Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mutakiheke Waamini Waya

Masu Oopacerya

Masu Oopacerya

“Mutthareke mwettelo w’atthu ale anaamini ni arina nthiti, ni siso anakhela sohiyeriwa Muluku salaihenryawe”.AHÉBERI 6:12.

1, 2. Mutokweene mmosa a esirkwiitu aawoonela sai atthu oowaamini aniromoliwa mBiibiliyani, ni exeeni eniwiiriha atthu awo okhala apatthani ooloka?

NUUMALA owiriyana mwaha waalavuliwe ni mutokweene a esirkwiitu oowunnuwela, murokora mmosa aahimyale so: “Munna ole aalavulaka myaha sa atthu aniromoliwa mBiibiliyani onikhala ntoko atthu awo yaari apatthani awe”. Murokora ole aahimya tthiri ekeekhai, okhala wira mutokweene ole a esirkwiitu, aahiviriha iyaakha sinceene osomaka ni wiixuttiha Nuulumo na Muluku, mpakha alopwana ni athiyana aniromoliwa mBiibiliyani okhalaka ntoko apatthani yaasuwela awe saana okhuma khalai.

2 Nto niireke munnoona wira atthu awo annireerela okhala apatthani ahu? Niireke munniwoona okhala atthu eekeekhai tthiri? Nkahaya muupuwele moota saarowa aya okhala olavula ni weetta ni atthu awo, oviriha okathi wira mwaasuwele saana alopwana ni athiyana ntoko Nowe, Abrahamu, Ruthi, Eliya ni Estheri. Muupuwele moota saarowa aya wookhaliheryani, owiiwa alavulaka wira yoolakiheryeni ni woolipihani!Musome Miruku 13:20.

3. (a) Mireerelo xeeni siniphwanya ahu okathi onisoma ahu sa alopwana ni athiyana oowaamini ari mBiibiliyani? (b) Makoho xeeni anirowa ahu othokorerya?

3 Tthiri waphiya okathi wa ohihimuxiwa wa atthu awo “òrera murima”, vanooweryaneya okhalana opatthani wooloka ni atthu awo. (Mit. 24:15) Masi, ti vooloka hiyo niinano-va wiixutta etthu voohimya sa alopwana ni athiyana oowaamini aniromoliwa mBiibiliyani. Moota xeeni? Murummwa Paulo onaakhula so: “Mutthareke mwettelo w’atthu ale anaamini ni arina nthiti, ni siso anakhela sohiyeriwa Muluku salaihenryawe”. (aHéb. 6:12) Nihinatthi opacerya osoma voohimya sa alopwana ni athiyana oowaamini, nihaana othokorerya makoho yaapakiwe ni Paulo, ani: Waamini exeeni, ni xeeni vanitthuneya ahu waamini? Ninrowa waatakiha sai atthu oowaamini a khalai?

Waamini Exeeni ni Xeeni Vanitthuneya Ahu Okhalana?

4. Muupuwelo xeeni arina aya anamunceene voohimya sa waamini, ni xeeni muupuwelo owo oryaaya weethiru?

4 Waamini mukhalelo mmosa woovara murima, yoowo alopwana ni athiyana ari mBiibiliyani anirowa ahu waasoma eliivuru ela, yaavaha aya efaita yuulupale. Atthu anceene olelo-va, khanivaha efaita waamini, maana anuupuwela wira waamini onitaphulela ororomela khula etthu voohiphavela osuwela ekeekhai aahiiso onamoona okhanle. Masi muupuwelo owo ti woohiloka. Maana waamini khahiyo okupali paahi, wala okuxeya murima paahi, mutthu ohaana okupali nuumala  osuwelexa wira ele enihimmwa ekeekhai tthiri, ni wira ehaavo enimukupaliha. Waamini ehikhanle etthu enookupaliha ti wowoopiha. Tthiri okupali onnimala yaahikhale etthu enookupaliha, ohiya-vo, waaminiru khoniphiyerya maana “hatá arumeyi a Satana annamini, enathukumela yòvaka”.Yak. 2:19.

5, 6. (a) Itthu xeeni piili sihinooneya sinlipiha waamini wahu? (b) Exeeni enniiriha waamini? Nvahe ntakiheryo.

5 Waamini wekeekhai, onnivikana itthu sotheene sihimmwale. Vano nrowe niwehe moota Biibiliya onitthokiherya awe. (Mmusome aHéberi 11:1.) Paulo onihimya wira waamini onihela muhina itthu piili sihiniwerya ahu woona. Yoopacerya, onihela muhina itthu seekeekhai “sihinònahu”. Maitho ahu a werutthuni khaniwerya woona itthu somunepani ntoko, Yehova Muluku, Mwanawe, wala Omwene yoowo vano onilamulela wiirimu. Yanenli, waamini onihela muhina “itthu sinlipelelahu”, eyo piiyo, itthu nlelo sihiiraneyale. Hiyo khanniwerya woona elapo esya enrowa okumiheriwa ni Omwene wa Muluku voohipisa. Nto niireke vanitaphulela wira waamini wahu itthu iyo ti wa ethiru?

6 Nnaari khahiyo siiso! Paulo onnitthokiherya wira waamini wekeekhai wookhalana mathipelo oolipa. Okathi Paulo aahimmye awe wira waamini “t’inamuna y’okhalana itthu sinlipelelahu”, aarumeelale nuulumo nintaphulela “ovahiwa epaphelo mutthu, enooniherya wira itthu iyo ti sawawe”. Nkahaya muupuwele vaakhanle wira mutthu oholeiheryani woovahani empa. Woonasa wene aamovahani edukumento enihimya wira: “Empa eyo ti yawinyu”. Masi eyo khenihimya wira nyuwo munrowa okhalaka va papheloni-vo; edukumento eyo enivaha onamoona wira empa eyo tthiri ti yawinyu. Moolikanasa, onamoona wa itthu sinaamini ahu ti woolipa, maana onooniherya wira itthu iyo ti sekeekhai ni sinimwiraneya tthiri.

7. Waamini onihela muhina exeeni?

7 Tivonto, mutthu orina waamini wekeekhai onnikupali ithoonyeryo sa itthu onaamini awe ni onnimuroromela Yehova Muluku. Waamini onniniiriha omoonaka Yehova okhala Tiithi ahu oophenta ni waaroromela anatiri awe otheene wira animwiiraneya. Masi waamini wa ekeekhai onnihela muhina itthu sinci. Siisaale etthu ekumi enivekela aya olya wira ehikhwe, waamini wahu ohaana olyihiwa wira olipe. Waamini ohaana wooniheriwa ni miteko, wira ohikhwe.Yak. 2:26.

8. Xeeni waamini oryaaya etthu yootepa otthuneya?

8 Xeeni waamini oryaaya etthu yootepa otthuneya? Paulo onnaakhula nikoho nlo mwa enamuna enivara murima. (Mmusome aHéberi 11:6.) Hiyo khanniwerya omwaattamela Yehova wala omuhakalaliha nihaaminiki. Tthiri waamini ti wootthuneya wira naakhwaniherye yoolakela yuulupalexa, yeeyo soopattuxiwa sotheene siniwerya aya opaka, eyo piiyo, omwaattamela ni onvuwiha Tiithi ahu a wiirimu, Yehova.

9. Moota xeeni Yehova oonihenrye awe wira onnisuwela wira nihaana waamini?

 9 Yehova onnisuwela wira hiyo nihaana waamini, tivonto onivahale awe matakiheryo ooloka aaniwerya oolipiha waamini wahu. Owo ooreeliha muloko wa eKristau khunivaha alopwana oowaamini anihoolela muloko. Nuulumo nawe nihimyale so: “mutakiheke wamini” waya. (aHéb. 13:7, Biblia Solempwa sa Muluku) Nave owo oonivaha etthu ekina. Paulo aahilepa sa ‘anamona òwatta ntoko meku’, niire so, alopwana ni athiyana a khalai yaawo anihiyenrye ntakiheryo nooloka na waamini. (aHéb. 12:1) Nnaamwi ohilempe masina a arumeyi otheene, Paulo oopaka elista ya masina a atthu oowaamini, aniphwanyaneya eliivuru ya aHéberi ekapitulu 11. Biibiliya ookhalana sowiiraneya sinci sa alopwana ni athiyana, amiravo ni oowunnuwela a makhalelo otheene, yaawo anniixuttiha waamini okathi ola woothowa atthu owaamini.

Ninrowa Otakiha Sai Waamini wa Atthu Akina?

10. Yoosoma ahu enrowa onikhaliherya sai waatakiha alopwana ni athiyana oowaamini aniromoliwa mBiibiliyani?

10 Nyuwo khamuniwerya omutakiha mutthu ohinimusuwela anyu saana. Okathi onirowa anyu osomaka eliivuru ela, munimoona wira woovariwa muteko munceene wa otokosa wira moone okhweya wiixutta moota alopwana ni athiyana yoonihenrye aya waamini. Nto xeeni ohimananihaka opaka etthu emosaru? Okathi onipaka anyu yoosoma anyu, murumeele ikaruma sirina anyu wira mwiiwexexe ele enihimmwa mBiibiliyani. Muupuweleleke, mmananihe waaweha atthu awo, opuro waakhala aya, ni mahuweliwo aya. Mmananihe woona itthu saari opuro ole, itthu saaruma, itthu sankhela, mukhalaka ntoko mwaari vaavo. Etthu yootepexa otthuneya, mmananihe wuupuwelela moonelo wa atthu awo. Okathi onirowa anyu waalimalelaka alopwana ni athiyana awo oowaamini, awo anrowa okhalaka ntoko atthu a ekeekhai, anaasuwela anyu tthiri, akina anrowa okhala ntoko apatthani arina anyu okhuma khalai.

11, 12. (a) Munrowa okhala sai mpatthani a Abrahamu ni Sarai? (b) Mureerelo xeeni okhanle anyu oophwanya wa ntakiheryo na Ana, Eliya wala Samuweli?

11 Okathi onrowa anyu waasuwela atthu awo, nto nyuwo munrowa ophavelaka waatakiha. Mwa ntakiheryo, nkahaya muupuwele muteko ovahiwe anyu niinano. Nyuwo munnilattuliwa ni otthokeya wa Yehova wira munnuuherye muteko oninvarela anyu. Woonasa wene mulattuliwe wira muthaamele muttetthe mukina othonwe anamalaleerya, wala mulattuliwe wira murumeele enamuna ya niinano ya olaleerya ehilimalenle anyu, aahiiso ehinisuwela anyu. Okathi onuupuwelela anyu muteko owo ni ovekela, niireke vaamureerela omuupuwela Abrahamu? Owo ni Sarai aaheemya vohinlaseya khuthaama muttetthe aya wa Uri, nto khureelihiwa vanceene. Mwaimananiha waatthara motheene yaavinre aya, munimoona wira munimwaasuwela saana ovikana khalai.

 12 Vamosaru, niireke vakhala wira ookhala mutthu oonyoonyihaleni ni wookhulumulani, nto vannireerela ohiya orowa omuthukumanoni mwaha wa yeeyo? Othokorerya ntakiheryo na Ana, yoowo aaveehiwa ni Penina, onimookhaliheryani opaka yoothanla yooloka ni munimoona wira Ana mutthu onireerela okhala mpatthani anyu. Nave akhala wira nyuwo munnikhulumuwa mwaha wowoonaka wira khamurina efaita, nto woonasa wene munoosiveliwa okhala mpatthani a Eliya, okathi onisoma anyu itthu saamukhumelenle ni enamuna Yehova aamukhalihenrye awe. Nave amiravo oxikola anikhanyereriwa opaka itthu sa haaya, owehasa wene anoosiveliwa ni Samuweli, vaavo anisoma aya sa moota aakhoottale awe opahuliwa ni anaawe Eli, mpaani mwa Muluku.

13. Niireke otakiha waamini wa atthu ari mBiibiliyani onniiriha waamini wa mutthu ohikhalana efaita? Mutthokiherye.

13 Niireke otakiha waamini wa atthu akina ari mBiibiliyani onniiriha waamini wahu ohikhalana efaita? Nnaari! Hiyo noosuwela wira Nuulumo na Yehova ninnintumererya waatakiha atthu oowaamini. (1 aKor. 4:16; 11:1; 2 aTes. 3:7, 9) Atthu akina anrowa ahu waasomaka yaanitakiha-tho waamini wa atthu akina oororomeleya yaakhanle khalai ene awo ahiyariwe. Mwa ntakiheryo, Muru 17 wa eliivuru yeela nnimoona wira waahikhala okathi Maria aalavula awe sa Hana, nto eyo ennooniherya wira owo aatakiha waamini wawe. Niireke eyo yaaniiriha waamini wa Maria ohilipa? Nnaari! Ohiya-vo, waamini wa Hana waahimukhaliherya Maria okhalana waamini waamwiirihale okhalana nsina noohiliyaleya vameithoni va Yehova Muluku.

14, 15. Itthu xeeni suulupale siniphwanyaneya eliivuru ela, ni ninrowa orumeela sai?

14 Eliivuru ela epakeliwe wira yookhaliheryani olipiha waamini wanyu. Miru sinittharelana sikumihiwe mpantta oni: “Mutakiheke Waamini Waya”, seiyo saakumiheriwe ni erevista Owehaweha okhuma mwaakha wa 2008 mpakha 2013. Masi sookhala itthu ikina isya siheliwe. Aakhala makoho anrowa onikhaliherya othokorerya khula ettima ni woona moota woovarihela muteko. Soopakiwa ilatarato sinceene sinooniherya makhalelo kamosa-kamosa ari muliivuruni ni ilatarato sa khalai sihinnuuheriwa ni olokiheriwa wira sooneyeke saana. Sookhala itthu sikina sinrowa onikhaliherya, ntoko maapha ni itabela sinihimya okathi. “Mutakiheke Waamini Waya”, eliivuru epakiwe wira khula mutthu osomeke, ohela muhina vatthokoni ni yoosoma ya mmulokoni. Woonasa wene imusi sinceene sinrowa osiveliwa osomaka mwa enamuna yowiiweya saana wa atthu ari-vo.

15 Tthiri ninlompa wira eliivuru ela yookhaliheryeni otakiha waamini wa arumeyi a Yehova oowaamini a khalai. Ni yookhaliheryeni omwaattamela Tiithi anyu a wiirimu, Yehova ni oolipiha waamini wanyu!