Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Waamini Wekeekhai—Esiiri Eniphwanyiha Okumi Woohakalala

 MPANTTA 2

Exeeni Ori Waamini Wekeekhai?

Exeeni Ori Waamini Wekeekhai?

Ntoko musurukhu, waamini ohaana okhala wekeekhai wira okhalane efaita

WAAMINI wekeekhai khahiyo paahi okupali wira Muluku ookhala. Atthu anceene annikupali wira Muluku ohaavo, masi moolakela annipaka itthu sootakhala. “Waamini” moota owo onilikana ni musurukhu wowoothereriwa. Owo onikhala wira ti wekeekhai, masi ti woohiloka. Nto, exeeni ori waamini wekeekhai?

Waamini wekeekhai onivarihana ni osuwela saana Nuulumo na Muluku. Soolempwa iya sowuupuxeriwa ni Muluku, sinnilavula ekeekhai voohimya sa Muluku ni onikhaliherya omusuwela. Iyo sinnitthokiherya malamulo, soolakela, ni sowiixuttiha sa Muluku. Sowiixuttiha iyo, sinihela muhina itthu iya:

  • Muluku ori mmosa paahi. Owo khuuvo onilikana awe.

  • Yesu khahiyo Muluku Oowerya-sotheene. Owo Profeta a Muluku.

  • Muluku onninyokha waakokhorela amuluku eethiru.

  • Moohipisa ninrowa opacerya nihiku noophukela na apinaatamu.

  • Atthu anceene akhwiiye anirowa ohihimuxiwa wira akhale mParayiisu.

Waamini wekeekhai onniniiriha ovara miteko sooloka. Miteko iyo sinninvuwiha Muluku, sinninikhaliherya ni waakhaliherya atthu akina. Miteko iyo sooloka sinihela muhina itthu iya:

  • omulompa Muluku.

  • okhalana mikhalelo sinimuhakalaliha Muluku, ntoko ophenta.

  • osyaka miyuupuwelelo ni soophavela soohiloka.

  • ovikaniha omwaamini Muluku hata siniphwanyaka mixankiho.

  • owiixuttiha atthu akina voohimya sa Muluku.

Waamini wekeekhai onnikumiherya miteko sooreera

 Munrowa Okhalana Sai Waamini Wekeekhai?

Waamini, onilikana ni mutika, oninnuwa vaavo oniinihiwa aya nikuruta

Munvekele Muluku wira ookhaliheryeni. Profeta Moise ahinvekela Muluku wira: “Vano, yari ekekhai wira kinnosivelani, mukòniherye ekhove anyu, wira kosuweleni, kosiveliheni tthirí”. * Muluku aahiiwa ni aahakhula nivekelo nawe. Moise oovaha ntakiheryo noolokexa na waamini. Nto, Muluku onirowa wookhaliheryani wira mukhalane waamini wekeekhai.

Mukhalane okathi wira musome Nuulumo na Muluku. Nuulumo na Muluku, ninhela muhina Torá, Masalimo, ni Evangelho, (seiyo siniitthaniwa-tho Tawrat, Zabur ni Injil) seiyo siri mBiibiliyani, eliivuru yootepa otaphuleliwa ni okaiwa elapo yotheene. Niireke nyuwo mookhalana eliivuru eyo?

Mwiiweleleke miruku sa Nuulumo na Muluku khula nihiku. Waamini onilikana ni mutika yoowo oninnuwa vaavo oniinihiwa aya nikuruta. Nto mwarumeela waamini wanyu wala ovarihela muteko, onimunnuwa. Nyuwo munimoona wira miruku sa Muluku ti sa efaita. Tthiri, malakiheryo oovareleya muteko a Nuulumo na Muluku, ahaakhaliherya atthu anceene. Musome matakiheryo anittharelana.

^ etti. 17 Mmusome Okhuma 33:13.