Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Waamini Wekeekhai—Esiiri Eniphwanyiha Okumi Woohakalala

 MPANTTA 9

Mwiixutte Voohimya sa Mwene Mesiya

Mwiixutte Voohimya sa Mwene Mesiya

MULUKU aahihimya wira aarowa omuthanla Mesiya wira okhale mwene a atthu otheene. Muluku onnimusuwela mwene onireerela ahu okhalana ni onnimuthanla ole oniphwanelela. Mesiya ari Mwene a mukhalelo xeeni? Mukhulupale a anakhotto? Mulipa a epoliitika oosuwela? Musuweli a efilosofia? Nuulumo na Muluku, ninhimya wira Mesiya aari profeta oohilikana ni akina, eyo piiyo, Yesu Kristu.—Matheyo. 23:10.

Muluku aahiiriha wira Yesu oyariwe oomalela ni oohikhalana etampi. Ohiya-vo, Yesu aahisyaka ohapuxiwa ni Satana. Orweela wa masu ni miteko sawe, Yesu aahimutakiha Muluku saana wa moota arumenle awe owerya wawe, exariya, miruku ni ophenta. Nwehe ele ntakiheryo na Yesu ninniixuttiha aya.

Yesu aanaakhaliherya atthu ni murima awe wotheene

Aahirumeela owerya aavahiwa awe ni Muluku wira aakhaliherye atthu. Mwekeekhai, Yesu aanaathokorerya atthu otheene. Nto aahirumeela owerya wawe wira aakhaliherye ale yaahaawa. Owo aahimyale so: ‘Muttitthi ula kinnònela othunku . . . khorina yolya”. (Marko 8:2) Nuumala-vo, Yesu aahipaka mwiiriirya ni khwaavaha eyoolya atthu ale yanwiriyana vaavo aixuttiha awe.

Nave-tho, Yesu aaheetta mittetthe soovirikana, wiixuttihaka ni “àvonihaka atthu, iretta saya sothene n’ikwerere saya sothene”. (Matheyo 4:23) Ti maana aya atthu anceene yaamutthara aya ni ‘ophavela omukwannya Yesu, mana mwa yowo sanikhuma ikuru sàvoniha atthu othene’. (Luka 6:19) Tthiri, Yesu khaarwenle ‘orumeliwa: [masi] arwenlé warumela atthu n’uleva ekumi awe, wira awopole atthu othene’. (Matheyo 20:28) * Mamwene makavi anooniherya mikhalelo soophenta ntoko Yesu?

Yesu aanaaphenta anamwane

Owo aahooniherya exariya ya Muluku. Yesu aaniiwelela malamulo ni malakiheryo a Muluku. Voohimya sa Yesu, Nuulumo na Muluku naahihimya wira: “Muluku aka! Wira otthuna wanyu t’unkisivela. Kinnettela ikano sanyu ni murim’aka wothene”. (Esalimo 40:9) Amutakihaka Tiithi awe, yoowo ohinimuthanla mutthu, Yesu aanaaphenta atthu otheene, eyo piiyo, athaaciri ni amasikhini, alopwana ni athiyana, anamwane ni atthu oowunnuwela. Okathi omosa, awiixutti a Yesu yaahaapwapwela atthu yaaruuha anamwane wa Yesu. Masi owo aahilavula so: “Mwahiye anamwane ekirweleke miyo. Muhakhottiheryé, mana omwene wa Muluku ti wawaya ale ari ntoko axinamwane ala”.Marko 10:14.

Yesu aahooniherya miruku sa Muluku. Yesu anaasuwela saana atthu. Owo “anisuwela mmansawe murima wa khula mutthu”. (Yohani 2:25) Okathi awanani awe yaarumme aya anakhotto wira anvare Yesu, awo yaahitikinihiwa yiiraka: “Khavo otonko olavula ntoko mulopwan’owo!” Yesu aaphwanya woowi miruku? Owo aahimyale so: “Mwixuttiho aka khuhiyó wawaka: onkhuma wa Muluku òkirumme”.Yohani 7:16, 46.

Yesu aanooniherya omoriwa ikharari okathi aavoniha awe aretta

 Owo aahooniherya Ophenta wa Muluku. Yesu aaniwoonela othunku atthu. Mwa ntakiheryo, mulopwana mmosa “namakuttula” aahinvekela Yesu iiraka: “Pwiya, mwatthunaka, munowerya okireriha!” Moomoriwa ikharari “Yesu ahòkola ntata, ahimukwannya ìraka: ‘Kinnitthuna: murerihiwe!’ Nananoru, makuttul’awe khummalela”. (Luka 5:12, 13; Marko 1:41, 42) Tthiri, Yesu aaniphavela omaliha muxankiho wa mulopwana ole oohaawa.

Munoonela sai, niireke Yesu onnookhapelelani? Yesu onaakhula so: “Nyuwo othene mukhulumunwe, mulemelinwene muritti mulupale, mukirwele miyo: komumuliheni. Mwireye muritti aka: mukihiye kolakeni, mana miyo ka mutthu òmàla ni òwiyeviha. Mwirá siso, munophwanya murettele murohoni mwanyu”.Matheyo 11:28, 29.

Tthiri, Yesu ori Mwene ooloka onireerela ahu okhalana. Owo onnitumererya so: “Mukihiye kolakeni”. Niireke munimweemya nlattulo nla noovara murima? Opaka eyo onimoophwanyihani okumi woohakalala.

^ etti. 6 Wira muthokorerye soohimmwa kamosa-kamosa voohimya sa woopola wa Yesu, nwehe muru 5, eliivuru Biibiliya Oniixuttiha Exeeni Tthiri?