Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mutakiheke Waamini Waya

 MURU 2

Owo “Ètta Ephiro ya Muluku” Eekeekhai

Owo “Ètta Ephiro ya Muluku” Eekeekhai

1, 2. Nowe ni emusi awe aavara muteko xeeni, ni mixankiho xeeni saarina awe?

NNAMWI wuuluvanle ene, vano Nowe onnimananiha wookolola muthana ni mitika sawe. Nkahaya muupuwele Nowe okilaathale ene va munyukhuni wa mwiri, omananihaka omumula vakhaani, nave owehaka ekalawa ele yuulupale eniteka awe. Onniwerya woona wunkha wa alkatrau ni wiiweya oruma wa ikaruma sinivareliwa muteko wala wiikitthiwa ithaapwa. Waattamela opuro ori Nowe, annooneya-tho anaawe aluttuweliwe ene ni muteko wooteka ekalawa arumeelaka miri soovirikana. Anaawe, axaaraya ni amwaarawe Nowe otheene aya annivara muteko vamosa mwa iyaakha sinceene. Khareere ovara muteko, masi nlelo woohala muteko munceene onitthuneya ovariwa!

2 Atthu a muttetthe ole yawoona okhala alolo. Okathi wotheene Nowe ni anaawe yaateka aya ekalawa ele, yaanitheiwa ni atthu anceene okhala wira khiyaamini wira yaamurupa epula ya mutaaseke. Maana ehasara ele Nowe yaalaleya awe, tthiri yaari etthu yahaakupaliwa ni yooniwa wira khiyaarowa wiiraneya! Awo yuupuwela wira Nowe aayeeha mahala ene, okathi awe ni okathi wa emusi awe, ovaraka muteko wahaarowa okumiherya etthu. Masi, Muluku awe Nowe, Yehova, aamoona Nowe mwa enamuna ekina.

3. Enamuna xeeni Nowe eettale awe ni Muluku?

3 Nuulumo na Muluku nimhimya so: ‘Nowé ari mutthu òloka, èttela ephiro ya Muluku’ a ekeekhai. (Mmusome Maphattuwelo 6:9.) Eyo enitaphulela exeeni? Khentaphulela wira Muluku aarimoorwa oneetta valaponi wala khahiyo wira Nowe aarowa wiirimu weetta ni Muluku. Masi, vanitaphulela wira Nowe aanimwiiwelela ni omphenta vanceenexa Muluku, vanakhala ntoko yeettasa vamosa siisaale apatthani aneetta aya vamosa. Sivinre ene iyaakha sinceene, Biibiliya aahilavula sa Nowe wira: ‘Owo ahalamula atthu òtakhala’. (aHéb. 11:7) Aapanke sai eyo? Nniixutta exeeni voohimya sa waamini wawe?

Mutthu Oororomeleya Eriyari ya Atakhali

4, 5. Okathi wa Nowe, exeeni yaapahunle makhalelo a atthu?

4 Nowe annuwale elapo yootepa otakhala. Mahiku a taata awe, yoowo iitthaniwa Henoki mulopwana mukina a xariya eetta ni Muluku, okathi owo elapo yotheene yaahisareya atthu ootakhala. Henoki aahihimya vahinatthi wira wamphiya okathi waarowa aya opwetexiwa olumwenku ole wootakhala. Nto okathi wa Nowe, elapo yaari  yootepa otakhala. Tthiri, Yehova aanoona wira elapo yaahihononeya, okhala wira yaahisareya owali. (Maph. 5:22; 6:11; Yuda 14, 15) Exeeni yaakumihenrye makhalelo ale ootakhalexa?

5 Yaahikhumelela etthu yootakhala eriyari ya anamwane oomunepani, niire so, malaikha. Nlaikha nimosa naahimurukunuwela Yehova khukhala Satana Diabo nto khunwoka Adamu ni Eva opaka etampi. Nave okathi wa Nowe, malaikha makina yaahipacerya-tho ommwareela Yehova. Awo yaahihiya ovara muteko yaavahiwe aya ni Muluku, khurwa valaponi, khiikhaliha ntoko apinaatamu vano khwaathela axithiyana ooreera. Nto malaikha ale owiixinnuwiha, oomwareya ni oowiitthuna yaahipacerya waapahula apinaatamu valaponi.Maph. 6:1, 2; Yuda 6, 7.

6. Manefili wala atthu a ikuru yaakumihenrye mukhalelo xeeni valaponi, nto Yehova aalakenle opaka exeeni?

6 Tthiri, anamwane yaayariwa ni athiyana yaatheliwe ni malaikha ale yaikhalinhe apinaatamu, yaari oovirikana ni atthu akina yaayariwa okathi ole mwaha woowi yaari aikuruxa, ni oorakamexa. Biibiliya onnahimya anamwane awo okhala manefili, aahiiso, “atthu a ikuru” yaawo yaawerya ommoroxa khula mutthu yamphwanya aya. Manefili waanasivela owana, nto yahuulaanyiha mulaponi motheene owali ni otakhala. Tivonto vahintikinihiwa ahu naiwaka moonelo wa mPattuxa yoowo oni: “atthu yavira etepaka otakhala murima, mùpuwelo aya wothene n’otthuna waya wari opaka sonanara mahiku othene”. Tthiri Yehova aahilakela wira aarowa waamalamaliha atakhali ale muhina mwa iyaakha 120.Musome Maphattuwelo 6:3-5.

7. Muxankiho xeeni aawanana awe Nowe ni amwaarawe wira anaaya ahipahuliwe ni mweettelo wa atthu a mahiku ale?

7 Nkahaya mmananihe wuupuwelela moota saryaaya voovila mutthu okhalana etthoko yooloka mahiku ale! Masi Nowe aahiwerya opaka eyo. Owo aahimuthanla muthiyana ooloka, khumuthela. Nuumala  Nowe ophiyeriha iyaakha 500, amwaarawe yaahaayara anamwane araru, Semi,Khami ni Yafeti. * Nowe ni amwaarawe yaahaana waakhapelela anaaya ale wira ahipahuliwe ni atthu ootakhala yaakhala mahiku ale. Okhala wene amiravo waasivela waaweha atthu a “ikuru” ni ‘ovuwa’, nto Manefili vanaasivela wooniherya itthu iyo. Tthiri, Nowe ni amwaarawe khiyaarowa owerya waakhoottiherya anamwane ale wiiwa wala woona itthu saapaka aya Manefili ale, masi awo yanwerya owiixuttiha ekeekhai voohimya sa Yehova Muluku, yoowo aanyokha itthu iye sotheene sootakhala. Awo yaahaana waaxuttiha anaaya ale wira itthu iye sootakhala saapakiwa valaponi saanimunanara Yehova.Maph. 6:6.

Nowe ni amwaarawe yaahaana waakhapelela anaaya wira ahipahuliwe ni atthu a mahiku ale

8. Mwa enamuna xeeni anamuyari olelo-va akhanle aya oomutakiha Nowe ni amwaarawe?

8 Tthiri anamuyari olelo-va anniwanana mixankiho simosaru seiye samphwannye Nowe ni amwaarawe. Mahiku ala, elapo yoosareya owali ni omwareeliwa Muluku. Sookhala ipooma siryaaya amiravo olavilavi ni oohiwananeya. Hata itthu sinipakiwa wira sithweelihiweke ni anamwane, sinniwiixuttiha owali. Anamuyari animwiira saana akhala wira anoomananiha waakhapelela anaaya wira ahiixutte itthu iyo, yaasomihaka myaha sinimulavula Muluku a murettele, yoowo onirowa omaliha itthu sotheene sa owali. (Esal. 11:5; 37:10, 11) Vanniweryaneya okhumela saana! Nowe ni amwaarawe yaahiwerya okhumela saana. Anaaya ale yaahinnuwa khukhala axilopwana ooloka, khwaathela axaaraya yeemererya opweha nipuro noopacerya omwiiwelela Yehova.

“Mpake Ekalaw’anyu”

9, 10. (a) Yooruma xeeni ya Yehova yaaturunke ekumi ya Nowe? (b) Yehova aahimyale exeeni wa Nowe sa moota woopaka ni yoolakela ya ekalawa?

9 Nihiku nimosa, yaahikumelela etthu yaaturunke moomalela ekumi ya Nowe. Yehova aahilavulana murumeyi awe ole amphenta awe, khumuhimeerya wira aahilakela opwetexa olumwenku ole wootakhala wa mahiku ale. Nto Muluku aahimuruma Nowe wira: “Mpake ekalaw’anyu yulupale ya mattoro”.Maph. 6:14.

10 Ekalawa ele khiyaalikana ni ikalawa sa mahiku ala, ntoko anamunceene sinuupuwela aya. Eyo khiyaarina makhalelo a ekalawa pure. Etthu emosa yaalikana aya, waari owerya waya weettaka vasulu va maasi. Yehova aahimuleela Nowe itthu kamosa-kamosa: munnuwelo, moota woopaka, vamosa ni malakiheryo a moota woomuhela alkatrau ota ni mpuwa. Owo aahimuhimeerya Nowe wira: “Miyo kinkela orupiha epula ya mutáseke, yeyo enrowa opwetexa vathí-va . . . sothene siri mulaponi-mu sinomala”. Masi Yehova aahimulaiherya, wala opaka nivarihano ni Nowe oriki: “Munrowa okela mukalawani nyuwo vamosa  n’an’inyu ni mwar’inyu n’axar’aya an’inyu”. Nave Nowe, aahaana oroiha mukalawani khula muthinto wa axinama. Maana sotheene saarowa okhala ota wa ekalawa, sampwetexiwa!Maph. 6:17-20.

Nowe ni emusi awe yaanivara muteko mowiiraana wira yiiwelele sooruma sa Muluku

11, 12. Muteko xeeni muulupalexa aavahiwe awe Nowe, nto oonenle sai?

11 Nowe aahivahiwa muteko muulupalexa wira ovare. Ekalawa ele yaahaana okhalana imeeturu 133 sa irakamelo saya, 22 sa munnuwelo aya, ni 13 okhuma vathi mpakha osulu. Eyo yaari yuulupale ovikana ikalawa sa ethaapwa sinipakiwa mahiku ala. Nto niireke Nowe aahooceela ovara muteko ole, wala aanikhupanyerya mwaha wa mixankiho ni ovila waya, wala oturuka ipakeliwo saya wira ekhale yookhweya opaka? Biibiliya onaakhula so: ‘Nowé ahira sothene sarummwawe ni Muluku’.Maph. 6:22.

12 Muteko ole waahivariwa muhina mwa iyaakha sinceene, woonasa wene iyaakha 40 wala 50. Waahikhala muteko munceene ntoko wiikittha miri, oreeriha opuro ole, oparula ithaapwa, owaka ni okhomela ithaapwa. Ekalawa ele yaahaana okhalana andaari araru, ikwaartu sinceene ni mukhora mmosa. Owehasa wene saahikhala ixanela waattamela osulu, epatho ni niphiro naamukhaani wira maasi ahivoloweke mukalawani.Maph. 6:14-16.

13. Muteko xeeni mukina wootepa ovila waarina awe Nowe waavikana oteka ekalawa, nto atthu yoonela sai?

13 Okathi waanivira ni muteko wooteka ekalawa ele waneetta, enapacerya wooneya etthu ene yaapakiwa; vohaaniherya Nowe aanixukhurela vanceene nikhaliheryo na emusi awe! Masi waahikhala muteko mukina woonasa wene wootepa ovila ovikana oteka ekalawa. Biibiliya onihimya wira Nowe aari mutthu “alaleya exariya”. (Mmusome 2 Pedru 2:5.) Tthiri moolipa murima Nowe aari namahoolela a muteko wa omananiha waalopola atthu ale yaari ootakhala murima, wira voohipisa elapo ele yaarowa opwetexiwa. Niireke atthu yaahiiwelela olaleya wa Nowe? Muhoolo mwaya Yesu uupuwelaka okathi ole, aahimyale wira atthu ale ‘khiyaiwelenle’. Owo aahimyale wira atthu ale yaanivikaniha ovara miteko saya sa khula nihiku, ntoko olya, owurya, othelana, ni khiyaarina okathi wa wiiwelela olopola wa Nowe. (Math. 24:37-39) Tthiri anamunceene yaanimutheya Nowe ni emusi awe; akina yaanimunyohola, onvaanyiha mwa enamuna ya owali. Woonasa wene, akina yahimanananiha onyaanya wala waakhulumula atthu yaateka ekalawa ele.

Nnaamwi atthu ale yaaweha wira Muluku aanimukhaliherya Nowe, awo yaanivikaniha omutheya ni ohiiwelela olaleya wa Nowe

14. MaKristau aniixutta exeeni sa waamini wa Nowe ni emusi awe?

14 Hata vari siiso, Nowe ni emusi awe khiyaatonko wooceela ovara muteko ole. Nnaamwi awo yaakhala elapo yooniwa aya okhala alolo, atthu oohisuwela etthu, awo yaahivikaniha okhala oororomeleya. Imusi sa maKristau olelo-va, sinoowerya wiixutta itthu sinceene voohimya sa waamini wa Nowe ni emusi awe. Tthiri hiyo ninkhala okathi  yoole Biibiliya onihimya awe okhala “okathi wokiserya” wa olumwenku ola wootakhala. (2 Tim. 3:1) Yesu aahihimya wira mahiku ahu yaarowa olikanaka ni mahiku a Nowe. Vakhala wira atthu annikhootta wiiwelela ehapari ya Omwene wa Muluku, oninyohola wala onilupattha, hiyo nikhanle maKristau nihaana omuupuwelaka Nowe. Tthiri khahiyo nnoopacerya owanana mixankiho iyo.

“Mukelé Mukalawani”

15. Muxankiho xeeni waamukhumelenle Nowe ohalaka vakhaani ophiyeriha iyaakha 600?

15 Nuuvira iyaakha sinceene, muteko wooteka ekalawa waahimalihiwa. Ohalaka vakhaani Nowe ophiyeriha iyaakha 600, aahipweteiwa amusi awe. Tiithi awe, Lameki, aahikhwa. * Nuuvira iyaakha thanu, aahikhwa taata awe Nowe, Metuxela, paapa awe Lameki, aakhwiiye orineene iyaakha 969, tivonto vanihimmwa awe okhala mutthu aarina iyaakha sinceene waavikana atthu otheene aniromoliwa mBiibiliyani. (Maph. 5:27) Atthu ala anli Metuxela ni Lameki, yaahikhala okathi omosaru ni mulopwana oopacerya, Adamu.

16, 17. (a) Muhupi xeeni mukina Nowe aakhenle awe orineene iyaakha 600? (b) Etthu xeeni yoohiliyaleya Nowe ni emusi awe yoonale aya?

16 Nto orineene iyaakha 600, muhavinre Nowe aahaakhela muhupi mukina waakhuma wa Yehova Muluku wira: “Mukelé mukalawani vamosá n’atthu othene a vatthokoni vanyu”. Nave aahirummwa wira aahaana  okeliha mukalawani khula muxovo wa inama, okuxaka thanu na piili inama iye sihirina mwiikho, saareerela opahiwa mukuttho, nto sikina aahaana okuxa piili-piili.Maph. 7:1-3.

17 Tthiri waari okathi woohiliyaleya. Nto inama sinceene saahirwa, sikina seettaka, sivavaka, wiipurula; suulupale ni saamukhaani, niire so, saari sa makhalelo oovirikana. Tthiri waari muteko muulupale Nowe omananihaka otthokiha inama, ohelaka khula enama nipuro naya, ni waavya opuro wooreerela okhala khula enama mukalawani. Biibiliya onihimya wira inama, “sahikela mukalawani vamosá ni Nowé”.Maph. 7:9.

18, 19. (a) Niwaakhuleke sai ale anivaanyiha ele yiiraneyale mahiku a Nowe? (b) Anooneya sai ankhili a Yehova mwa enamuna yaathanlale awe ohipwetexa inama sipattuxale awe?

18 Atthu anivaanyiha pooti okohaka so: ‘Vaniweryaneya sai wiiraneya etthu moota owo? Vaniweryaneya sai inama sinceene owerya okhala ni murettele opuro omosaru?’ Nkahaya muupuwelo so: Niireke munoona wira Muluku khorina owerya wa weettiherya khula etthu eri valaponi ohela muhina inama, hata wiiriha okhalaka ni murettele? Muupuweleke wira, Yehova ti Muluku opattunxe inama sotheene. Muhoolo mwaya, Yehova aahikawanya Ephareya Yooxeerya ni aahiiriha nsuwa weemela. Nto khamunoona wira anwerya opaka khula etthu enihimmwa wira yaahikhumelela okathi wa Nowe? Owo onniwerya ni aahipaka tthiri!

19 Ekeekhai wira Muluku anwerya woopola inama iya mwa enamuna ekina. Masi mwa miruku, owo aahipaka eyo mwa enamuna ennuupuxerya wira wanipacerya aahaavaha apinaatamu muritti wa okhapelela itthu sotheene sikumi saakhala valaponi. (Maph. 1:28) Anamuyari anceene annirumeela yowiiraneya ya Nowe wira yaaxuttihe anaaya avahaka efaita inama ni atthu apattuxiwe ni Yehova.

20. Muteko xeeni aarina awe Nowe ni emusi awe esumana yookiserya ohinatthi opaceerya Mutaaseke?

20 Yehova aamuhimeeryale Nowe ehalaka esumana emosa wira orwe Mutaaseke. Tthiri ole waari okathi emusi ele yaatteliwe aya muteko.  Nkahaya muupuwele muteko waavarale aya wira aroihe inama sotheene mukalawani ohela muhina yoolya ya inama ni ya emusi yotheene, ni mireerelo saya sotheene. Woonasa wene, Nowe ni amwaarawe ni axaaraya Semi, Khami, Yafeti, yaanixankiheya mwaha woohisuwela enamuna yaarowa aya okhalaka mukalawani.

21, 22. (a) Xeeni vahimvila aya weemya wira tthiri atthu khiyaaphavela wiiwa olopola wa Nowe? (b) Okathi xeeni atthu ale yaamutheya Nowe ni emusi awe waahiyale aya omutheya?

21 Ankhi atthu akina okathi ole exeeni yaapaka aya? Awo “khiyànyiherya etthu”, hata yoonaka wira Yehova aanimureeliha Nowe mwaha wa wiimananiha wawe. Khiivo yaapaka aya, yaamweemela paahi, khiyaweha inama sikelihiwaka mukalawani. Masi eyo khennitutuxa okhala wira anamunceene anaalaleerya ahu khaniphavela wiiwa. Atthu a mahiku ala khaniphavela wiiwelela hata yoonaka wira ninkhala mahiku ookiserya a olumwenku ola. Ntoko saahimyale awe murummwa Pedru, anamavaanyiha anookhumelela wira yaatheyeke ni waanyohola ale animwiiwelela Muluku. (Mmusome 2 Pedru 3:3-6.) Vamosaru, atthu ale yaanimutheya Nowe ni emusi awe.

22 Okathi xeeni waahiyale aya otheya anamavaanyiha a Nowe? Biibiliya onihimya wira nuumala Nowe oroiha inama ni emusi awe mukalawani, Yehova ‘ahitthuka mukhora ottuli wa Nowé’. Akhala wira atthu ale yavaanyiha yahaattamela opuro ole, nuumala woona mukhora owaleyaka, moohaaniherya yaahihiya otheya. Nto akhala wira nlelo khiyaahiiye otheya, tthiri yaahimaala, okathi waapacenrye aya orupa epula ya Mutaaseke! Epula ele yaahipacerya orupa vakhaani-vakhaani, nto khuncerereya, khutepa mpakha osarya elapo yotheene, ntoko Yehova aahimyale awe.Maph. 7:16-21.

23. (a) Exeeni enooniherya wira Yehova khaasiveliwe ni okhwa wa atakhali okathi wa Nowe? (b) Xeeni varyaaya wa miruku otakiha waamini wa Nowe?

23 Niireke Yehova aahisiveliwa okhwa wa atthu ale ootakhala? Nnaari! (Ezek. 33:11) Owo aahaavaha atthu ale okathi munceene wira arukunuxe muupuwelo aya. Niireke yanwerya opaka eyo? Mweettelo wa Nowe ni emusi awe onnaakhula nikoho nlo. Mwaha wa weetta wawe ni Yehova, omwiiwelela wawe Muluku moomalela, Nowe aahooniherya wira vaaniweryaneya woopoliwa atthu. Tivo vanihimmwa aya wira owo aahiphukela olumwenku wa okathi ole, okhala wira mweettelo awe waanooniherya wira vaaniweryaneya opaka itthu soohiloka. Mwaha wowaamini, owo ni emusi awe yaahoopowa. Nto akhala wira munootakiha waamini wa Nowe, nyuwo nave munoowerya woopola ekumi anyu ni ya ale anaaphenta anyu. Moolikana ni Nowe, munoowerya weetta ni Yehova Muluku, ntoko siisaale mutthu sineetta awe ni mpatthani awe. Nto opatthani owo onrowa okhala woohimala!

^ etti. 7 Mahiku ale, atthu yaaniwerya okhala iyaakha sinceenexa onivikana hiyo. Owerya waya okhala okathi munceene mwaha woowi awo yaayariwe waattamela okathi waakhala aya atthu oomalela Adamu ni Eva, nnaamwi awo yaapweteiwale makhalelo awo ooloka.

^ etti. 15 Lameki aahinvaha mwanawe nsina na Nowe, woonasa wene naataphulela “okurunuxa murima” wala “Nimaaliho”, ni aahihimya vahinatthi wira Nowe aarowa opaka itthu saavarihana ni nsina nawe okhala wira aahaakhaliherya atthu okurunuxa murima mwaha wa etthaya yaatakhalihiwe. (Maph. 5:28, 29) Lameki khaawenrye woona waakhwanela wa eprofesiya awe. Woonasa wene ameyawe, axihima awe ni axirokorawe Nowe yaahikhwa okathi wa Mutaaseke.