Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

“Mukhaleke Mophentani Mwa Muluku”

 APENDISE

Moota Woomuthokorerya Mutthu Okumihiwe Mmulokoni

Moota Woomuthokorerya Mutthu Okumihiwe Mmulokoni

Ninniriipiwa murima vanceene vaavo mmusi ihu wala mpatthani, vanikumihiwa awe mmulokoni mwaha woohittharuwa yoottheka awe. Moota sinoonela ahu malakiheryo a Biibiliya voohimya sa mwaha ola, pooti wooniherya omphenta wahu Muluku ni ororomeleya wahu. * Nkahaya muthokorerye makoho anikhumela mmwaha ola.

Nimuthokoreryeke sai mutthu okumihiwe mmulokoni? Biibiliya onihimya so: “Yatthunaka wohimeryani yari wira muhatàné n’atthu ale arina nsina n’aKristu, masi ari anamuttompe, anamilili, walá anattittimiha amuluku èthiru, alipa-òwotherya, anamuhapaliwa, anawĩye. Atthu sisa, nyuwo hatá muhilyeke poromosa”. (1 aKorinto 5:11) Omuhimyaka khuta mutthu “ohintthara mwixuttiho wa Yesu Kristu”, Biibiliya onihimya so: “Muhimwakhele mpani mwanyu, nnákhala onvaha murettele [omukoha ihaali]: okhala wira ole oninvaha murettele onnìwanana ni miteko sawe sotakhala”. (2 Yohani 9-11) Nihaataaneke naale akumihiwe mmulokoni, hata ovaanelana myaha somunepani, wala otthekulana. Erevista A Sentinela 15 ya Dezembro, 1981, epaaxina 21, enihimya so: “Omukoha mutthu ‘Ihaali’, pooti okhala nivalo noopacerya naarowa omwiiriha mutthu ovaanela wala opatthana. Nto, niireke wira hiyo nimphavela opaceriha nivalo nno ni mutthu yoole okumihiwe mmulokoni?”

Niireke wira ti vootthuneya tthiri osyaka moomalela wataana naale akumihiwe mmulokoni? Aayo, mwaha wa mathowa ala manceene anittharelana. Nthowa noopacerya: opaka eyo ethoonyeryo yoowi ninniroromeleya wa Muluku ni ninniiwelela Nuulumo nawe. Ninnimwiiwelela Yehova ohiya paahi okathi itthu vanikhweya aya, masi-tho okathi itthu sinivila aya. Omphenta Muluku tonniiriha wiiwelela sooruma sawe sotheene, nisuwelaka wira tthiri owo ta xariya, toophenta ni wira malamulo awe anninikumiherya mureerelo muulupalexa. (Yesaya 48:17; 1 Yohani 5:3) Nthowa na nenli: okumihiwa mmulokoni mutthu yoole otthenke ni ohinttharuwa, onninaakiherya mmukhalelo womunepani ni mweettelo ahu, nave-tho muloko onnivikaniha okhalana nsina nooloka. (1 aKorinto 5:6, 7) Nthowa na neeraru: wiiwelela wahu moomalela malakiheryo a Biibiliya, pooti-tho waakhaliherya ale akumihiwe mmulokoni. Okhaliherya yoothanla ya ekomisau ya ophukela, pooti omukhaliherya ole otthenke, yoowo wanipacerya ahiiwelenle nikhaliheryo axitokweene yanvanhe aya. Mwaha woowi vano khorina apatthani a mmulokoni, pooti omukhaliherya ‘wùpuwelela’ saana, ni oweha wira etthu opanke awe khelonke, ni wiimananiha wira omuhokolowele Yehova.Luka 15:17.

Sai akhala wira ole okumihiwe mmulokoni mmusi ihu? Okhala wira mmusi ihu, pooti oxankiha ottharihela malamulo a Yehova mmwaha ola. Nto, nimuthokoreryeke sai mmusi ihu okumihiwe mmulokoni? Nnaamwi nihirowaka olavula mikhalelo sotheene muliivuruni-mu, masi nrowe nthokorerye iponto piili.

Ikwaha sikina, mmusi yoole okumihiwe pooti ovikaniha okhala ni amusi awe, okhala wira onniirela mpantta etthoko ele. Okhala wira okumihiwa wa mutthu khontaphulela omala omusi, waaniheryasa, awo pooti ovikaniha ovara vamosa miteko sa khuta nihiku. Hata vari siiso, mwaha wa ele epanke awe, owo oothanla mmansawe ovalaana ni amusi awe mmukhalelo womunepani. Nto amusi ale oororomeleya, ahivareke nuuwo miteko somunepani. Mwa ntakiheryo, akhala wira ole okumihiwe ori vaavo okathi emusi eniira aya yoosoma ya Biibiliya, owo ahilavuleke etthu. Masi, akhala wira ole okumihiwe mwammiravo, anamuyari awe tarina muritti womwiixuttiha ni omulaka. Vano anamuyari oophenta, anrowa opaka marehereryo wira amusomiheke Biibiliya mwanaya owo mwaamukhaani. *Miruku 6:20-22; 29:17.

Ikwaha sikina, ole okumihiwe khonikhala ni amusi awe. Nnaamwi ikwaha sikina vatthuneyaka olavulana wira muthokorerye myaha sa omusi, nto muhiviriheke okathi munceene muri hoothe. Emusi ya maKristau oororomeleya, khenuupuwela wira mwaha wookhala mmusi, pooti olavulana khuta okathi aniphavela aya, oriki mmusi owo okhalaka owannyawe. Ohiya vo, omwiiwelela Yehova ni mulokiheryo awe, toniwiiriha amusi ale ottharihela malakiheryo a Biibiliya voohimya sa ale akumihiwe mmulokoni. Wiiwelela waya malakiheryo a Yehova, pooti omukhaliherya ole otthenke ottottela mureerelo yoolaka aakhenle awe. *aHéberi 12:11.

^ etti. 3 Mwaphavela soohimmwa sikina, sa moota wowaathokorerya amusi akumihiwe mmulokoni, nwehe miruku sa Biibiliya siniphwanyaneya mu A Sentinela 15 ya Abril, 1988, ipaaxina 26-31; ni 15 ya Dezembro, 1981, ipaaxina 22-27.

^ etti. 7 Malakiheryo a Biibiliya voohimya sa atthu ookumihiwa, annivareleya-tho muteko wa atthu yaale aniikumiha mmulokoni.

^ etti. 8 Mwaphavela soohimmwa sikina, voohimya sa amiravo ooyeveela anikumihiwa mmulokoni, masi khiyakhala ni anamuyari aya, munwehe A Sentinela 1 a Outubro, 2001, ipaaxina 16-17, ni 15 a Novembro, 1988, epaaxina 20.