ni ikuru sinceene mParayiisu valaponi. (Mmusome Yesaya 35:6; Luka 23:43, NM) Okathi Eliya aatthimaka awe ephiro ele yoosarya maasi, owo aahoona wira aanikhaliheriwa ni Tiithi awe a wiirimu, Muluku a ekeekhai, Yehova!

20. Ninrowa waakhela sai mareeliho anikhuma wa Yehova?

20 Yehova onniphavela onireeliha vanceene. Mareeliho a Muluku tootepa oreera; nto nrowe nipake sotheene siniwerya ahu wira niphwanele waakhela. Ntoko Eliya, nihaana okhala oowehaweha, ovarerya saana itthu siniiraneya maana okathi ola onikhala ahu onooniherya wira Yehova onoopwetexa voohipisa elapo yootakhala. Moolikana ni Eliya, nookhalana mathowa manceene anniiriha ororomela sooleiherya sa Yehova yoowo ori Muluku ‘òroromeleya’.Esal. 31:6.

^ etti. 18 Nuumala-vo, Eliya aahipacerya omwiixuttiha Eliseyo, yoowo ohoolo waya aasuweliwa okhala ole “etta hothe ni profeta Eliya”. (2 Mam. 3:11) Eliseyo aari namakhaliherya a Eliya, woonasa wene omukhaliheryaka miteko sihaawerya awe maana aahuuluvala.