Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Waamini Wekeekhai—Esiiri Eniphwanyiha Okumi Woohakalala

 MPANTTA 6

Tiivi Eri Yoolakela ya Muluku wa Elapo ya Vathi?

Tiivi Eri Yoolakela ya Muluku wa Elapo ya Vathi?

MULUKU oopattuxa elapo wira ekhaliweke ni apinaatamu mahiku otheene. Nuulumo Nawe ninhimya so: “Erimu ti yawaya Apwiya: vano elapo, Apwiya ahàvaha atthu”.Esalimo 115:16

Muluku ohinatthi ompattuxa mulopwana oopacerya, Adamu, aahithanla mpantta mmosa valaponi, wiitthaniwa Edeni, nto khutatuxa okhala ejardim. Nuulumo na Muluku, ninhimya wira miro Eufrate ni Tigri (Hídequel) saaphattunwe wEdeni. * Vanikupaliwa wira ejardim ya wEdeni, yaaphwanyaneya opuro yoowo olelo okhanle mpantta onikhuma nsuwa wa elapo ya Turquia. Tthiri, ejardim ya wEdeni yootoko okhala mulaponi!

Muluku aahimpattuxa Adamu nto khumpweha ojardim wEdeni wira “alimeke, [ni] asukeke”. (Maphattuwelo 2:15) Muhoolo mwaya, Muluku aahimpattuxa mwaarawe Adamu, nsina nawe Eva. Muluku aahaaruma anamathelana ale wira: “Mwayareke an’inyu, munjerereyeke: musareyeke mulaponi mothene. Mwettiheke elapo yothene”. (Maphattuwelo 1:28) Tthiri, Muluku “opattunxe elapo . . . wira ekhaleke–mo atthu”.Yesaya 45:18.

Masi, Adamu ni Eva moolakela yaahimutthekela Muluku vaavo yahaiwelenle aya nlamulo nawe. Nto Muluku ahiwomola ojardim wEdeni. EParayiisu yaahirimeela. Masi mixankiho sikhumelenle mwaha wa etampi ya Adamu khisaamanle vaavo. Nuulumo na Muluku ninhimya wira: “Mutthu mmosá pahi t’oruhale etampi mulaponi: etamp’iyo yoruha okhwa. Siso okhwa ohaphwanya atthu othene, okhala wira atthu othene àttheka”.aRoma 5:12.

Niireke Yehova oohiya yoolakela awe wira elapo ekhale eParayiisu ni ekhaliweke ni apinaatamu oohakalala? Nnaari! Nuulumo Nawe ninhimya so: “Siso molumo ankhuma mwano mwaka khantthikela-tho wa miyo ehivanre muteko aya, ehirale itthu sintthunaka, ehimalihenrye sarumalyaka”. (Yesaya 55:11) Tivonto, eParayiisu enootthikhela okhala mulaponi!

Okumi onirowa okhala sai oParayiisu? Moone ipaaxina piili sinttharelana wira musuwele ele Nuulumo na Muluku ninleiherya aya.

^ etti. 4 Yoolepa ya Maphattuwelo 2:10-14, enihimya so: “MwEdeni mwahikhala muró, wavira onanihaka ematt’eyo, memmo mwakawanyeiyaya miratthi mixexe. Muratthi wopajerya waihaniwa Pixoni, . . . Muratthi wanenli waìhaniwa Gihoni, . . . Muratthi waneraru waìhaniwa Tigri, yowo onikhowa onikhuma nsuwa, elapo ya wAsiria. Muratthi wanexexe waìhaniwa Eufrate”. Mapuro saaphwanyaneya aya miro miili soopacerya (Pixoni ni Gihoni), olelo-va khanisuweliwa.