Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

“Mukhaleke Mophentani Mwa Muluku”

 APENDISE

Wuntela Ebandera, Mwaathanle, ni Miteko Soohikhala sa Epoliitika

Wuntela Ebandera, Mwaathanle, ni Miteko Soohikhala sa Epoliitika

Wuntela ebadeira. Anamoona a Yehova anikupali wira okokhorela ebandeira aahiiso wuntela, otthariheliwaka ni hino, ori okokhorela Elapo aahiiso atthu anihoolela elapo eyo, ohiya omukokhorela Muluku. (Yesaya 43:11; 1 aKorinto 10:14; 1 Yohani 5:21) Muhooleli mmosa yoowo aaphavela ovuwihiwa, aari Nabukhodonosori Mwene ooBabilonia. Ophavelaka owooniherya atthu okhulupale awe ni nthiti nawe na etiini, mwene ola aari oowerya, aahipaka elatarato yuulupale ni aahaakhanyererya atthu okokhorela, vaavo wimpwa aya muusika, ntoko hino. Masi aHeeberi araru, Xadraki, Mexaki ni Abedi-Nego yaahikhootta okokhorela elatarato ele, nnaamwi yaasuwenle wira yaarowa wiiviwa.Daniyeli, ekapitulu 3.

Mulipa-onilepa soohimmwa, oniitthaniwa Carlton Hayes, ohimmye wira olelo-va “ebandeira etthu enikokhoreliwa mulaponi. Alopwana annirula ixapewu saya yaavirihiwaka ebandeira; alipa-oolepa ipoesia annilepa ipoema sinivuwiha ebandeira, ni anamwane annimwiipa hino”. Mulipa-oolepa ole onnincererya oriki: atthu yaale anooniherya munepa woophavela waakiherya elapo, aakhalana “mahiku anuupuwelela aya”, ntoko nihiku 4 na Julyo nenno nintthapeliwa entepentensia ya Estados Unidos, nave-tho atthu awo aakhalana “atthu oovuwa” anaatthapela aya. Okathi waapakiwa niira nimosa oBrasil, ministro aanakhotto aahimmye so: “Ebandeira ennikokhoreliwa . . . ntoko siisaale atthu anivuwiha aya elapo aya”. Nave-tho, The Encyclopedia American yaahihimya wira “ntoko siisaale mwiikimanyo oryaaya woowaarya, nave-tho ebandeira ti yowaarya”.

Enciclopedia ela ehimmwale, ennilavula-tho wira hino “ti moolumo anooniherya wira mutthu onnaakiherya elapo awe, ni ikwaha sinceene onihela muhina onvekela Muluku wira oweettiheke ni aakhapeleleke atthu a elapo eyo aahiiso anamalamulela aya”. Anamoona a Yehova khanivonya vaavo anuupuwela aya wira iferiyatu sa mulaponi seiye sinihela muhina wuntela ebandeira aahiiso omwiipa hino, itthu sa etiini. Okathi yaalavula aya voohimya sa anamwane a Anamoona a Yehova anikhootta wuntela ebandeira aahiiso ommana natiri wira anookhalaka oororomeleya wa elapo ya Estados Unidos, eliivuru eniitthaniwa The American Character, ehimmye so: “Myaha sinceene siphukiwe ni etribunaali yuulupale, sinnooniherya wira sowiira iyo sihimmwale sinnivarihana ni etiini”.

Nnaamwi atthu a Yehova ahiirelaka mpantta sowiira iyo sinitthekela malamulo a Biibiliya, awo annaattittimiha ale aniirela mpantta. Nave-tho, Anamoona annittittimiha ebandeira ntoko ethoonyeryo ya elapo, ni annaattittimiha makhulupale avahiwe olamulela, yaathokoreryaka okhala “alupale anettiha elapo”, yaawo ‘aninvarela muteko Muluku’. (aRoma 13:1-4) Tivonto, Anamoona a Yehova anniiwelela yootumererya eni: “Mwalompeleke mamwene ni matokwene othene”. Etthu enniiriha opaka eyo tiila: hiyo nimphavela wira “nikhalane okumi worera ni wa murettele, nimuttittimihaka Muluku, nettaka vophwanela”.1 Timótheyo 2:2.

Mwaathanle. MaKristau eekeekhai annaattittimiha ale aniirela mpantta mmwaathanleni. Awo khanaavirikanya ale animulaleya mwaathanle, ni anniwiiwelela ale anithanliwa. Masi, khaniirela mpantta myaha sa epoliitika sa mulaponi. (Matheyo 22:21; 1 Pedru 3:16) Exeeni muKristau onrowa awe opaka akhala wira elapo awe atthu otheene annikhanyereriwa orowa othanla, aahiiso yaale ahinrowa omwaathanleni annilupatthiwa? Wuupuwela wira Xadraki, Mexaki, ni Abedi-Nego yaahirowa nipuro naapakiwe elatarato nniihaniwa Dura, onoomukhaliherya muKristau othanla moovarihana ni yowuupuxerya ya murima awe, akhala wira pooti orowa omwaathanleni aahiiso nnaari. Masi muKristau owo ohaana ovaha ephoole wira ohihonone ororomeleya wawe. Ohaana wuupuwelela soolakiherya thanu namosa sa Biibiliya sinttharelana:

  1. Atthareli a Yesu ‘khaniirela mpantta olumwenku’.Yohani 15:19NM.

  2. MaKristau animuthoonyerya Kristu ni Omwene awe.Yohani 18:36; 2 aKorinto 5:20.

  3. Atthu otheene a muloko wa eKristau anikupali itthu imosaru, ni ophenta ntoko wa Kristu toniwiiriha okhala oowiiraana.1 aKorinto 1:10; aKolosi 3:14.

  4. Ale animuthanla mutthu wira ohooleleke, annikhalana nthowa na ele enipaka awe.—Nwehe malakiheryo anihimmwa mu 1 Samuweli 8:5, 10-18 ni 1 Timótheyo 5:22.

  5. Mwaha wa anaIsarayeli onvekela muhooleli oopinaatamu, Yehova aathokorerya wira atthu ale yaahimukhootta.1 Samuweli 8:7.

  6. MaKristau ahaana olavulaka mootaphuwa ni atthu a ipartido sotheene voohimya sa eguvernu ya Omwene wa Muluku.Matheyo 24:14; 28:19, 20; aHéberi 10:35.

Ovara miteko soohikhala sa epoliitika. Ilapo sikina, eguvernu aya ennivekela wira ale anikhootta orowa etoropa avareke miteko sikina sihinivarihana ni etoropa. Akhala wira etthu eyo enniniiraneela, nohaana toko ovekela, ni khino ovaanela ni anna a mmulokoni oowunnuwela, nto khiyapaka yoothanla ahu moovarihana ni yowuupuxerya ya murima ahu yiixuttihiwe ni Biibiliya.Miruku 2:1-5; aFilipi 4:5.

Nuulumo na Muluku nnihimya wira nohaana ‘owìwelela alupale anettiha elapo ni makhulupale makina: niweleleke, nikhaleke òlikanene ovara miteko sorera sothene. . . . Narereleke murima atthu othene mahiku othene’. (Tito 3:1, 2) Nuupuwelelaka masu ala, nto nohaana wiikoha so: ‘Kiireke wira weemererya muteko ola ohinivarihana ni epoliitika waamuhonona ororomeleya waka aahiiso waamukiiriha wiirela mpantta etiini yoowoka?’ (Mikeya 4:3, 5; 2 aKorinto 6:16, 17) ‘Kiireke wira ovara muteko ola waamwiiriha okhala voorika aahiiso okhoottiherya omaleliha miritti saka sa eKristau?’ (Matheyo 28:19, 20; aÉfeso 6:4; aHéberi 10:24, 25) ‘Aahiiso, kiireke wira ovara muteko ola waamukikhaliherya wuncererya miteko saka somunepani, khino kikelaka muteko woolaleerya mookathi wotheene?’aHéberi 6:11, 12.

Akhala wira muKristau moohikhanyereriwa onnithanla ovara muteko ohinivarihana ni epoliitika, ohiya orowa mukhatteya, maKristau makina ahaana ottittimiha yoothanla awe. (aRoma 14:10) Masi akhala wira khoniphavela ovara muteko owo, akina ahaana ottittimiha-tho yoothanla awe.1 aKorinto 10:29; 2 aKorinto 1:24.