Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Waamini Wekeekhai—Esiiri Eniphwanyiha Okumi Woohakalala

 MPANTTA 12

Mooniherye Wira Nyuwo Mookhalana Waamini Wekeekhai

Mooniherye Wira Nyuwo Mookhalana Waamini Wekeekhai

MULUKU aahaalopola arumeyi awe wira waamini waya, waarowa wehereriwa. Nuulumo Nawe ninhimya so: “Mwipasopeke; nwanan’inyu, Satana, onorukureryani ntoko kharamu onòpa murukulu, amphavelaka òmukhura”. (1 Pedru 5:8) Exeeni Satana onipaka awe wira ohonone waamini wanyu?

Niireke mootoko olupatthiwa mwa enamuna ela?

Satana pooti warumeela atthu akina, hata yaale munaaphenta anyu wira ewiiriheni ohiya otokosa Nuulumo na Muluku. Yesu aahimyale so: “Awanani awe mutthu t’ale a ntthoko nawe”. (Matheyo 10:36) Pooti wira amusi ni apatthani akina oohitakhala, khanisuwela ikeekhai soohakalaliha sa Nuulumo na Muluku. Wala pooti woova ele atthu akina anirowa aya wuupuwela. Masi, Nuulumo na Muluku ninhimya wira: “Owova atthu, ntaphá: mwaroromele Apwiya pahi, munimòpowa”. (Miruku 29:25) Akhala wira nyuwo munoohiya osoma Nuulumo na Muluku wira mmuhakalalihe mutthu, niireke wira eyo enoomusivela Muluku? Nnaari! Masi, akhala wira nnimooniherya waamini wekeekhai, Muluku onoonikhaliherya. “Hiyo khanihiyó atthu antthikela ottuli, enarimela: hiyo n’atthu owamini, hiyo ninnettela ephiro yo wòpowa”.aHéberi 10:39.

Muupuwele ntakiheryo na Dumas, yoole oromoliwe ottuli. Wanipacerya, amwaarawe yaaninveeha mwaha wa waamini wawe. Masi muhoolo mwaya, awo yaahipacerya osoma Nuulumo na Muluku hoothe. Nto, akhala wira nyuwo munoovilela nvaraka ele eri yooloka, munoowiiriha apatthani ni amusi anyu osoma Nuulumo na Muluku. Ikwaha sinceene, mmusi ohirina waamini wekeekhai ‘onniphwanyihiwa wamini . . . okhala wira owo onimona mwettelo anyu worera ni wottittimiheya’.1 Pedru 3:1, 2.

Satana onniwiiriha atthu wuupuwelaka wira kharina okathi woosoma Nuulumo na Muluku. Owo oniphavela wira soophavela sa okumi, ntoko waavya musurukhu ni itthu sikina, ‘ovuvurye ehapari’ vamurimani vanyu wira waamini wanyu ‘ohikumihe etthu’. (Marko 4:19) Mukhootte muupuwelo owo woohiloka! Nuulumo na Muluku ninhimya wira: “Ekumi yohimala t’ila: wosuwelani nyuwo, mukhanle Muluku mmosáru èkekhai, n’omusuwela Yesu Kristu, yowo omurummyanyu”. (Yohani 17:3) Tthiri,  ovikaniha wiixutta voohimya sa Muluku ni Yesu, ori Mesiya, ti vootthuneya wira niphwanye okumi woohimala oParayiisu!

Munvekeleke Muluku nikhaliheryo

Mmuupuwele Moise, yoole ari ntoko mwaana a emusi ya Omwene wEjiitu. Owo anwerya ophavelasa okhalana muhakhu, ovuwa, ni opuha. Masi, Moise “ahithanla ohaxiwa vamosa n’atthu a Muluku, khukhotta opuha okathi vakhani n’itthu sotakhala”. Mwaha wa xeeni? Owo “ahilipiha murim’awe, ntoko amona Muluku ohinòneya”. (aHéberi 11:24, 25, 27) Mwekeekhai, Moise aanimwaamini Muluku vanceene. Owo aahipweha yootthuna ya Muluku ohoolo wa soophavela sawe, nto khureelihiwa vanceene ni Muluku. Nto mwamutakiha Moise, Muluku onimooreelihani.

Satana onirowa oweehereryani inamuna soovirikana. Masi muheemye wira owo ooxintteni. Nuulumo na Muluku ninnilopola so: “Mmukhotteke Satana: Satan’owo onimotthyawani”. (Yakobo 4:7) Moota xeeni munrowa anyu omukhoottela Satana?

Nvikaniheke osoma Nuulumo na Muluku. Musomeke Nuulumo na Muluku khula nihiku. Musome sowiixuttiha saya. Nvarihele muteko miruku saya. Mwiira siiso, munoowerya ‘wilipiha’ ni ikaruma sotheene sa Muluku. Ikaruma iyo, sinimookhaliheryani oxintta ekhotto ya Satana.aÉfeso 6:13.

Mwataaneke ni atthu arina waamini wekeekhai. Mukhalane ompatthani ni atthu anisoma, ni wiiwelela Nuulumo na Muluku. Atthu awo ‘annùpuxeryana mukina ni mukhw’awe, [ni] wakuviheryana ophenta, n’uvara miteko sorera. Awo anoolipiha waamini wanyu.aHéberi 10:24, 25.

Mpatthaneke ni ale arina waamini ntoko nyuwo

Mmwaattameleke Yehova. Munvekele Muluku wira ookhaliheryeni ni mmuroromele. Muhiliyale wira, Muluku onniphavela wookhaliheryani. “Muhelé mmatatani [mwa Muluku] ovelavela wanyu wothene, okhala wira owo onnokhapelelani”. (1 Pedru 5:6, 7) “Muluku t’ororomeleya: khanihiya wira mwehereriwe ovikana ikuru sanyu. Okathi onehereriwanyu, Muluku onimovahani ikuru sinweryananyu ovilela n’uxintta”.1 aKorinto 10:13.

Satana onninveeha Muluku, ohimyaka wira khuuvo mutthu onirowa ovikaniha omulompa Muluku okathi wa mixankiho. Masi nyuwo mookhalana eparakha yooreerela omooniherya Satana wira nawoothe! Muluku onihimya wiira: “Nwetteleke ankhili: Siso miyo kinotteliwa murima, kinowerya omwakhula onikiveha”. (Miruku 27:11) Nto, ekhale yoolakela anyu ovikaniha wooniherya waamini wekeekhai!