Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Waamini Wekeekhai—Esiiri Eniphwanyiha Okumi Woohakalala

 MPANTTA 4

Muluku Ti Pani?

Muluku Ti Pani?

ATTHU annaalompa amuluku anceene. Masi Nuulumo na Muluku ninxuttiha wira Muluku ekeekhai ori mmosa paahi. Owo khuuvo onilikana awe; mukhulupale, ni ta mahiku otheene. Muluku topattunxe itthu sotheene siri wiirimu ni siri vathi-va, ni tonivanhe okumi. Tivonto, nihaana omulompaka yoowo paahi.

Nlamulo naahivahiwa orweela wa profeta Moise ntoko “ehapari elaleiwe ni malaikha”

Muluku ookhalana maihaneliwo manceene, masi orina nsina nimosa paahi: YEHOVA. Muluku aahimuleela Moise: “Mwahimerye atthu a Isarayeli wira: ‘[Yahvéh, Biblya Exirima] Apwiya Muluku àxitith’inyu, Muluku Àbrahamu ni a Isakhi ni a Yakobe, t’okirumme worwelani nyuwo’. Nla ti nsina naka wa mahiku othene: nla ti nsina ninrowaya okìhanela maloko othene”. (Okhuma 3:15) Nsina noowi Yahvéh wala Yehova, noolempwa ikwaha sowiiraka 7.000, mwa Nuulumo na Muluku. Voohimya sa Muluku, Esalimo 83:19, Biblya Exirima, eni: “Esuwele wi nyuwo nsina nanyu ti Yahvéh, [wala Yehova] nyuwo mekhinyu mwá Namusulú velaponi vothene”.

Soolempwa sa khalai ni matata sa Ephareya Yookhwa seiyo sinooniherya eveersu emosa ya Biibiliya ninrwa aya nsina na Muluku

Khuuvo pinaatamu otonko omoona Muluku. Muluku aahimuleela Moise: “Nyuwo khamunwerya wona ekhove aka. Khavo onwerya oweha owitho waka: ònaru, onimokhwa”. (Okhuma 33:20) Muluku onikhala wiirimu nto apinaatamu khanwerya onweha. Nto ti vootthekeya waalompa amuluku eethiru, wala opaka ilatarato sinimulikanyiherya Muluku. Omurumeelaka profeta Moise, Yehova Muluku aahiruma wira: “Muhìpakelé itthu sowùpiwa nnákhala ilatarato sa itthu s’osulu, walá sa vathí-va, nnákhala sa mowixani wa màsi. Muhikokhorelé oholo waya, muhirumelé seiyo: tthirí miyo k’Apwiya, Muluku anyu: kintthuna wira mukhalé awaka pahi”. (Okhuma 20:2-5) Muhoolo mwaya, Muluku aahimuhimeerya profeta Yesaya wira: “Miyo kà Yahvéh, [Biblya Exirima] nsina naka ti nenla. Khavo onimukawelaka ovuwa waka: miyo nkinavaha amuluku èthiru nttittimiho ninkiphwanela”.Yesaya 42:8.

Atthu akina annikupali wira Muluku ookhala, masi anoona wira khivaniweryaneya omusuwela ni omwaattamela, ni wira nihaana omoova ohiya omphenta. Nyuwo munoonela sai? Niireke Muluku onnoothokoreryani? Munoowerya tthiri omusuwela ni omwaattamela? Nrowe niwehe ele Nuulumo na Muluku ninxuttiha aya voohimya sa mikhalelo sa Muluku.