Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Waamini Wekeekhai—Esiiri Eniphwanyiha Okumi Woohakalala

 MPANTTA 13

Waamini Wekeekhai Onniphwanyiha Ohakalala Ohinimala

Waamini Wekeekhai Onniphwanyiha Ohakalala Ohinimala

NUULUMO na muluku ninhimya so: ‘Mutthu àxariya onokhalana ekumi mwaha wo waamini’. (aRoma 1:17) Moolumo ala aakhalana natiri oohakalaliha onoohelani muhina. Moota xeeni?

Nuumaliha muteko awe valaponi, Yesu, Mesiya, aahiwela wiirimu wira akhale ni Muluku. Vaavo awiixutti awe yanweha aya, owo “ahiwela wirimu, awo emonaka: vano neku nahimukhunela, awo khuhimona-tho”. (Miteko 1:9) Wiirimu, Muluku oomuthanla Yesu okhala Mwene oowerya. Moohipisa, Yesu yoowo ori “mwana a mutthu”, onoophiya “n’uvuwa wawe vamosá ni malaikh’awe othene, [ni] onokilathi vehijeni vawe vovuwa. Atthu a maloko othene anothukumanyiwa oholo wawe. Vano, Owo onimwavalanya atthu òrera murima n’ale òtakhala murima, ntoko makampusi sinvalanyawe ipwittipwitthi n’ipuri”. (Matheyo 25:31, 32) Eyo enrowa okhumelela silini?

Nuulumo na Muluku naahihimya wira wamphiya okathi wa mixankiho elapo yotheene. Okathi owo, waarowa okhala ethoonyeryo yooniherya wira voohipisa Mesiya aarowa ophukela maloko otheene a mulaponi. Yesu aahihimya ethoonyeryo ela oriki: “Maloko makina anovirikanya maloko makina, omwene omwene mukina. Sinokhumelela itetere sulupale; mapuro manjene anorwela iretta n’itala. sinokhumelela-tho osulu itthu sowopiha n’ithonyeryo sulupale”.Luka 21:7, 10, 11.

Mixankiho sinikhumelela mahiku ala, sinooniherya wira moohipisa Mesiya onimwaaphukela atthu

Olelo-va, ninniweha wiiraneya wa moolumo a Yesu. Moohipisa, owo onimoorwa waapwetexa atakhali. Nuumala, Satana onrowa wiiviwa! Nto elapo yotheene enrowa okhala eparayiisu. Atthu otheene anookhalana murettele mukina ni mukhwaawe, vamosa ni inama. “Mwiji onokhalaka vomosá n’ipwittipwitthi: havara onimummathiki vamosá ni mwapuri. Mwanyompe ni mwakharamu animolyaka malaxi vamosá: mwanamwane onrowa wettihaka n’ulyiha inama iyo. Khinìraneya-tho yonanara ni yowopiha”. (Yesaya 11:6, 9) “Mw’atthu ankhala mmuttettheni khavo-tho onkela ohimya wira: ‘Miyo ki muretta’. Mahiku awo anotthukuwa maitho àlipa-òhona, anotthukuwa màru àlipa-òhiwa”. (Yesaya 33:24; 35:5) Pooti alipa ookhwa anoohihimuxiwa. Yehova ‘onimukuttha maithori owitho wothene’. Nto “khunrowa okhala-tho okhwa, nnákhala oripiwa murima, walá ikuttho nnákhala ohawa”. (Yesaya 25:8; Wisupulula 21:4) Nto, yoolakela yoopacerya ya Muluku voohimya sa elapo enrowa wiraneya. Tthiri eyo, etthu yoohakalaliha!

Nvikanihe Olipiha Waamini Wanyu

Atthu moota xeeni Yehova onrowa awe waatthuvela ni okumi woohimala oParayiisu? Atthu arina waamini, eyo piiyo, waamini wekeekhai!

Muupuwele wira waamini wekeekhai onisuwanyeya orweela wa osuwela saana Nuulumo na Muluku. Nto nvikanihe wiixutta voohimya sa Muluku ni Yesu!

Atthu arina waamini wekeekhai anookhala oParayiisu mahiku otheene!

Waamini wekeekhai onisuwanyeya orweela wa miteko sooloka. Nuulumo  na Muluku ninhimya so: “Wamini ohirina miteko sorera ti wokhwa”. (Yakobo 2:26) Orweela wa miteko sooreera, nyuwo munimooniherya mikhalelo sooloka sa Muluku sintoko: owerya, exariya, miruku ni ophenta. Vano nvikanihe okhalana mikhalelo sooloka sinimuhakalaliha Muluku!

Okhalana waamini wekeekhai, onimoophwanyihani mareeliho oohakalaliha. Tthiri, eyo tekhanle esiiri ya okumi woohakalala vano, mpakha mahiku otheene.