Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mutakiheke Waamini Waya

 MURU 9

Owo aahipaka itthu mwa miruku

Owo aahipaka itthu mwa miruku

1-3. (a) Exeeni yaarowa wiiriha okhumelela ehasara vatthokoni va Abigayili? (b) Ninrowa wiixutta exeeni sa muthiyana ola a miruku?

ABIGAYILI aanoona wira mmiravo ole aari ooxankiheya. Tthiri aahikhalana mathowa yaamwiiriha woova. Yookhala ehasara yaarowa okhumelela. Okathi ole anakhotto oowiiraka 400 yaanirwa wira awiive atthu otheene vatthokoni va Nabali, iyawe Abigayili. Mwaha wa xeeni?

2 Sotheene iye saakhumelenle mwaha wa Nabali. Owo aahipaka itthu vootakhala murima ntoko saamakela awe. Masi okathi ola, Nabali oomuruwana mulopwana ahareerela oruwaniwa; mulopwana owo aari muhooleli oophentiwa aanakhotto oororomeleya ni oowiinihiwa saana nikuruta. Vano, namuteko mmosa a Nabali, woonasa wene makampusi, aahirowa wa Abigayili okupaliki wira muthiyana ole aarowa ompaka palano wira owoopole atthu. Masi muthiyana mmosa aarowa opaka exeeni wa anakhotto anceene?

Muthiyana mmosa aarowa opaka exeeni eriyari ya anakhotto?

3 Masi, nrowe nimusuwele vakhaani muthiyana ola a miruku. Abigayili aari muthiyana a enamuna xeeni? Muxankiho ole waakhumenle sai? Ninrowa otakiha sai waamini wawe?

“Muthiyana Òrera n’Ànkhili”

4. Nabali aari mutthu a moota xeeni?

4 Abigayili ni Nabali yaari atthu oovirikana vanceene mirima saya. Nabali aahimuthela muthiyana ooloka, masi Abigayili aatheliwe ni mulopwana otepexa otakhala murima. Ekeekhai wira mulopwana ole aari thaaciri. Owo aixoona okhala mutthu oolokexa waavikana atthu akina; masi atthu akina yamoonela sai? Vannivila omphwanya mBiibiliyani mutthu oniromoliwa voohiloka onvikana Nabali. Nsina nawe naataphulela mutthu “Ohirina miruku”, aahiiso “Mulolo”. Niireke nsina nle aavahiwe ni anamuyari awe omalakaru oyariwa, wala aavahiwe ohoolo nuumala wooniwa murima awe? Nnaamwi nihisuwelaka, makhalelo awe yaanivarihana ni nsina nawe. Nabali aari “òwali ni òtakhala murima”. Aari mutthu oosiveliwa owana, ohapaliwa, nto atthu anceene yanimoova tivonto khaaphaveliwa.1 Sam. 25:2, 3, 17, 21, 25.

5, 6. (a) Munoonela sai, etthu xeeni yaamwiiriha Abigayili okhala ootepexa oreera? (b) Woonasa wene exeeni yaamwiirinhe Abigayili otheliwa ni mulopwana ahaarina miruku?

 5 Abigayili aari oovirikana mwa inamuna sotheene ni Nabali. Nsina nawe nintaphulela “Tiithi Aka Oophwanya Otteeliwa Murima”. Anamuyari anceene vannaasivela yamuyara mwaana mwaamuthiyana ooreera, masi paapa a miruku onnitepa ohakalala akhala wira mwaana owo tooreera murima. Masi ikwaha sinceene oreera wa werutthuni onnimwiiriha mutthu ohiimananiha wiixutta makhalelo ootthuneya ntoko: okhala a miruku, ankhili, olipa murima ni waamini. Tivonto Abigayili aari muthiyana oovirikana. Biibiliya onnimuttottopela mwaha wa okhala wawe a ankhili ni ooreera.Mmusome 1 Samuweli 25:3.

6 Atthu akina annikoha ariki: xeeni muthiyana ooreera ni a miruku ohalaka weemya otheliwa ni mulopwana ootakhala! Musuwele wira okathi ole ikasamento sinceene saari seiye mutthu aamwaaveriwa awe oothelana. Nave hata okathi yoole, eyo yahiiraneya aya, anamuyari ti yaapaka yoothanla. Niireke anamuyari awe Abigayili yoona muhakhu ni ovuwa wa Nabali, nto khumutheliha mwanaya? Niireke waari mwaha wa okhala emusi yoohaawa? Khannisuwela, masi etthu enisuwela ahu tiila, musurukhu khiwamwiirihale Nabali okhala mulopwana oolokexa.

7. (a) Etthu xeeni anamuyari ehikhanle aya oopaka olelo, akhala wira aniphavela owiixuttiha anaaya makhalelo ooloka a ekasamento? (b) Etthu xeeni Abigayili yaamananiha awe opaka?

7 Anamuyari a miruku ahaana owiixuttiha saana anaaya, mweettelo wooloka wa ekasamento. Tthiri anamuyari ahaana waalakiherya anaaya, wira ahuupuweleke musurukhu paahi, okathi onimwavyaaya mutthu oothelana, ni ahaakhanyereryeke opacerya wuuryana nlelo aryeene anamwane vahiniwerya aya miteko sinivariwa ni atthu yinnuwale. (1 aKor. 7:36) Masi Abigayili khaarina-tho okathi wa wuupuwelela itthu iyo. Nnaamwi nihisuwelaka etthu yiiraneyale, Abigayili aaheemya otheliwa ni Nabali, nto khiyapaka itthu sotheene saawerya awe wira ovilele muxankiho ole.

Owo Aahuuluma Voonanara

8. Nabali aamuruwanne mutthu xeeni, nto xeeni vanihimya anyu wira eyo yaari etthu yoohiloka?

8 Nabali aahipaka etthu yaamwiirihale Abigayili otepa oxankiheya ovikana khalai. Mulopwana aamuruwanne awe iitthaniwa Davidi. Owo aari mutthu oororomeleya wa Yehova, aathanliwe ni Muluku wira okhale mwene, nto profeta Samuweli khuhimya wira aarowa omuranttela mwene Sawuli. (1 Sam. 16:1, 2, 11-13) Okathi Davidi aatthyawa awe mwaha wa nanrima Sawuli yoowo aaphavela omwiiva, Davidi aakhala otakhwani ni anakhotto awe 600 oororomeleya.

9, 10. (a) Mapuro xeeni ooxankiha, Davidi ni anakhotto awe aakhala awe? (b) Xeeni vaareerela aya Nabali omuxukhurela Davidi ni anakhotto awe? (Nwehe-tho enoota eri ettima 10.)

9 Nabali aakhala muttetthe wa oMaoni, masi aahikhalana imatta sawe  waattamela muttetthe wa oKarmelo. * Muttetthe ole waahikhala malaxi ooloka, waareerela oroiha olya ipwittipwitthi seiyo Nabali aarina awe saavikana 3.000. Masi waattamela opuro ole yaahikhala etakhwa yahaalimmwa. Mpantta onikhuma epheyo yaahikhala etakhwa yuulupale ya oParani yahaakhanle malaxi wala miri. Mpantta onikhuma nsuwa waari Ephareya ya Maakha nto waahikhala myaako ni makhuku manceene. Okhala mapuro ntoko ale waari voovila wa Davidi ni atthu awe, tivonto yahaana oxaya wira aphwanye etthu yoolya, masi yaanikumanana mixankiho sinceene. Ikwaha sinceene awo yaanikumanana amiravo yaakukhula inama sa mulopwana oothaaciri Nabali.

10 Anakhotto a Davidi yawoonela sai amakampusi a Nabali? Woonasa wene, vaarowa okhala vookhweya ovara khuta epwittipwitthi yaasivela wira yiive ni okhuura khula okathi waaphavela aya, masi awo khiyaapakale eyo. Etthu yaapakale aya waari waakhaliherya amakampusi ni inama sa Nabali. (Mmusome 1 Samuweli 25:15, 16.) Elapo ele yaari yowoopiha wa amakampusi vamosa ni inama saya. Saanikhala inama soowali ni sowoopiha, nave muttetthe wokuusini wa Isarayeli yaahikhala alipa-oowiiva ni anawiiye yaamakela waatuphela atthu. *

11, 12. (a) Davidi oonihenrye sai osuwela olavula ni ottittimiha okathi aarumale awe atthu awe wa Nabali? (b) Etthu xeeni yiirihale waakhula wa Nabali okhala woohiloka?

11 Tthiri vaari voovila waakhapelela ni waalyiha atthu ale otheene okhalaka mutakhwani. Tivonto, nihiku nimosa Davidi aarumme awe anamitthaka wira yanvekele nikhaliheryo Nabali. Davidi aahisuwela othanla okathi wooreerela. Ole waari okathi wa efesta ya othikila manri a ipwittipwitthi, okhala wene atthu yaakhala oovaha ni yaanikhala yoolya yinceene. Nave Davidi aahithanla oratteene masu awe, olavulaka vooreerela ni nttittimiho. Owo aahirumeela moolumo oowi ‘Mwaninyu Davidi’, woonasa wene ophavelaka wooniherya wira Nabali ti muulupale onvikana yena. Nto Nabali aakhunle sai?1 Sam. 25:5-8.

12 Nabali oona wira aaroveihiwa! Mmiravo mmosa yoowo aalavula ni Abigayili aahimyale so: “Owo ahiwulumela vonanara”. Mwa enamuna yootakhala ni ariki opwapwa, Nabali aahikhootta waavaha ephaawu, maasi ni inama saahitale awe. Owo aahimuramusa Davidi khumuhimya okhala mutthu ahaarina efaita. Moonelo wa Nabali waamulikana ni Sawuli, yoowo aamunyokha Davidi. Atthu ala oowanli khiyaarina moonelo wa Yehova voohimya sa Davidi. Muluku aanimphenta Davidi ni khamoona okhala mutthu oohifai, okhala wira aahimuthanla wira ohoolo okhale mwene a Isarayeli.1 Sam. 25:10, 11, 14.

13. (a) Davidi oonenle sai oveehiwa ni Nabali? (b) Etthu xeeni eniixutta ahu va Yakobo 1:20, voohimya sa ele Davidi aaphavela awe opaka?

 13 Okathi atthu ale yaatthikale aya khumuleela Davidi, owo aahinanariwa vanceene.Davidiaarummeso:“Nyuwoothene,mukuxaseikatana sanyu!”Davidiaahiwaraiyuumasawesaekhotto,onarowawaahoolela anakhotto awe 400, wira yawane. Owo aahilapha wira aarowa owiivakasa alopwana otheene vatthokoni va Nabali. (1 Sam. 25:12, 13, 21, 22) Ekeekhai wira Davidi aahitthekeliwa, masi etthu yaalakenle awe opaka yaari yoohiloka. Biibiliya onihimya so: “mutthu oniviruwa khanettela exariya ya Muluku”. (Yak. 1:20) Nto Abigayili aarowa omoopola sai iyawe ni atthu otheene a vatthokoni vawe?

“Ettottopeliwe Ankhili Anyu”

14. Abigayili aapakale exeeni wira aphuke mulattu waakumiheriwe ni iyawe? (b) Itthu xeeni sikhanle ahu oowiixutta voohimya sa ovirikana wa Nabali ni Abigayili? (Nwehe-tho enoota.)

14 Nto Abigayili onnipaka marehereryo wira opake etthu yooloka wa muxankiho ole. Voovirikana ni iyawe, Nabali, owo onniphavela wiiwa etthu yaahimmwa. Mmiravo ole khoona ophwanela olavula ni Nabali, maana aahimyale wira “owo t’òwali [khivanreerela] omulela siso”. * (1 Sam. 25:17) Vooriipiha murima Nabali oona okhala ootthuneya ni khaaphavela wiiwa ele atthu akina yaahimya aya. Wixinnuwiha moota owo ohuulaana mahiku ala. Masi mmiravo ole aanisuwela wira Abigayili aari oovirikana nto owo aahirowa omuleela mwaha ole.

Voovirikana ni Nabali, Abigayili aanooniherya wira aaniiwa etthu yoohimmwa

15, 16. (a) Moota xeeni Abigayili oonihenrye awe okhala muthiyana ooloka ntoko ole onihimmwa eliivuru ya Miruku? (b) Moota xeeni yoowiira ya Abigayili wahaakhanle aya ommwareela iyawe?

15 Abigayili aahuupuwela nto khupaka etthu vowaakuveya. Biibiliya onihimya wira: “Nanano vavo”. Ekapitulu yeela paahi ninniphwanya ikwaha xexe masu oowi “nanano vavo” ohimmwaka muthiyana ole. Owo aahithukumanya itthu sinceene wira anvahe Davidi ni anakhotto awe. Eyo yaahela muhina iphaawu, eviinyu, ipwittipwitthi, ipyo soowaarikiwa, mikatthe sa uuva oowuuma ni sa efigu. Nto vannooneya wira Abigayili aanisuwela itthu saarina awe ni aanivara saana miteko sa vatthokoni vawe, voolikana ni muthiyana ooloka aahimmwale ohoolo waya ni eliivuru ya Miruku. (Mir. 31:10-31) Owo aahaavahererya itthu iye anamuteko awe, khwaaruma wira ahooleke, nto owo khuyaatthara ottuli ekhawe. Hiyo ninsoma so: “Vano khamuhimenrye etthu Nabali, iy’awe”.1 Sam. 25:18, 19.

 16 Niireke eyo enitaphulela wira Abigayili khamwiiwela iyawe? Nnaari; muupuwele wira Nabali aahipaka itthu soohiloka wa ole aathanliwe ni Yehova, nto eyo yaamwiiriha wiiviwa atthu oohittheka vatthokoni wa Nabali. Vaakhanle wira khaapakale etthu, niireke Abigayili aamukhalana nthowa nimosaru ni iyawe? Mmwaha ola Abigayili aahaana opacerya omwiiwelela Muluku awe, ohiya omwiiwelela iyawe.

17, 18. Abigayili aalavunle sai ni Davidi, ni moolumo xeeni yaahimyale awe, nto xeeni yiirihale masu awe okhala ookuxa murima?

17 Voohipisa Abigayili aahikumana Davidi ni atthu awe. Nto amoonakaru Davidi aahikhuruwa vabuuruni, khukokhora ohoolo wawe. (1 Sam. 25:20, 23) Nto aahipacerya olavula sotheene saari vamurimani vawe, omuxonttelaka wira omoonele othunku iyawe ni otheene yaakhalana awe. Etthu xeeni yiirihale masu awe okhala ookuxa murima?

‘Xontte, nwiriyane molumo a murumeyi any’ula’

18 Abigayili aalavunle ntoko taatthenke, nto khuveka wira iyawe aleveleliwe ni Davidi. Abigayili aahimuleela Davidi wira iyawe aari mulolo ntoko sinitaphulela aya nsina nawe, woonasa wene ohimyaka wira omuhukhumu mutthu ntoko Nabali, khunrowa omphwanyiha etthu Davidi. Abigayili aahooniherya-tho wira aanikupali wira Davidi aarummwale ni Yehova, wira owane ikhotto sa Yehova. Aahooniherya-tho wira aanisuwela yoolaiherya ya Yehova voohimya sa Davidi ni omwene awe, ahimyaka so: ‘Yehova . . . onimokhalihani mwene a Isarayeli’. Ohiya-vo, aahinvekela Davidi ohipaka etthu yaarowa omwiiriha okhalana mulattu wa ephome, okhala wira nuumala opaka eyo, ‘amuripiwa murima’, woonasa wene, aahimya sa wuukhuleya wa yowuupuxerya ya murima awe. (Mmusome 1 Samuweli 25:24-31.) Tthiri yaari masu ootepa ovara murima.

19. Davidi aakhunle sai masu a Abigayili, ni exeeni yamwiirihale omuttottopela?

19 Davidi aakhunle sai? Aahaakhela soovaha Abigayili aaruuhale awe khuhimya so: “Ettottopeliwe Apwiya, Muluku a Isarayeli, òrumaleni orwa olelo okumana ni miyo! Ni ettottopeliwe ankhili anyu, muttottopeliwe nyuwo, okhala wira olelo khamukitthunihenrye omwarexa ephome”. Davidi aahimuttottopela Abigayili mwaha woowi, mowaakuveya ni moolipa murima Abigayili aahirowa okumana ni yena, nave aaheemererya wira Abigayili khaatthunale wira Davidi akhalane mulattu wa ephome. Owo aahimyale so: “Mutthikele owannyu ni murettele”, nto voowiyeveiha ahihimya-tho oriki: “Miyo kihowiriyanani”.1 Sam. 25:32-35.

‘Miyo Murumeyi Anyu’

20, 21. (a) Xeeni vaarya aya voottottopeleya Abigayili otthikela wa iyawe? (b) Abigayili oonihenrye sai olipa murima ni miruku, mwaha woothanla okathi wooreerela olavula ni Nabali?

20 Orowaka owaani Abigayili aanuupuwela moolumo a Davidi, ni aanoona ovirikana eriyari ya ororomeleya ni oreera murima wa Davidi, ni ololo wuulupale wa Nabali aari iyawe. Masi khahiyo wira aamakela wuupuwela yeeyo paahi. Maana hiyo ninsoma so: ‘Abigayili ahihokolowela wa Nabali’. Nto ela enooniherya wira Abigayili aahitthikela opuro aatheliwe  awe anavikaniha owiiwelela aiyawe. Abigayili aahaana omuleela Nabali wira aahinvaha soolya Davidi ni atthu awe. Tthiri Nabali aahaana osuwela. Ohinatthi oleeliwa ni mutthu mukina; etthu yaarowa okhala yowuuliha muru; Abigayili aahaana omutthokiherya ehukhumu yaarowa omukhumelela Nabali. Masi okathi ole khiwaareerela omuleela etthu. Okhala wira Nabali aari vafestani ntoko mwene, ni aahihapaliwa ntoko yoolema awe.1 Sam. 25:36.

Abigayili moolipa murima aahimutthokiherya Nabali itthu sotheene saapakale awe wira oopole okumi awe

21 Ooniheryaka olipa wawe murima ni miruku, Abigayili aahaana-tho olipelela ovira nihiku ohinatthi omuleela iyawe, okhala wira nlelo aari oohapaliwe ene, eviinyu ehinatthi omuukuluwa. Maana okathi mukina aarowa wiiwexexa ele yaahimmwa, masi vowoopiha mwaha wa murima awe wootakhala. Hata vaari siiso, Abigayili aahirowa khumuleela itthu sotheene. Tthiri Abigayili aanoova opwapweliwa vootakhala, aahiiso wiirihiwa etthu yootakhala. Masi, Nabali arokhilaathi paahi voohipaka etthu.1 Sam. 25:37.

22. Exeeni yaamwiiranenle Nabali, nto enniixuttiha exeeni voohimya sa ohikhalihana saana vatthokoni?

22 Nto okathi ola yiiraneya exeeni ni Nabali? “Murima awe wahikhwa, erutthu awe yahuma ntoko nluku”. Woonasa wene, woova waahimwiiriha okhala ntoko mutthu ookhwa. Hata vari siiso, owo aakhwiiye nuuvira mahiku 10, ohiya mwaha wa oretta. Maana Biibiliya onihimya so: “Apwiya yahimpwetexa”, Nabali. (1 Sam. 25:38) Veekeekhai, opwetexiwa wa mulopwana ole, waahimala-maliha masooso yaarina awe Abigayili. Ekeekhai wira olelo-va Yehova khonaapwetexa atthu mwa enamuna ele, hata vari siiso, mwaha ole onooniherya wira khiivo etthu yootakhala eniiraneya vatthokoni Yehova ehiniwerya awe woona. Nto okathi wooreerela Yehova onoopaka exariya.Mmusome Luka 8:17.

23. Mareeliho xeeni Abigayili aakhenle awe, ni oonihenrye sai wira aaniphavela otheliwa ni Davidi?

23 Nuumala ommala-mala maxakha a ekasamento ele, Abigayili aahaakhela mareeliho makina. Nuumala Davidi wiiwa wira Nabali aahikhwa, aahaaruma anamitthaka awe omuleela wira owo aaniphavela omuthela. Owo aakhunle so: “Miyo, murumeyi awe Davidi, kolikanana orapiha inawu s’arumeyi awe”. Tthiri masu ala anooniherya wira owo aanilipelela otheliwa ni Davidi, ni aahiivahererya okhala murumeyi a arumeyi awe! Nto ninsoma wira, Abigayili aahaakuveya, masi okathi ola waari mwaha wowiilokiherya wira akumane ni Davidi.1 Sam. 25:39-42.

24. Mixankiho xeeni samphwannye Abigayili nuumala otheliwa ni Davidi, masi Davidi ni Muluku awe, yaamoonela sai muthiyana ole?

 24 Masi khahiyo waari ntoko omala wa ehantisi yooreera paahi, maana okumi wa Davidi ni Abigayili khiwaarowa okhalaka wookhweya khula okathi. Ohinatthi omuthela Abigayili, Davidi iira omuthenle ene Ahinowami, masi nnaamwi khalai Muluku eemyale, waatteya waanikumiherya mixankiho suulupale wa athiyana oororomeleya. Nave okathi owo, Davidi iira ohinatthi okhala mwene, nto saarowa omukhumelela mixankiho sinceene ohinatthi omurumeela Yehova ntoko mwene. Masi okathi Abigayili aamukhaliherya awe Davidi, nto mpakha omuyara mwaana, owo aanoona wira vano aahitheliwa ni mulopwana anvaha efaita ni omukhapelela saana. Okathi omosa, nuumala ovariwa ni anakhotto, Davidi aahimoopola Abigayili. (1 Sam. 30:1-19) Nto mwaha wa eyo, Davidi aahimutakiha Yehova Muluku, yoowo onaaphenta ni waakhapelela athiyana a miruku, oolipa murima ni oororomeleya.

^ etti. 9 Ola khahiyo waari mwaako Karmelo yoole ohoolo waya profeta Eliya aavaanyihale awe maprofeta a Bayali. (Nwehe Muru 10.) Karmelo onihimmwa-va, waari muttetthe mmosa waakhala okuusini wa othako.

^ etti. 10 Davidi oona wira waakhaliherya atthu yaakhala muttetthe ole ni inama saya, waari onvarela muteko Yehova Muluku. Okathi ole, Yehova aalakenle wira osuulu awe Abrahamu Isakhi ni Yakobe okhaleke elapo ele. Nto waakhaliherya atthu ale wira ahiiyeriwe ni alavilavi, yaari enamuna emosa ya muteko wa Muluku.

^ etti. 14 Moolumo yaarumeeliwe ni mmiravo ole animuhimya “mwana a beliyali aahiiso, (mutthu ohinafaita)”. Otaphulela wa Biibiliya mukina wa masu ala, onihela muhina otthokiherya nsina na Nabali, okhala ntoko “mutthu ohiniphavela wiiwa”, tivonto “khivaareerela olavula ni yena”.