Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

“Mukhaleke Mophentani Mwa Muluku”

 APENDISE

Owara Nleeso, Okathi Ene ni Mathowa Aya?

Owara Nleeso, Okathi Ene ni Mathowa Aya?

Okathi xeeni ni nthowa xeeni muthiyana muKristau onitthuneya awe owaraka nleeso moovarihana ni okokhorela wawe? Nrowe nthokorerye ele murummwa Paulo uupuxeriwe awe olepa mmwaha ola. Owo onnivaha malakiheryo annikhaliherya opaka soothanla sooloka sinimuttittimiha Yehova. (1 aKorinto 11:3-16) Paulo ohooniherya iponto tthaaru sinreerela othokorerya: (1) miteko seiye muthiyana onitthuneya awe ovara owanre ene nleeso, (2) okathi aarowa awe owara nleeso, ni (3) mathowa animwiiriha muthiyana wiiwelela nlamulo nna.

Miteko sene. Paulo aahihimya miteko miili: nivekelo ni olaleya. (Iversiikulu 4, 5) Ovekela ontaphulela olavula ni Yehova mookokhorelani. Olelo-va, muteko wowiixuttiha itthu siri mBiibiliyani, yoowo onivariwa ni muKristau, onlikana ni ole waavariwa ni maprofeta. Niireke wira Paulo aahimya wira muthiyana aahaana owaraka nleeso khuta okathi aavekela awe aahiiso wiixuttiha ekeekhai ya Biibiliya? Nnaari. Mwaha woowi eyo enlipa ni mikhalelo sikhanle okathi owo.

Okathi ene. Paulo aahimya mikhalelo miili, eyo piiyo, vatthokoni ni mmulokoni. Owo onihimya so: “Mulopwana ti murú wa mwar’awe. . . . Masi muthiyana ohinkhunela muru okathi onlompawe, walá okathi onlaleyawe ni nsina na Muluku, oninveha iy’awe, ori muru awe”. (Iversiikulu 3, 5) Vatthokoni, mulopwana tori muru wa etthoko othanliwe ni Yehova. Akhala wira muthiyana khonittittimiha ohoolela wa iyawe, onoomuulihiha muru iyawe owo, akhala wira oneererya ovara miteko seiye iyawe ovahiwa awe ni Yehova. Mwa ntakiheryo, akhala wira ti vootthuneya muthiyana ohoolela yoosoma ya Biibiliya iyawe oryeene vaavo, muthiyana owo ohaana owara nleeso, ooniheryaka ottittimiha okhulupale wa iyawe. Murokora ola ohaana owara nleeso, hata mulopwana owo obatiziwe ene wala ohibatiziwe, okhala wira muhooleli a etthoko. * Akhala wira murokora owo onoovekela aahiiso wiixuttiha, oryeene ni mwanawe oobatiziwa, ohaana owara nleeso. Opaka eyo khentaphulela wira mwaana owo muhooleli a etthoko, masi onipaka eyo mwaha wa okhulupale onivahiwa aya alopwana oobatiziwa mmulokoni mwa eKristau.

Olavulaka sa mmulokoni, Paulo oni: ‘Akhala ontthuna okivanya, asuweleke wira nnákhala hiyo nnákhala ikereja miloko, sikina khinlimalelinhe enamuna ekina’. (Eversiikulu 16) Mmulokoni mwa eKristau, alopwana oobatiziwa tanihoolela. (1 Timótheyo 2:11-14; aHéberi 13:17) Alopwana paahi, tanithanliwa okhala axitokweene a mmulokoni wala arummwa oorumeela, wira avareke miteko anivahiwa aya ni Muluku moophavela okhapelela nikoto na Muluku. (Miteko 20:28) Nave-tho, ikwaha sikina, nthowa na mikhalelo soovirikana sinikhumelela, pooti muthiyana muKristau ovekeliwa ovara muteko yoowo okhala wene onivariwa ni munna oobatiziwa. Mwa ntakiheryo, murokora owo pooti ohoolela muthukumano wa orowa olaleerya, akhala wira khokhanle munna oobatiziwa oniphwanelela ohoolela muthukumano owo. Aahiiso pooti wira owo oniiriha yoosoma ya Biibiliya ya vatthokoni masi oryeene ni munna oobatiziwa. Nto, okhala wira iyo miteko sa mmulokoni, murokora owo ohaana owara nleeso ooniheryaka wira onnisuwela wira muteko onivara awe, okhala wene onivariwa ni mulopwana.

Masi, sookhala mikhalelo sikina murokora ohinvekeliwa awe owara nleeso. Mwa ntakiheryo, owo pooti ohiwara nleeso okathi onivaha awe ikomentaario mmulokoni, wala aalaleeryaka empa ni empa ni iyawe aahiiso munna mukina oobatiziwa, wala aasomaka aahiiso ovekela ni mwanawe oohibatiziwa. Mwekeekhai, pooti okhumelela makoho makina voohimya sa mwaha ola, nto yakhumelela vale, murokora owo pooti ophavelasa waakhuliwa waya omurumeelaka Biibiliya ni iliivuru sa anamoona a Yehova. * Masi akhala wira khonisuwela oratteene etthu yoopaka, ni yowuupuxerya ya murima awe enimutumererya owara nleeso, owo pooti owara, ntoko sinooniheriwa ni efooto eri epaaxina yeela.

Mathowa aya. Eversiikulu 10 ennihimya mathowa manli animwiiriha muthiyana wiiwelela yooruma ela: ‘Ti vavo muthiyana varinawe mmuruni nlepa [ekanyeryo], n’omwiwelela iy’awe, mwaha wa malaikha’. Wanipacerya, nwehe nuulumo noowi ‘nlepa, n’omwiwelela iy’awe’. Owara nleeso mmuruni, ethoonyeryo yoowi muthiyana owo onnittittimiha okhulupale Yehova onaavaha awe alopwana oobatiziwa mmulokoni. Nave-tho, ethoonyeryo ya omphenta wawe Yehova Muluku ni ororomeleya. Nthowa na nenli nimphwanyaneya ni masu ani: “mwaha wa malaikha”. Vaavo muthiyana vaniwara awe nleeso, malaikha anoonela sai?

Malaikha, annisiveliwa vanceene vaavo vaniweha aya wira mulokiheryo wa Yehova ori wiirimu hata valaponi, onnittittimiha okhulupale wa Muluku. Nave-tho, annittottela mureerelo vaavo vaniweha aya ntakiheryo nooloka na apinaatamu oottheka. Nto, malaikha ala ahaana wiiwelelaka murehereryo wa Yehova, okhala wira khalai malaikha makina khiyiiwelenle okathi yeehererinwe aya. (Yuda 6) Vano, malaikha anniixutta etthu, vaavo vaninweha aya murokora orina osuwela ni oniwerya opaka itthu somunepani onvikana mulopwana oobatiziwa; hata vari siiso, murokora owo onniiwelela mowaakuveya okhulupale wa mulopwana. Ikwaha sikina, pooti okhala muthiyana muKristau oothanliwa wira alamuleleke ni Kristu momweneni. Muthiyana ola onrowa okhalana okhulupale muulupalexa ovikana malaikha, okhala wira owo onrowa olamulelaka ni Kristu wiirimu. Mwekeekhai malaikha anniweha oratteene ntakiheryo nooloka na muthiyana owo! Tthiri, ela eri eparakha yuulupale arokora otheene wiiwelela mowiiyeviha, orweela mwa mweettelo aya woororomeleya ni wiixiiweleliha, ohoolo wa imilyau sinceene sa malaikha oororomeleya!

^ etti. 3 Muthiyana muKristau, khaarowa ovekela ni masu oowiiwanyeya ohoolo wa iyawe oobatiziwa, vahikhanle wira iyawe owo onoowereiwa, nto khihiyawerya olavula.

^ etti. 2 Mwaphavela soohimmwa sikina, xontte munwehe A Sentinela 15 a Julyo, 2002, ipaaxina 26-7, ni a 15 a Akosto, 1977, ipaaxina 509-12.