Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mutakiheke Waamini Waya

Epaphelo ya Nikhuuru Noolamulela

Epaphelo ya Nikhuuru Noolamulela

Anna ni Arokora Oophentiwa:

Okhuma nummuru noopacerya na erevista enikaiwa ya Owehaweha 1 a Janero a 2008, onnikumiheriwa mwaha wootepexa otthuneya oni: “Mutakiheke Waamini Waya”. Okhuma mwaakha ole, onnikumiheriwa mwaha mmureerelo ahu wa khula myeeri miraru!

Nto anoonela sai ale anisoma myaha iyo? Nuumala muthiyana mmosa osoma mwaha waalavula sa Martha, owo aahimmye so: “Okathi kaasoma aka mwaha ola kaanitheya, okhala wira kinlikana ni yoowo, mwaha wookisivela owaakhela atthu saana, ni waatteliwa miteko, masi ikwaha sikina, kinniliyala ohiya miteko iyo wira kitthekule ni apatthani awo”. Mwali mmosa nuumala osoma mwaha waalavula sa Estheri aahimmye so: “Tthiri ti vookhweya mutthu otepa osiveliwa ikuwo vanceenexa ikuwo sikhumenle niinaano. Ekeekhai wira nihaana wiiwariha saana, masi voohitepana”. Owo aahincererya oriki: “Etthu enimusivela Yehova ti ele erina ahu vamurimani”. Murokora mmosa nuumala osoma yowiiraneya ya Pedru, voohakalala aahimyale so: “Kaanisiveliwa vanceene okathi kaasoma aka. Kaakhala ntoko kaari vaavo! Kaneererya okhala ntoko Pedru wira kiiwexexe ele enihimmwa”.

Moolumo ala amanle ahu ohimya ni moolumo a atthu anceenexa alempe aya axukhurelaka myaha sinikumiherya ahu, anittittimiherya masu a murummwa Paulo alempe awe khalai, wira: “Vano, sothene silempwe khalai, silepeliwe wira nixuttihiwe, wira niphwanyé ororomela, nilipihiwaka ni nthiti, nihakalalihiwaka ni Solempwa sa Muluku”. (aRom. 15:4) Tthiri Yehova oolepa soohimmwa iya sa atthu mBiibiliyani wira niixutte. Otheene ahu, moohicikha okathi niixuntte ahu ekeekhai, nnoottottela mureerelo sowiiraneya iyo.

Nto nnootumereryani waakuvela osoma eliivuru ela. Murumeele okathi anyu woomulompa Muluku Vatthokoni, nto opaka eyo anamwane enimwaasivela! Muhicompe hata esumana emosa okathi onrowa aya othokoreriwaka eliivuru ela mwa Yoosoma ya Biibiliya ya Muloko! Mwiivahe okathi wira musome voohitthimaka wira mwiiwexexe saana. Murumeele muupuwelo anyu wira mukhale ntoko atthu athokoreriwe eliivuru ela. Mweererye okhala ntoko atthu awo wira moone ele yoonale aya. Nwehe ele yaapanke aya ni moone ele yaarowa anyu opaka.

Ti voohakalaliha hiyo okumiherya eliivuru ela wira nyuwo musomeke. Ninlompa wira eliivuru ela yookhaliheryeni nyuwo ni etthoko anyu. Makhomaso ahu a niphento nuulupale,

Nikhuuru Noolamulela na Anamoona a Yehova