Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mutakiheke Waamini Waya

 MURU 7

Owo ‘Aninnuwa Vamaithoni va Yehova’

Owo ‘Aninnuwa Vamaithoni va Yehova’

1, 2. Etthu xeeni yiiraneyale yaamwiiriha Samuweli olavula ni aIsarayeli, nto xeeni vaatthuneya aya owiiriha ottharuwa mweettelo ole woohiloka?

SAMUWELI aaweha atthu a nloko nawe. Nloko nle naahirwa muttetthe wa oGiligali, khothukumana ni mulopwana owo owaamini, profeta, ni mulipa oophuka iyaakha sinceene. Woonasa wene ole waari mweeri wa Maio wala Junyo wa kalendaario a mahiku ahu ala; nto elimwe yiira epacenrye. Imatta sa muttetthe ole sahittokottha etrigu ni waahiphiya okathi woohepha. Muttitthi ole wa atthu waahimaala wira owiriyane. Vano Samuweli aarowa owerya sai ovara murima wa atthu ale?

2 Atthu ale khiyaawerya woona wira yaahaavo etthu yahaalokale. Awo yaathipelela oveka wira avahiwe mwene pinaatamu wira aalamuleleke. Awo khiyaasuwela wira ele yaavekela aya waari onveeha Muluku aya, Yehova ni profeta awe. Tthiri oveka waya wooniherya omuthanya Yehova, aari Mwene aya! Niireke Samuweli anwerya owiiriha ottharuwa mweettelo ole woohiloka?

Omiravo wa Samuweli onoowerya oniixuttiha itthu sinceene voohimya sa okhalana waamini wooloka hata nikhalaka nipuro nimpakiwa itthu sootakhala

3, 4. (a) Xeeni Samuweli aalavula awe sa omiravo awe? (b) Xeeni ntakiheryo na Samuweli niri aya noovareleya muteko olelo-va?

3 Samuweli aalavunle so: “Miyo kihuluvala, komela ipwí”. Moolumo oowi koomela ipwi yaahiiriha masu awe okhalana efaita yuulupale. Owo aahihimya-tho wira: “Ti miyo kiwettihenryeni okhuma omiravo aka mpakha olelo va”. (1 Sam. 11:14, 15; 12:2) Nnaamwi vano Samuweli uuluvanle, owo khaaliyanle omiravo awe. Owo aanuupuwela itthu sotheene saamukhumelenle onari mmiravo. Soothanla saapanke awe okathi ole waari awe mmiravo, saahimukhaliherya okhala oororomeleya wa Yehova Muluku.

4 Samuweli aahikhalana waamini wooloka, khula okathi aahaana olipiha waamini wawe okhala wira aakhala eriyari ya atthu ohaamini. Olelo-va, ti voovila okhalana waamini wooloka, mwaha wookhalaka olumwenku wa atthu oohaamini ni ootakhala. (Mmusome Luka 18:8.) Nrowe niwehe ele ekhanle ahu oowiixuttihiwa ni Samuweli okhuma enamwane awe.

 “Anari Mmiravo, Anirumela Onamukuttho Oholo w’Apwiya”

5, 6. Moota xeeni onamwane wa Samuweli waari awe woovirikana ni anamwane akina, nto exeeni yaawiirinhe anamuyari awe waamini wira aarowa okhapeleliwa saana?

5 Onamwane wa Samuweli waari woovirikana ni anamwane akina. Omalakaru ohiihiwa waamwa, woonasa wene orineene iyaakha 3 wala ovikana, owo aahipacerya ovara miteko sa otabernaakulu wa Yehova oSilo, nipuro na ikiloomo 30 okhuma oRamá. Anamuyari awe, Elikana ni Ana, yaahinvaha mwanaya ole wira onvareleke Yehova muteko a vameekha aya, yoowo waamwiirinhe okhala muNaziri. * Niireke eyo yaataphulela wira Samuweli aarorihiwa ni anamuyari awe mwaha wa ohimphenta?

6 Nnaari! Awo yaanisuwela wira mwanaya aarowa okhapeleliwa saana oSilo. Eli, muulupale aalipa a mukuttho, taahoolela muteko wa anamukuttho, tivonto Samuweli aavara muteko vamosa ni Eli. Nave yaahikhala athiyana anceene yaarumeela otabernaakulu mwa enamuna yootthokiheya.Okhum. 38:8; Mak. 11:34-40.

7, 8. (a) Anamuyari awe Samuweli yaamulipiha sai? (b) Olelo-va etthu xeeni anamuyari ekhanle aya oowiixutta sa anamuyari awe Samuweli?

7 Ohiya-vo, Ana ni Elikana khiyaamuliyanle mwanaya oopacerya, yoowo oyariwa wawe waari mwaha wa waakhuliwa mavekelo yaapakiwe ni Ana. Ana anvekenle Muluku wira onvahe mwaana, nto khummana natiri wira amuyara mulopwana aarowa onvaha Muluku wira ovareke miteko sawe. Khula mwaakha okathi Ana aamuxekurya awe Samuweli, aanimuruuhela nlaya nsya nenno naapaka awe wira Samuweli owareleke muteko otabernaakulu. Voohaniherya Samuweli waanimusivela oxekuriwa ni maama awe. Tthiri owo aanisiveliwa niphento ni olipihiwa ni anamuyari awe, ni olakiheriwa wira oone, wira omurumeela Yehova nipuro nle, yaari eparakha yuulupale.

8 Anamuyari olelo-va anoowerya wiixutta itthu sinceene sa Ana ni Elikana. Ikwaha sinceene anamuyari anceene anaakhapelela anaaya yaavahaka itthu sa werutthuni paahi, khiyahiya okhapelela omunepani waya. Masi anamuyari awe Samuweli yaahikhalela nthiti itthu soomunepani, nto eyo yaahooneya okathi Samuweli annuwale awe khukhala mutthu a saana.Musome Miruku 22:6.

9, 10. (a) Etebernaakulu yaari sai, nto Samuweli oonela sai nipuro nle noowaarya. (Nwehe-tho enoota.) (b) Muteko xeeni Samuweli aavara awe onari mmiravo, nto amiravo a mahiku ala anrowa omutakiha sai?

9 Vano nkahaya muupuwele okathi Samuweli annuwa awe onapacerya osuwela saana muttetthe wa miyaako sa oSilo. Oryeene osulu owehaka vathi, murima wanimutteela, ni aaniittha iphumu, vaavo aaweha  awe muttetthe wa otabernaakulu a Yehova. Tthiri otabernaakulu waari opuro woowaarya. * Okathi ole saahivira iyaakha 400 nuumala otekiwa tabernaakulu ole atthariheliwaka malakiheryo a Moise, valaponi ole ti waari opuro waakokhoreliwa Yehova.

10 Okathi Samuweli ainuwa awe vaanimusivela okhala otabernaakulu. Masu yaalempe awe, hiyo nnisoma so: “Vano Samuweli, anari mmiravo, anirumela onamukuttho oholo w’Apwiya, awaraka nlaya n’elinyu”. (1 Sam. 2:18) Nlaya niromoliwe-va nnooniherya wira Samuweli aanaakhaliherya anamukuttho miteko sa tabernaakulu. Nnaamwi nlelo ahaakhanle namukuttho, Samuweli aanivara miteko ntoko ohula mikhora sa nivate na tabernaakulu khula vaasiisu ni omukhaliherya Eli yoowo aari oowuuluvala. Nnaamwi muteko otabernaakulu waamusivela Samuweli, ehaavo etthu yaaxankiha murima woororomeleya wa Samuweli. Tthiri ehaavo etthu yootakhala yaapakiwa mpaani mwa Yehova.

Aahivikaniha Okhala Ooloka Omunepani Nnaamwi Aakhala Nipuro Noohiloka

11, 12. (a) Mweettelo xeeni woohiloka aarina awe Hoofini ni Pineha? (b) Itthu xeeni soohiloka saapakale aya Hoofini ni Pineha otabernaakulu? (Nwehe-tho enoota.)

11 Nlelo onari mukhaani, Samuweli aahoona itthu sootakhala saapakiwa ni atthu oohiloka. Eli aahikhalana anaawe anli, yaawo yiireliwa Hoofini ni Pineha. Masu a Samuweli anihimya so: “Ana Èli yari òtakhala murima, khiyàthokorerya Apwiya”. (1 Sam. 2:12) Moolumo ala manli anoottharana. Hoofini ni Pineha yaari “òtakhala murima”; nuulumo nla nimmuhimya “mutthu ohinifai”, tivonto yahaamuthokorerya aya saana Yehova. Awo khiyaavaha efaita malakiheryo ni sooruma sa xariya sa Yehova. Mwaha wa ohifai waya, awo yaahipacerya opaka itampi sikina.

12 Nlamulo na Muluku naanihimya saana enamuna anamukuttho yaarowa aya ovaraka miteko saya soovaha mukuttho mutabernaakulu. Yaahikhala mathowa yiirihale ovahiwa malamulo awo! Mikuttho saathoonyerya itthu seiye Muluku saarowa awe opaka wira olevelele itampi, wira atthu akhalane wataana wooloka ni  yena, ni okhala ooreerela waakhela mareeliho ni malakiheryo awe. Masi Hoofini ni Pineha yahaawoka anamukuttho akina anapacerya ohittittimiha mikuttho saavahiwa Yehova. *

13, 14. (a) Moota xeeni atthu a saana yaahaawa aya mwaha wa itthu sootakhala saapakiwa otabernaakulu? (b) Moota xeeni Eli ahaawenrye awe ovara saana muteko awe ntoko tiithi ni muulupale aanamukuttho?

13 Nkahaya muupuwele okathi Samuweli aawoona awe atthu ale yaapaka itthu soohiloka ohoolo wawe. Tthiri aanaaweha atthu anceene: oothoiwa, oowiiyeviha, yahooneliwa vatthu, arwaaka otabernaakulu oowaarya aphavelaka olipihiwa omunepani; masi atthu ale yaatthika murima aya waaripale, mwaha wooveihiwa ni opuheriwa! Nkahaya muupuwele moota Samuweli saarya awe, okathi aasuwenle awe wira Hoofini ni Pineha yaanitthekela malamulo a Yehova, voohimya sa orupihana woohiloka, mwaha wowaararuxa athiyana yaavara muteko otabernaakulu! (1 Sam. 2:22) Woonasa wene Samuweli aaniroromela wira Eli ampaka etthu wira anaawe attharuwe.

Woonasa wene Samuweli aahixankiheya vaavo aawoona awe anaawe Eli apakaka itthu sootakhala

14 Eli aahikhalana owerya woophuka ni omala-maliha mweettelo ole woohiloka. Okhala wira owo taari Mukhulupale aanamukuttho, nto taarina muritti wa olokiherya khula etthu yaakhumelela otabernaakulu. Ntoko tiithi, owo aahaana waapwapwela anaawe. Maana anaawe Eli yaanikumiherya maxakha wa awosa ni wa atthu anceene elapo ele. Masi, Eli khaawenrye ovara saana muteko awe ntoko tiithi ni muulupale aanamukuttho. Owo aaleeliha ntoko othweela. (Mmusome 1 Samuweli 2:23-25.) Masi anamwane ale yaatthuneya opwapweliwa ni ovahiwa yoolaka yuulupale. Itampi saapakale aya yaaphwanela wiiviwa!

15. Ihapari xeeni Yehova aamuroihenle awe Eli, nto emusi awe yoonenle sai yoolopola ele?

15 Mulattu ole waari muulupale mpakha Yehova omuruma “mutthu a Muluku”, woonasa wene profeta, ohinromoliwa nsina nawe, wira amuleele Eli ihapari sa olamula wa Yehova. Wa Eli, Yehova aahimyale so: ‘Xeeni mwattittimihaka vanjene an’inyu okivikana miyo?’ Muluku aahihimya wira aana ootakhala a Eli, yaarowa wiiviwa nihiku nimosa, nave emusi yotheene ya Eli yaarowa ohaawa vanceene, ni opweteiwa eparakha ya okhala namukuttho. Niireke yoolopola ele yaahikumiherya marukunuxo etthoko ele? Biibiliya khonihimya wira awo yaahirukunuxa mirima saya.1 Sam. 2:27–3:1.

16. (a) Etthu xeeni enisoma ahu mBiibiliyani voohimya sa winnuwa wa Samuweli? (b) Murima anyu onikhala sai osoma itthu iyo sotheene? Mutthokiherye.

16 Samuweli oonela sai itthu iye sotheene soohiloka saapakiwa? Eriyari ya itthu iyo soohiloka, ikwaha sikina ninniphwanya itthu  sooloka, ihapari sooreera voohimya sa wunnuwa ni orowa vahoolo wa Samuweli. Munnuupuwela masu ari va 1 Samuweli 2:18, yaawo onihimya wira Samuweli “anari mmiravo, anirumela onamukuttho oholo w’Apwiya”. Nlelo oryeene mmiravo, Samuweli aanikhalela nthiti miteko sa Muluku. Eversu 21 ya ekapitulu emosaru, hiyo ninnisoma masu ala oovara murima ani: “Vano mmiravo Samuweli ira annuwaka va maithoni v’Apwiya”. Okathi ainuwa awe, wataana wawe ni Tiithi awe a wiirimu waanitepa olipa. Wiiraana iwo wooloka wa Samuweli ni Yehova ti waamukhalihenrye okhootta khula etthu yoohiloka yaapakiwa mutabernaakulu.

17, 18. (a) Amiravo maKristau animutakiha sai Samuweli okathi anoona aya itthu sootakhala siiriwaka? (b) Exeeni enooniherya wira Samuweli aahithanla okhala mutthu ooloka?

17 Vaarowa okhala vookhweya wa Samuweli wuupuwela wira akhala wira namukuttho muulupale ni anaawe annipaka itampi nto nuuwo aahaana opaka etthu emosaru, khuta etthu yaamusivela. Masi otakhala murima wa atthu akina, waahela mpuwa ale akhanle amahoolela, ohiniirihe hiyo ophavela opaka itthu sa etampi. Olelo-va amiravo anceene maKristau annitthara ntakiheryo na Samuweli ni ‘anninnuwa vamaitho va Yehova’, hata atthu akina apakaka itthu soohiloka.

18 Moota xeeni mweettelo ole waamukhalihenrye aya Samuweli? Hiyo ninsoma so: “Vano mmiravo Samuweli aninnuwa mwerutthuni n’orera wawe, Apwiya yanisiveliwa ni owo, nave-tho atthu yanisiveliwa ni yowo”. (1 Sam. 2:26) Nto ninnoona wira atthu a murima saana yaanimoona Samuweli okhala mutthu ooloka. Yehova mwaneene aahisiveliwa ni mmiravo ole mwaha wa mweettelo awe woororomeleya. Moohaaniherya Samuweli aanisuwela wira Muluku awe aarowa opaka etthu wira omalihe itthu iye sootakhala saapakiwa oSilo, masi owo khaasuwela nihiku saarowa aya wiiraneya. Ohiyu omosa, Samuweli ahaakhuliwa makoho awe.

 “Mulavuleke, Apwiya! Murumeyi Anyu Onnowiriyanani!”

19, 20. (a) Mutthokiherye etthu yaamukhumelenle Samuweli ohiyu omosa otabernaakulu. (b) Samuweli aasuwenle sai opuro waakhuma aya masu ale, ni aamuthokorenrye sai Eli?

19 Waari vaasiisu masi nlelo variipale ene; muthuko muulupale wa muheemani nlelo wiira ovarelaka. Nlelo varyeene voomaaleleya, Samuweli aaniiwa nsu niitthanaka nsina nawe. Owo uupuwela wira iitthaniwa ni Eli, yoowo aari oowuuluvala ni ahaawerya woona saana. Nto Samuweli aahivenya anatthimaka orowaka waari Eli. Nkahaya muupuwele, Samuweli atthimakaka ahiwanre ixapattho wira amukohe Eli etthu yaaphavela awe? Tthiri ti vookuxa murima osuwela wira Samuweli aahivikaniha omuttittimiha ni omureerela murima Eli. Nnaamwi Eli aarina itampi sinceene, nlelo aari muulupale aanamukuttho a Yehova.1 Sam. 3:2-5.

20 Samuweli aahinvenxa Eli vaarupa awe khwiira: “Miyo kiri va: mukìhanenle-ní?” Masi Eli aahimuhimeerya Samuweli wira khaamwitthanne nto khomwiirela otthikela orupa. Masi etthu emosaru ele yaahiiraneya ikwaha sinceene! Nto wuukiseryani waya Eli aahisuwela etthu yiiraneya. Okathi ole Yehova aahihiya olavula ni atthu awe orumeelaka sowoonihiwa wala maprofeta, nto khivanivila osuwela nthowa naya. Nto, Eli onnoona wira Yehova ootthikela-tho olavula, masi vano, orweela wa mmiravo Samuweli! Eli aahimuhimeerya Samuweli wira arupeke nave khumulakiherya enamuna yowaakhula saana. Samuweli aahiiwelela. Voohipisa aahiiwa nsu nriki: “Samuweli, Samuweli”. Mmiravo aahaakhula oriki: “Mulavuleke, Apwiya, murumeyi anyu onnowiriyanani!”1 Sam. 3:1, 5-10.

21. Vaniweryaneya sai olelo wiiwa nsu na Yehova, nto xeeni varyaaya vootthuneya wiiwelela?

21 Tthiri vanonto Yehova aahikhalana murumeyi awe oSilo aawiriyana. Okhuma vaavale Samuweli aanimwiiwelela Yehova. Niireke nyuwo munnimwiiwelela Yehova? Ekeekhai wira khanniwehererya wiiwa nsu na mwiiriirya nilavulaka ni hiyo ohiyu. Masi olelo-va vanniweryaneya wiiwa nsu na Yehova khula okathi. Nsu nawe, nri mBiibiliyani. Vaavo vanitepa ahu omwiiwelela Yehova, nto waamini wahu onrowa otepaka olipa. Eyo ti etthu yiiraneyale wa Samuweli.

Nnaamwi aari mutthu oowoova, Samuweli moororomeleya aahimuleela Eli ihapari sa olamula wa Yehova

22, 23. (a) Ihapari saahimmwale ni Samuweli wuupaceryani, siiraneyale sai? (b) Exeeni yiiriha nsina na Samuweli otepa wunnuwa vooreera?

22 Ohiyu ole yaahikhumelela etthu yoohiliyaleya okumi wotheene wa Samuweli, maana taapacenrye awe omusuwela saana Yehova, khukhala profeta ni namitthaka a Muluku. Wanipacerya Samuweli aanoova omuleela Eli ihapari sa Yehova, maana ihapari iyo saari sookiserya, okhala wira ehasara yaahimmwale ni eprofesia yaarowa wiiraneya voohipisa wa emusi ele. Masi Samuweli aahilipa murima khurowa omuleela, nto Eli voowiiyeviha aaheemya olamula wa Muluku. Voohipisa, itthu  sotheene saalavunle awe Yehova saahikhumelela, aIsarayeli yaahirowa owana ni aFilisti, Hoofini ni Pineha, yaahiiviwa nihiku nenle; Eli aahikhwa okathi aaleeliwe awe wira Nivuku noowaarya na Yehova naahikuxiwa.1 Sam. 3:10-18; 4:1-18.

23 Masi, nsina na Samuweli ntoko profeta oororomeleya naamutepa wunnuwa vooreera. Okhala wira “Apwiya yari n’uwo, khumaleliha molumo othene yahimmyaya”.Mmusome 1 Samuweli 3:19.

‘Samuweli Aahinvekela Yehova’

24. Nuuvira okathi, yoothanla xeeni aIsarayeli yaapanke aya, ni nthowa xeeni yaaryaaya etampi yuulupale?

24 Niireke atthu ale yaahitthara ntakiheryo na Samuweli na okhala oororomeleya? Nnaari. Ohoolo waya awo yaahipacerya ohimya wira khiyaaphavela ohooleliwa ni profeta. Awo yaaphavela okhalaka ntoko maloko makina yaarina mamwene aya. Olakiheriwaka ni Yehova, Samuweli aahiiwelela yoovekela ele. Masi owo aahaana owooniherya wira aIsarayeli yaahipaka etampi yuulupale mwaha wooveka etthu ele. Khahiyo wira paahi yaamukhoottale Samuweli, masi yaahimukhootta Yehova! Tivonto aathukumannye awe atthu ale oGiligali.

Samuweli aahinvekela Yehova ni waamini nto Yehova aahikumiherya itari ni epula

25, 26. Nakhulu Samuweli aakhalihenrye sai oGiligali, atthu a nloko nawe woona wira yaahimutthekela Yehova?

25 Vano nrowe ninwehe Samuweli oryeene ooxankiheya olavulaka ni aIsarayeli oGiligali. Okathi ole Samuweli aahiwuupuxerya aIsarayeli mweettelo awe woororomeleya okhuma khalai. Nto ninsoma so: “Samuweli ahavekela Apwiya” Yehova. Owo aavenke wira Yehova okumiherye itari ni epula.1 Sam. 12:17, 18.

26 Itari ni epula? Elimwe? Tthiri etthu ele yaari yootikiniha! Vakhala wira yaahikhala atthu yahaamini wala yaaheemererya wira Muluku ookhala, nihiku nle eyo yahaamalela. Naananoru erimu yaahisareya meeku. Epheyo yaahintakasa etrigu mmatta. Etari yaahikumiherya onyakula wuulupale. Nto epula yaahimora. Vano atthu ale yoonenle sai? “Atthu othene yahisareya wova mwaha w’Apwiya ni mwaha wa Samuweli”. Okathi ole atthu ale yaahoona wira yaahimutthekela Muluku.1 Sam. 12:18, 19.

27. Yehova oniwoonela sai atthu otheene yaale anitakiha waamini wa Samuweli?

27 Khahiyo Samuweli, masi Muluku Yehova, taawenrye ovara mirima sa atthu ale. Okhuma enamwane awe mpakha wuuluvala wawe, Samuweli aanimuroromela Muluku awe. Nto Yehova aahimutthuvela. Yehova khovirikanne mpakha olelo-va. Owo onnivikaniha waakhaliherya atthu otheene anitakiha waamini wa Samuweli.

^ etti. 5 MuNaziri, aari mutthu ammana natiri waahela muhina ohiwurya eviinyu ni ohimetthiwa ikharari sawe. Akina yaanikhala muNaziri okathi vakhaani waaphavela aya, masi akina, ntoko Sansoni, Samuweli ni Yohani Mbatiza, yaari maNaziri ekumi aya yotheene.

^ etti. 9 Etabernaakulu yaarina iponta xexe soolikana, yaari eheema yuulupale yaakokhiwa ni miri. Masi yaapakiwe ni ikaruma soolokexa ohela muhina isapala soorika, manri ootthaviwa saana, miri sa khampiri, eparatha ni eweero. Etabernaakulu yaakhala vate voowaataleya wa iponta xexe, ni aahikhala-vo altari muulupale waapaheriwa mikuttho. Ohoolo waya saahitekiwa ipa sikina, oxerexere wa etabernaakulu wira akhaleke anamukuttho. Vanikhala ntoko wira Samuweli aarupa ipa seiyo.

^ etti. 12 Soolempwa sinnihimya itthu piili saapakiwa voohimuttittimiha Yehova. Yoopacerya, Nlamulo nanooniherya epantte ya mukuttho yaareerela okhuuriwa ni anamukuttho. (Otum. 18:3) Masi otabernaakulu, anamukuttho ale ootakhala yaapaka etthu yoovirikana ni ele yaahimmwale. Awo yanaaruma anamakhaliherya, wira akuxe mukhope wa maino mararu, wira ahome enama yaapeiwa nto khuyakuxa khula epantte yaahoma aya! Yanenli, okathi atthu yaruuha aya mikuttho saya wira sipahiwe valtari, anamakhaliherya ale yaanikuxa enama ekithi yaasivela, masi voowali, yaanipa eyo ehinatthi ovahiwa Yehova makhura a inama sa mukuttho.—Onam. 3:3-5; 1 Sam. 2:13-17.