Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

“Mukhaleke Mophentani Mwa Muluku”

 MURU 5

Moota Wookhala Oovirikana ni Olumwenku

Moota Wookhala Oovirikana ni Olumwenku

‘Nyuwo khamuniirela mpantta olumwenku’.YOHANI 15:19NM.

1. Etthu xeeni Yesu aattittimihenrye awe ohiyu wookiserya valaponi ntoko pinaatamu?

OHIYU wookiserya wa okumi awe ntoko pinaatamu, Yesu aahooniherya oxanka wawe wuulupale mwaha wa itthu saarowa owiiraneela atthareli awe muhoolo. Tivonto aavekenle awe aTithi awe, oriki: ‘Nkinovekelani wira mwakumihe valaponi, masi, wira nwakiherye mutakhali. Awo khahiyó a vathí-va, sisale miyo kihikhanlyaka a vathí-va’. (Yohani 17:15, 16) Yooveka Yesu aapanke awe ni murima wotheene, yaahooniherya wira aanaaphenta vanceene atthareli awe, ni wira masu aahimenrye awe atthareli awe akina ohiyu yoole yaari ootthuneya. Owo aahimye so: ‘Nyuwo khamuniirela mpantta olumwenku’. (Yohani 15:19, NM) Tthiri, Yesu aaphavela wira atthareli awe akhale oovalaana ni olumwenku!

2. ‘Olumwenku’ xeeni Yesu aahimya awe?

2 Nuulumo na Yesu noowi ‘olumwenku’, nintaphulela olumwenku wa apinaatamu otheene amurukunuwenle Muluku, aneettihiwa ni Satana, ni akhalihiwe ipottha sa wiitthuna, wiixinnuwiha onikumiheriwa ni Satana. (Yohani 14:30; aÉfeso 2:2; 1 Yohani 5:19) Tthiri, ‘opatthana ni olumwenku ola onninvirikanya Muluku’. (Yakobo 4:4) Vano, vaniweryaneya sai mutthu oniphavela okhala moophentani mwa Muluku, okhala molumwenkuni masi khukhala oovirikana ni olumwenku? Mwa inamuna tthaaru sinrowa ahu othokorerya: nikhalaka oororomeleya wa Omwene wa Muluku onilamuleliwa ni Kristu ohiniirela mpantta ipoliitika sa mulaponi; nikhoottaka munepa wootakhala wa olumwenku ola; nooniheryaka wiiyeviha mmoota oniwara ahu ni wiitthokiha;  nikhalanaka niitho nooluluwanya; ni niwaraka ikaruma sa ekhotto ya omunepani.

MUKHALE OOROROMELEYA NI OHIIRELA MPATTA OLUMWENKU

3. (a) Yesu oonela sai myaha sa epoliitika sa mahiku awe? (b) Xeeni ohimmwaka wira atthareli oowoottihiwa a Yesu anirumeela ntoko anamitthaka? (Muthokorerye enoota.)

3 Yesu khiirela mpantta myaha sa epoliitika okathi ole, masi aakhalela nthiti olaleerya Omwene wa Muluku, olamulelo wa wiirimu yoowo aarowa awe okhala Mwene muhoolo. (Daniyeli 7:13, 14; Luka 4:43; 17:20, 21) Tivonto, okathi Yesu aari awe ohoolo wa Namalamulela a oRoma, Ponsio Pilato, aahimyale so: “Omwene aka khuhiyó wa vathí-va”. (Yohani 18:36) Atthareli awe oororomeleya annitthara ntakiheryo nawe, akhalaka oororomeleya wa Kristu ni Omwene awe, ni alaleyaka Omwene owo valaponi. (Matheyo 24:14) Murummwa Paulo aalempe so: ‘Hiyo na anamitthaka a Kristu. Ntoko anamitthaka a Kristu nnovekelani wira mutthikele watàna ni Muluku’. *2 aKorinto 5:20.

4. Moota xeeni maKristau eekeekhai anooniherya aya wira annikhaliherya moororomeleya Omwene wa Muluku? (Nwehe ekaaxa eri “ MaKristau Oopacerya Khiyiirela Mpantta Olumwenku.”)

4 Okhala wira namitthaka onivara itthu sirummwale awe ni mwene aahiiso elapo awe, owo khaniivolowiha myaha sa elapo eveleliheriwe awe; tthiri khoniirela mpantta. Namitthaka onikhaliherya eguvernu ya elapo awe. Nto etthu emosaru ehaana wiireya ni atthareli oowoottihiwa a Kristu, yaawo ‘elapo aya eri wirimu’. (aFilipi 3:20) Tivonto, mwaha wa nthiti naya na olaleerya Omwene, aakhaliherya imilyau sinceene sa “ipwittipwitthi sikina” sa Kristu wira “satàne ni Muluku”.  (Yohani 10:16; Matheyo 25:31-40) Ipwittipwitthi sikina sinirumeela ntoko atthu oorummwa ni Kristu, yaakhaliheryaka anna oowoottihiwa a Yesu. Ntoko nikoto nowiiraana ninkhaliherya Omwene wa Mesiya, igrupu iyo piili, sinnivikaniha ohiirela mpantta myaha sa ipoliitika sa mulaponi.Mmusome Yesaya 2:2-4.

5. Moota xeeni muloko wa eKristau oryaaya woovirikana ni aIsarayeli a khalai, ni onoonihereya sai ovirikana iwo?

 5 Ororomeleya waya wa Kristu khahiyo paahi ti etthu eniwiiriha maKristau eekeekhai ohiirela mpantta olumwenku ola. Voovirikana ni aIsarayeli a khalai, Muluku aahavaha elapo emosa wira akhaleke, hiyo niri epantte ya emusi yowiiraana ya anna a olumwenku wotheene. (Matheyo 28:19; 1 Pedru 2:9) Tivonto vaakhanle wira hiyo ninkhaliherya myaha sa epoliitika, nto khinaarowa owerya olavulaka ekeekhai ni murima ahu wotheene, nave wiiraana wahu wa eKristau waarowa okhala weethiru. (1 aKorinto 1:10) Nave-tho, okathi wa ekhotto, hiyo naarowa owanaka ni maKristau akhwiihu, yaawo anirummwa ahu waaphenta. (Yohani 13:34, 35; 1 Yohani 3:10-12) Tivonto Yesu aahimyale awe wa awiixutti awe wira ahiwaneke ekhotto. Masi khwaahimeerya wira yahaana waaphentaka awanani aya.Matheyo 5:44; 26:52; nwehe ekaaxa eri, eni: “ Kiireke Kinnivikaniha Ohiirela Mpantta Olumwenku?

6. Moota xeeni wiivahererya wahu wa Muluku onnikhaliherya aya osuwela weettiherya myaha sa Seesari?

6 Ntoko maKristau eekeekhai, hiyo noovahererya okumi ahu wa Muluku, ohiya wa mutthu, hata mutthenkeso wa apinaatamu, wala elapo. Yoolepa ya 1 aKorinto 6:19, 20 enihimya so: “Nyuwo khamuhiyó anene mmansinyu. vekekhai murothummwa n’isisapo emosá”. Ekeekhai wira anninvaha “Seesari” itthu sinimphwanela, ntoko nttittimiho, mpoosito ni wiiwelela itthu sikina Muluku oneemererya awe, masi atthareli a Yesu ahaana onvaha “Muluku ekhanle ya Muluku”. (Marko 12:17; aRoma 13:1-7) Itthu sikhanle sa Muluku, sinihela muhina omukokhorela, omphenta ni murima aya wotheene ni omwiiwelela. Vakhala wira ti vootthuneya, awo anneemererya okhwa mwaha wa Muluku aya.Luka 4:8; 10:27; musome Miteko 5:29; aRoma 14:8.

MUKHOOTTE MUNEPA WA OLUMWENKU

7, 8. “Munepa” xeeni ori wa mulaponi, nto oniweettiha sai apinaatamu oohiiwelela?

7 Enamuna ekina maKristau anivalaana aya ni olumwenku,  ori okhootta munepa wootakhala wa olumwenku ola. Murummwa Paulo aalempe so: ‘Hiyo khinàkhenle munepa wa elapo, nàkhenle munepa onkhuma wa Muluku’. (1 aKorinto 2:12, Biblya Exirima.) Nave-tho aalepelaka atthu a wEfeso, aahimmye so: “Nyuwo mwanettela makhalelo . . . a vathí-va; mwamwiwelela mukhulupale a ikuru [epheyo] sotakhala siri osulu, munepa yowo oniwettiha vano ale ahinimwiwelela Muluku”.aÉfeso 2:2, 3, Biblia—Solempwa sa Muluku.

8 “Epheyo” eyo ya mulaponi aahiiso munepa, ti ikuru sihinooneya, seiyo sinaatumererya atthu ohimwiiwelela Muluku ni ‘ophavela itthu sonanara, ni ophavela okhalana sothene sìnonaya’. (1 Yohani 2:16; 1 Timótheyo 6:9, 10) “Ikuru” sa epheyo eyo sinniwerya okumiherya itthu sinisiveliha erutthu yoottheka, ni ti sootakhala, soowoka, ni sinniphwanyaneya mapuro otheene. Ohiya-vo, ikuru iyo, sinnimwiiriha mutthu opacerya vakhaani-vakhaani wooniherya mikhalelo soohiloka ntoko wiitthuna, wiixinnuwiha, nrima, muupuwelo woophavela weettela murima awe paahi ni waavanyiha ale avahiwe okhulupale. * Niire so: munepa wa olumwenku onniwiiriha apinaatamu wooniherya vamurimani vaya mikhalelo sa Satana.Yohani 8:44; Miteko 13:10; 1 Yohani 3:8, 10.

9. Munepa wa valaponi oniwerya sai ohapuwela muupuwelo ni murima ahu?

9 Niireke vanniweryaneya munepa owo ovolowa mmupuwelo ni vamurimani vanyu? Aayo, akhala wira khamuniithokorerya. (Musome Miruku 4:23.) Munepa owo onipacerya vakhaani-vakhaani olovowa vamurimani, woonasa wene mwaha wopatthana atthu anikhala ntoko tooloka, masi ahinimphenta Yehova. (Miruku 13:20; 1 aKorinto 15:33) Vanniweryaneya-tho nyuwo ovariwa ni munepa owo wootakhala orweela wa iliivuru soohiloka, isaite sa Internet sa epornografia, anammwareya; otthekula woohiloka, axooku anikumiherya owana-wana; niire so, khula mutthu aahiiso etthu,  erina muupuwelo wa Satana wala wa olumwenku ola wootakhala.

10. Ninrowa okhoottela sai munepa wa valaponi?

10 Ninrowa owerya sai okhoottela munepa wootakhala wa olumwenku wira nikhaleke moophentani mwa Muluku? Orweela wa ottottela mureerelo marehereryo oomunepani a Yehova ni opaka mavekelo wira nivahiwe munepa wootteela wa Muluku. Yehova ti muulupale onvikana Diabo wala  olumwenku ola oneettihiwa ni Satana. (1 Yohani 4:4) Tthiri, nihaana otepaka olompa wira nivikanihe wataana ni Yehova!

OWARA NI WIITTHOKIHA VOOPHWANELA

11. Moota xeeni munepa wa olumwenku onihonona aya mawarelo ooloka?

11 Mawarelo, wiitthokiha, ni wiirattela wa mutthu, eri enamuna ekina enooniherya munepa orina awe mutthu owo. Ilapo sinceene, mawarelo a atthu anootepa ohiloka, tivonto mulopwana mmosa onivaha ikomentaario va eprograma ya televisau, aahihimya wira voohipisa khivanrowa ohala ikuwo siniwariwa ni anamararuwa. Ntoko sinihimya aya exornaale emosa, hata anamwane axithiyana ahiphiyale iyaakha 10, ‘anniwara ikuwo sookhuveya, nto khiyooniherya ipantte sikina sa erutthu aya’. Enamuna ekina ori owara vohiitthokiha, enamuna eyo enooniherya murima woohiphavela wiiwelelea ni ohiivaha efaita wala nttittimiho.

12, 13. Malakiheryo xeeni a Biibiliya anrowa ahu ottharihelaka voohimya sa mawarelo ni wiitthokiha?

12 Okhala wira hiyo na arumeyi a Yehova, nihaana otthokiha saana mawarelo ahu, niwaraka ikuwo sooreerela ni sooratteliwa, moovarihana ni opuro onirowa ahu. Okathi wotheene mawarelo ahu akhaleke ‘ohuliha muru ni vohìsona’, ni a “miteko sorera”, ntoko simphwanela aya wa alopwana ni athiyana ‘animuttittimiha Muluku’. Masi, hiyo khanikhanle oowara mwaha woophavela wira atthu otheene eniweheke paahi, masi nimmananiha ‘okhala mophentani mwa Muluku’. (1 Timótheyo 2:9, 10; Yuda 21) Aayo, hiyo nimphavela wira ‘orera wahu okhalé wa murim’ahu. Orera weiwo tori wulupale va maithoni va Muluku’.1 Pedru 3:3, 4.

13 Muupuweleke-tho wira, ikuwo sahu ni wiitthokiha wahu pooti owiiriha atthu akina ottottopela aahiiso onyohola okokhorela wekeekhai. Nuulumo na eGriki noowi ‘ohuliha muru’ wala ophwanela, vaavo vanirumeeliwa aya moovarihana ni mweettelo, nintaphulela ottittimiha moonelo ni muupuwelelo wa atthu akina. Enamuna eniwara ahu ehaana wooniherya wira ninnithokorerya vanceenexa yowuupuxerya  ya murima ya atthu akina ovikana soophavela sahu. Ohiya-vo, hiyo nimphavela omuttittimiha Yehova ni ale animurumeela, niphavelaka wira niphwanele okhala arumeyi awe, nipakaka itthu “sothene vonvuwiha Muluku”.1 aKorinto 4:9; 10:31; 2 aKorinto 6:3, 4; 7:1.

Kiireke ikuwo siniwara aka sinnimuhakalaliha Yehova?

14. Voohimya sa mawarelo ni wiirattela wahu, makoho xeeni anireerela ahu opaka?

14 Okathi onirowa ahu olaleerya wala omuthukumanoni, nihaana ovaha ephoole mawarelo ahu, wiitthokiha ni wiirattela wahu. Vano mwiikoheke so: ‘Kiireke mawarelo aka ni wiirattela waka onniwiiriha atthu akina okiwehexexa? Kiireke iwarelo saka sinniwiiriha akina wuuliwa muru? Kiireke kinnitepa ovaha efaita mawarelo aka aahiiso wiitthokiha waka, ovikana ophavela opaka itthu sinrowa okiiriha ophwanela waakhela miritti mmulokoni?’Esalimo 68:7; aFilipi 4:5; 1 Pedru 5:6.

15. Nthowa xeeni Nuulumo na Muluku nihinivaha aya elista ya moota woowara, wiitthokiha, ni wiirattela wahu?

15 Biibiliya khonaavaha maKristau elista ya malamulo a enamuna yoowara, wiiphwaneliha ni wiirattela. Yehova khoniphavela onikhoottiherya orumeela otaphuwa ovahiwe ahu wira nithanleke itthu, wala enamuna yorumeela muupuwelo ahu. Ohiya-vo, owo oniphavela wira hiyo nikhale atthu ookhoomala anisuwela wuupuwelela miruku sa Biibiliya ni ‘walimaleliha ankhili ahu wira nisuweleke othanla sorera ni sotakhala’. (aHéberi 5:14) Etthu yootepexa, owo oniphavela wira hiyo neetteleke niphento, eyo piiyo, omphenta  Muluku ni apinaatamu akhwiihu. (Mmusome Marko 12:30, 31.) Eriyari ya malakiheryo awo, sookhala inamuna sinceene soovirikana sa mawarelo ni wiitthokiha. Eyo ennooneya mwa inamuna sinceene sa mawarelo ooreera ni oovirikana eriyari ya atthu oohakalala a Yehova, voohicikha etthu sa opuro onithukumana aya.

NVIKANIHE OKHALANA NIITHO NOOLULUWANYA

16. Munepa wa mulaponi onivirikanya sai sowiixuttiha sa Yesu, ni makoho xeeni anireerela ahu opaka?

16 Munepa wa mulaponi ti wootthepya ni onniwiiriha atthu imilyau sinceene ophavela vootepana musurukhu ni itthu sinihakalaliha erutthu paahi. Masi, Yesu aahimyale wira: ‘muhikhalé atthu òwùnlela muhakhu, okhala wira ekumi ya mutthu thajiri khenlipa ni watta wa mihakhu sirinawe’. (Luka 12:15) Nnaamwi Yesu ahaaphavela waatumererya atthu wiikhoottiherya itthu sooloka, owo aahiixuttiha wira otteeliwa murima  wekeekhai onikhumelela vaavo vaniheliwa aya nipuro noopacerya itthu somunepani ni ovikaniha okhalana niitho nooluluwanya, nenlo ninwehexexa paahi itthu somunepani. (Matheyo 5:3; 6:22, 23) Nto mwiikoheke so: ‘Kiireke kinnikupali ele Yesu aixuttinhe awe, wala kinihapuxiwa ni “tithi a wothá”? (Yohani 8:44) Anooniherya exeeni, moolumo, soolukama, soothanla saka ni enamuna eneettaka?’Luka 6:45; 21:34-36; 2 Yohani 6.

17. Muhimye mireerelo sikina aniphwanya aya ale anivikaniha okhalana niitho nooluluwanya.

17 Yesu aahimmye wira: “Ankhili annòneya okhala òloka mwaha wa miteko saya”. (Matheyo 11:19) Muthokorerye mireerelo sikina aniphwanya aya ale anivikaniha okhalana niitho nooluluwanya. Awo anniphwanya ohakalala wuulupale vaavo vanivara aya miteko sa Omwene wa Muluku. (Matheyo 11:29, 30) Annihuluwa oxankiheya woohireerela ni masooso maalupale. (Mmusome 1 Timótheyo 6:9, 10.) Mwaha woohakalala ni itthu vakhaani sirina aya, annikhalana okathi munceene wootthekula ni etthoko aya vamosa ni maKristau makina. Annirupa saana ahixankelaka etthu. (Musuweli 5:12) Annoona oreera ovaha, nto annipaka eyo mwa itthu sotheene siniwerya aya. (Miteko 20:35) Nave, annitepa okhalana nlipelelo, murettele, ni ohakalala ni itthu seiye mutthu orina awe. (aRoma 15:13; Matheyo 6:31, 32) Tthiri mareeliho ala annivikana itthu sotheene!

NWARE IKARUMA SOTHEENE SA “EKHOTTO”

18. Biibiliya onihimya exeeni sai nwanani ahu, moota siniwana awe ni enamuna ya ekhotto ene?

18 Ale anivikaniha okhala moophentani mwa Muluku, annikhapeleliwa momunepani, maana Satana onaavya omala-maliha ohiya ohakalala paahi masi-tho nlipelelo na ekumi ehinimala nirina aya maKristau. (1 Pedru 5:8) Murummwa Paulo aahimyale wira hiyo nookhalana ekhotto, masi “khanniwàna nivirikanyaka owerya w’atthu; ekhotto eniwànahu ti yovirikanya minepa sotakhala s’osulu, ni owerya n’ikuru ni makhulupale a elapo ela, eri mwepiphini”. (aÉfeso 6:12;  Biblia—Solempwa sa Muluku) Moolumo ataphuleliwe ‘owana’, anihimya ekhotto yeele atthu enivaraana aya ewanaka, ohiya ekhotto eniwaniwa atthu erakamelanne ene, wala yiipinthe ene nipuro noovareleleya. Nave-tho moolumo oowi iguvernu, “owerya” ni “makhulupale a elapo”, anooniherya wira ekhotto eyo ti yootthokiheya ni yookhalana yoolakela aya.

19. Mutthokiherye ikaruma soomalela sa ekhotto sa muKristau.

19 Masi, hata niryeene ootteettheya mwaha wookhala apinaatamu, hiyo nnoowerya oxintta ekhotto eyo. Moota xeeni? Niwaraka ‘ikaruma sa ekhotto ya Muluku’. (aÉfeso 6:13) Eliivuru ya aÉfeso 6:14-18 ennilavula sa ikaruma iyo eriki: ‘Tivó, mukhaleke òlikanene! Mwitthukele muyununi ni esintura, eri ekekhai. Nware yowara y’ayuma, eri exariya. Nware ixapattho, okhanle wakuvela olaleya ehapari yorera ya murettele. Okathi wothene nvarelele nikula na wisakihana, ori wamini; siso munowerya ottipiha matthere a moro anvonyiwa ni mutakhali. Nware-tho ekapaseti ya yuma, ori ororomela wopowa; mukuxeke nivaka na munepa, ari masu a Muluku. Mwireke mulompaka vanjene n’uvara metto, mulompeke okathi wothene, mwettihiwaka ni munepa’.

20. Ekhotto ahu enivirikana sai ni ekhotto ya apinaatamu?

20 Okhala wira Muluku tonnivaha ikaruma iyo somunepani, nto sinoowerya onaakiha akhala wira ninrowa owaraka okathi wotheene. Voovirikana ni anakhotto a mulaponi, yaawo ikwaha sikina aniviriha okathi munceene ahiwanaka, ekhotto ya maKristau khenimumuliwa, awo anniwana mpakha Muluku opwetexa olumwenku ola wa Satana ni otthukwela minepa sawe sootakhala. (Wisupulula 12:17; 20:1-3) Nto mohooceye, hata nwanaka ni sootteettheya sa erutthu anyu wala soophavela soohiloka; maana otheene ahu nihaana ‘owana ni erutthu ahu’ wira nivikanihe okhala oororomeleya wa Yehova. (1 aKorinto 9:27) Tthiri, okathi onoona ahu wira khanniwana tori okathi onireerela ahu oxankelaka.

21. Ninrowa owerya sai oxintta ekhotto ahu yomunepani?

21 Hiyo khanniwerya owana ekhotto eyo ni owerya wahu paahi. Tivonto Paulo vannitumererya awe opaka mavekelo wa  Yehova “okathi wothene”. Nave-tho, hiyo nihaana onwiriyana Yehova nisomaka Nuulumo nawe ni othukumana ni anakhotto akhwiihu okathi wotheene, okhala wira hiyo khanniwana mekhihu! (Filémoni 2; aHéberi 10:24, 25) Ale anipaka itthu iya sotheene anoowerya oxintta, ni waakiherya waamini waya okathi wa mixankiho.

MUKHALE OOLIKANA WIRA MWAAKIHERYE WAAMINI WANYU

22, 23. (a) Xeeni vanitumereriwa ahu okhala oolikana ene okathi wotheene wira naakiherye waamini wahu, ni makoho xeeni anireerela ahu opaka? (b) Mwaha xeeni onrowa othokoreriwa muru onittharelana?

22 Yesu aahimmye so: ‘Nyuwo khamuniirela mpantta wa olumwenku, tivonto olumwenku onnonyokhani’. (Yohani 15:19, NM) Tivonto, okathi wotheene maKristau ahaana okhala oolikana wira yaakiherye waamini waya, masi ahaana opaka eyo moottittimiha ni mowiiyeviha. (Mmusome 1 Pedru 3:15.) Mwiikoheke so: ‘Kiireke kinnisuwela saana nthowa naya Anamoona a Yehova ikwaha sikina anikhalana aya moonelo woovirikana ni anamunceene? Okathi onoona aka ovila othanla etthu enivirikana ni moonelo wa anamunceene, kiireke kinnikupali okhala ekeekhai ele enihimya Biibiliya, ni enikhuma wa murumeyi ororomeleya ni ankhili? (Matheyo 24:45; Yohani 17:17) Okathi onireerela aya opaka etthu yooloka vamaithoni va Yehova, kiireke kinnipaka eyo kihuuleliwaka muru nnaamwi muupuwelo aka ovirikanne ni anamunceene?’Esalimo 34:3; Matheyo 10:32, 33.

23 Imaara sinceene, yoophavela ahu ya ohiirela mpantta olumwenku, enneehereriwa mmukhalelo woovila osuwela. Mwa ntakiheryo, ntoko sihimmwale aya wanipacerya wa muru ola, orumeelaka otthekula woohiloka wa olumwenku ola, Diabo onnimananiha waawoka arumeyi a Yehova wira akhale awawe. Nto hiyo ninrowa owerya sai othanla otthekula wooloka, onihakalaliha murima masi ohinihonona yowuupuxerya ya murima ahu? Mwaha owo onrowa othokoreriwa muru onittharelana.

^ etti. 3 Okhuma Pentekoositi a 33 EC, Kristu onirumeela ntoko Mwene a muloko wotheene wa atthareli awe oowoottihiwa valaponi. (aKolosi 1:13) Nto 1914, Kristu ohaakhela owerya wa olamulela ntoko mwene a “olumwenku”. Tivonto, maKristau oowoottihiwa olelo-va anirumeela ntoko anamitthaka waka embaxadore a Omwene wa Mesiya.—Wisupulula 11:15.

^ etti. 8 Nwehe eliivuru Raciocínios à Base das Escrituras, ipaaxina 147-50, yoolaleiwa ni Anamoona a Yehova.