Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Waamini Wekeekhai—Esiiri Eniphwanyiha Okumi Woohakalala

 MPANTTA 11

Moota Wowooniherya Waamini Wekeekhai Olelo-va

Moota Wowooniherya Waamini Wekeekhai Olelo-va

ATTHU anceene olelo-va, anihimya wira annaamini. Masi, Yesu aixuttinhe wira atthu vakhaani paahi ti yaarowa okhalana waamini wekeekhai. Owo aahimmye so: “Mukhora mulupale n’iphiro yowokowa t’iye sinroiha worimelani: ale anvira seiyo kharere. Vano, mukhora onkeliha mwekumini ti wophunyeya, ephiro ene ti yorika: vano ale amphwanya ephiro yeyo ari vakhani”.Matheyo 7:13, 14

Moota xeeni olelo-va, atthu anooniherya aya wira aakhalana waamini wekeekhai? Yesu aahimyale so:“Munimwasuwela mwaha wa sowira saya . . . “Vekekhai, mwiri worera onnìma mihokorokho soloka: mwiri wonanara onnìma mihokorokho sohiloka”. (Matheyo 7:16, 17) Tthiri, waamini wekeekhai onnikumiherya “mihokorokho soloka”, ni onniwiiriha atthu wooniherya mikhalelo sinimusivela Muluku. Moota xeeni atthu awo anooniherya aya mikhalelo iyo?

Annirumeela Saana Owerya Orina Aya

Atthu arina waamini wekeekhai annirumeela owerya ni okhulupale aya wira amuttittimiheke Muluku ni waakhaliherya atthu akina. Yesu aahiixuttiha wira: “Ole omphavela okhala mulupale varíyari vanyu, ohana warumela akhw’awe”. (Marko 10:43) Moolikanasa, alopwana arina waamini wekeekhai, khanaahaaxa atthu a etthoko aya wala atthu akina. Awosa, annaavaha efaita axaaraya, annaattittimiha, ni mwa niphento annaavaha itthu sa werutthuni. Nuulumo na Muluku ninhimya wira: “Nyuwo alopwana: mwaphenteke amwar’inyu, muhahaxeké”. (aKolosi 3:19) “Nyuwo alopwana: mukhaleke ni nlema n’amwar’inyu, musuwelaka wira makhalelo àthiyana t’òttèttheya ovikana awinyu. Mwattittimiheke ntoko vamphwanelaya, okhala wira anohiyeriwa vamosá ni nyuwo oreriwa w’ekumi. Mwireke siso wira ehikhalé etthu enohihani olompa poromosa”.1 Pedru 3:7

Nave-tho, muthiyana ootheliwa orina waamini wekeekhai ohaana ʼomuttittimihaka iy’awe’. (aÉfeso 5:33) Axithiyana ootheliwa ahaana “waphenta axiy’aya n’an’aya”. (Tito 2:4) Anamuyari arina waamini wekeekhai, anniviriha okathi ni anaaya awiixuttihaka malamulo ni malakiheryo a Muluku. Nto, pooti okhala owaani, omutekoni, ni opuro mukina, awo annaathokorerya atthu akina moophwanelela ni nttittimiho. Awosa anitthara miruku iya sa Nuulumo na Muluku: “Mulipiheryeke ottittimihanaka mukina ni mukhw’awe”.aRoma 12:10.

Arumeyi a Muluku anniiwelela Nuulumo Nawe ninhimya wira: “Mukhotte ovahiwa makhwankwa”. (Okhuma 23:8) Awosa kanirumeela okhulupale aya wira yiittottope. Moovirikana, annimananiha waakhaliherya akina, vanceenexa ale aniviriha mixankiho. Anniiwelela moolumo ala ani: “Muhiliyalé owirela sorera akhw’inyu, mwakawelaka sirinanyu, mana mikuttho iyo ti sinimusivela Muluku”. (aHéberi 13:16) Siiso, awosa annoona wiiraneya wa masu a Yesu ani: “Mulipa óvaha onoreriwa onvikana mulipa-òvahiwa”.Miteko 20:35.

 Anneettela Exariya ya Muluku

Atthu owaamini, anniiwelela malamulo a Muluku moohikhanyereriwa. Awo annikupali wira ‘soruma sa Muluku khasinirika wettela’. (1 Yohani 5:3) Awo annisuwela wira “Soruma s’Apwiya ti sorera . . . Soruma sa Muluku ti soloka: sinnitteliha murim’ahu. Masu a Apwiya t’òwarya: annireriha witho”.Esalimo 19:8, 9.

Waamini wekeekhai onniwiiriha atthu okhoottela mikhalelo sotheene sinikumiherya onyokhana. Awosa khanivaha efaita nloko nimosa ovikana nikina, muxovo wala makhalelo a atthu. Masi, animutakiha Muluku. “Muluku khanathanla atthu. Tthiri Muluku onnaphenta atthu anloko ti nloko, yale animuttittimiha, enettela exariya”.Miteko 10:34, 35.

Waamini wekeekhai onniwiiriha atthu “wetta n’ixariya mwa sothene”. (aHéberi 13:18) Nave-tho, mutthu orina waamini wekeekhai onnisyaka waapa ni omootherya mukhwaawe. Voohimya sa atthu Muluku onaaphavela awe, Nasalimo Davidi aahilepa wiira: “Ole ohiniwotherya akhw’awe: ohiniwirela akhw’awe sotakhala, nnákhala owapa anamwattamanani awe”.Esalimo 15:3.

Annooniherya Miruku Sinikhuma wa Muluku

Ale arina waamini wekeekhai, sookupali saya sotheene sinikhuma muNuulumoni na Muluku. Awo anikupali wira “Solempwa sothene supuxeriwé ni Muluku, khukhalihiwa wira sixuttiheke ekekhai, savanyiheke ale anvonya, sattaruxeke ale anttheka, siwettiheke atthu ephiro ya xariya”. (2 Timótheyo 3:16) Vaavo anaathokorerya aya akina khula nihiku, awo annooniherya “ankhili ankhuma osulu”, yaawo ari ‘òrera, anivaha murettele, òmàla, a exariya, òsareya othunku ni miteko sorera’. (Yakobo 3:17) Awo annisyaka soolimalela soohiloka, okhwiri ni ‘annipasopa n’amuluku èthiru”.1 Yohani 5:21.

Annooniherya Ophenta Wekeekhai

Profeta Moise aahimyale so: “Mwaphenteke Apwiya Muluku anyu ni murim’anyu wothene n’iroho anyu yothene n’ikuru sanyu sothene”. (Otumererya 6:5) Atthu arina waamini, annimphenta Muluku vanci. Awo annittittimiha nsina na Muluku, Yehova. Nto, annimutthapela Yehova ni olaleya nsina nawe moororomeleya. (Esalimo 105:1) Ohiya-vo, arumeyi a Muluku anniiwelela yooruma ela: “Mumphente mukhw’inyu ntoko sinìphentanyu”. (Onamukuttho 19:18) Awo annisyaka wahaaxa akina, ni annimananiha “wiwanana n’atthu othene”. (aRoma 12:18) ‘Atthu awo annikuxa iyuma saya s’ekhotto, khiyahana ihipa: annirukunuxa mavak’aya, khiyahana ihekó’. (Yesaya 2:4) Tivonto, ‘anniphentana’ ni wiiraana elapo yotheene. (Yohani 13:35) Niireke munoowerya waasuwela atthu awo olelo-va?