Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

“Mukhaleke Mophentani Mwa Muluku”

 MURU 15

Muhakalaleke ni Muteko Anyu

Muhakalaleke ni Muteko Anyu

Khuta mutthu oweheke ‘sorera sothene simphwanyawe mmuteko awe’.MUSUWELI 3:13.

1-3. (a) Atthu anceene anoonela sai muteko aya? (b) Moonelo xeeni onitumererya awe Biibiliya, ni makoho xeeni ninrowa ahu othokorerya muru ola?

OLELO-VA, atthu anceene khonaasivela ovara muteko. Mwaha woomalihaka iwoora sinceene avaraka muteko yoole ohimphavela aya, khivanaasivela orowa omutekoni khuta nihiku. Niireke vanniweryaneya waakhaliherya atthu yaale arina muupuwelo owo, ophwanya ohakalala mmuteko aya?

2 Biibiliya onnitumererya wira nikhalaneke moonelo wooloka voohimya sa muteko. Owo onihimya wira muteko onnikumiherya mareeliho. Salomoni olempe so: “Olya n’uwurya n’upuha sorera sothene simphwanyahu ni muteko ahu, sothene ti sovaha sa Muluku”. (Musuweli 3:13) Yehova, yoowo onniphenta ni oniphavela mureerelo ahu, onnisiveliwa vaavo vanihakalala ahu mwaha wa ele enikhumelela mmuteko ahu wooluttuweliwa. Wira nikhale moophentani mwa Muluku, nihaana okhala moovarihana ni moonelo ni malamulo awe voohimya sa muteko.Mmusome Musuweli 2:24; 5:18.

3 Muru ola, hiyo ninrowa othokorerya makoho ala maxexe: Ninrowa ohakalala sai ni muteko ahu? Miteko xeeni sihineemereriwa ovara maKristau eekeekhai? Ninrowa weereryaniha sai muteko wa mulaponi ni miteko sinivarihana ni okokhorela wahu? Muteko xeeni wootepa otthuneya onireerela ahu ovara? Wanipacerya, nrowe nthokorerye ntakiheryo na alipa-oovara muteko anli aalupalexa molumwenkuni, eyo piiyo, Yehova Muluku ni Yesu Kristu.

 MWANEENE MUTEKO NI FUNTI A MITEKO

4, 5. Biibiliya onooniherya sai wira Yehova ti mulipa-oovara muteko onikumiherya mireerelo sinceene?

4 Yehova ti Mwaneene Muteko. Eliivuru ya Maphattuwelo 1:1, enihimya wira: “Wopajeryani, Muluku opattunxe erimu n’ilapo ya vathí”. Nuumala Muluku omaliha muteko awe woopattuxa itthu valaponi, owo aahimmye wira sotheene saari “sorera sana”. (Maphattuwelo 1:31) Mmasu makina, Muluku aahihakalala mwaha wa itthu sotheene saapattunxe awe valaponi. Moohaaniherya, Yehova yoowo ‘ori Muluku oohakalala’, onnitteeliwa murima mwaha wookhala mulipa-oovara muteko onikumiherya mireerelo sinceene.1 Timótheyo 1:11NM.

5 Muluku ahu a nthiti, onnivara muteko mahiku otheene. Sivinre ene iyaakha sinceene nuumala opattuxa itthu sotheene valaponi, Yesu aahimmye so: “Atithi aka annivara muteko mahiku othene”. (Yohani 5:17) Muteko xeeni Tiithi onivara awe? Tthiri, Muluku onnaalakiherya ni waakhapelela apinaatamu. Muluku ookumiherya “itthu sa nanano”, eyo piiyo, maKristau athanliwe wira yalamuleleke ni Yesu wiirimu. (2 aKorinto 5:17) Nave-tho, owo onnivara muteko mmureerelo wa apinaatamu wira omalelihe yoophavela awe, eyo piiyo, owiiriha atthu yaale animphenta ophwanya okumi woohimala mu elapo esya. (aRoma 6:23) Moohaaniherya, Yehova onnihakalala vanceene mwaha wa sookhumelela sa muteko owo. Atthu imilyau sinceene ahaakhulela ihapari sooreera sa Omwene, nto aamwaattamela Muluku ni khulokiherya okumi aya wira akhaleke moophentani mwawe.Yohani 6:44.

6, 7. Soohimmwa xeeni sinooniherya nthiti aarina awe Yesu?

6 Okhuma khalai Yesu onnivara muteko mooluttuweliwa. Ohinatthi orwa valaponi, aahirumeela ntoko ‘funti a miteko’ a Muluku, orweela mwa yoowo soopattuxiwa “itthu sothene wirimu ni vathí”. (Miruku 8:22-31; aKolosi 1:15-17) Oryeene valaponi, Yesu aahivikaniha ovara muteko mooluttuweliwa. Ntoko mmiravo , Yesu aahiixutta muteko wooteka, ni  khisuweliwa okhala “kalapintero”. * (Marko 6:3) Muteko ola onivekela ikuru sinceene ni oratta, vanceenexa okathi ole wa khalai yahaakhanle aya maakina aniikittha ithaapwa, ilooxa sinitumiha ikaruma sa makalapintero, ni iyuuma sinivara muteko sirumeelaka energia. Nkahaya muupuwele okathi Yesu iikittha awe miri ni oteexa oroihaka opuro aavara awe muteko wira apake ithaapwa! Nkahaya muupuwele Yesu otekaka ipa, opakaka iriipa wira othomeele empa, opakaka mikhora, ni itthu sikina sa vatthokoni sinipakiwa ni ithaapwa! Moohaaniherya, Yesu aanisuwela wira ovara muteko oratteene ni mwa nthiti onnihakalaliha vanceene.

7 Yesu aahisuweliwa okhala mutthu aavara muteko wa Muluku ni nthiti. Iyaakha tthaaru nnimeya, mooluttuweliwa Yesu aahivara muteko awe wootthuneya. Ophavelaka waalaleerya atthu anceene, aanivara muteko nihiku notheene, olaleeryaka okhuma voosiisu mpakha ohiyu. (Luka 21:37, 38; Yohani 3:2) Yesu aahivira “mittetthe sothene n’ilapo sothene, alaleyaka ehapari yorera y’omwene wa Muluku.” (Luka 8:1) Aaheetta mwentto ikiloomo imiya-imiya sene, oviraka iphiro soosareya ntthupi wira aalaleerye atthu ihapari sooreera.

8, 9. Yesu oonihenrye sai wira aanihakalala ni muteko awe?

8 Niireke Yesu aanihakalala ni muteko awe woolaleerya? Aayo! Yesu aahaala ipyo sa Omwene, eyo piiyo, ekeekhai, nto khuhiya imatta silikanne ene wira sihattiweke. Ovara muteko wa Muluku waahimulipiha ni omukhaliherya Yesu, nto ikwaha sikina aanithanla ohilya etthu wira omalihe muteko wa Muluku. (Yohani 4:31-38) Tthiri Yesu aanihakalala vanceene; nto wanikisa wa orummwa awe valaponi aahiwerya olavula ni Tiithi awe oriki: “Miyo kihovuwihani vathí-va: komaliha muteko wakirummyanyu ovara”.Yohani 17:4.

9 Mwekeekhai, Yehova ni Yesu matakiheryo maalupalexa anooniherya ohakalala mwaha wa muteko aya. Omphenta Yehova onniniiriha ‘otthara mwettelo wa Muluku’. (aÉfeso  5:1) Omphenta Yesu onnintumererya ‘otthara’ mavalo awe vakhiviru vene. (1 Pedru 2:21) Vano, nrowe nthokorerye moota ninrowa ahu ohakalala ni muteko ahu.

MOOTA WOOHAKALALA NI MUTEKO AHU

Ovarihela muteko malakiheryo a Biibiliya onimoohakalalihani

10, 11. Exeeni enrowa onikhaliherya wira nikhalane moonelo wooloka voohimya sa muteko?

10 MaKristau eekeekhai annisuwela opweha muteko wa mulaponi opuro wookhalela. Nnaamwi niphavelaka ohakalala ni muteko ahu, ikwaha sikina pooti oxankiha ophwanya ohakalala iwo akhala wira muteko onivara ahu khonnisivela. Nnaamwi nihisiveliwaka ni muteko ahu, ninrowa ohakalala sai?

11 Okhalana moonelo wooloka. Nnaamwi nihiweryaka orukunuxa itthu sinniiraneela, hiyo pooti owerya orukunuxa muupuwelo ahu. Wuupuwelela moota Muluku onoonela awe muteko, onoonikhaliherya okhalana moonelo wooloka. Mwa ntakiheryo, akhala wira nyuwo mwa muhooleli eetthoko, muupuweleke wira muteko anyu onnookhaliheryani okhapelela soophavela sa etthoko anyu, nnaamwi ohooneliwaka vatthu. Waakhapelela ale a vatthokoni vanyu etthu yootthuneya vamaithoni va Muluku. Biibiliya onihimya wira mutthu yoole ohinaakhapelela ale a vatthokoni vawe ‘tootakhala onvikana mutthu omukhontte Yehova’. (1 Timótheyo 5:8) Osuwela wira muteko anyu onnookhaliheryani omaleliha muritti ovahiwa anyu ni Muluku, pooti woophwanyihani ohakalala weiwo waaniheryasa apatthani anyu a muteko ohirina aya.

12. Moota xeeni nthiti ni ororomeleya omutekoni onikumiherya aya mareeliho?

12 Okhalana nthiti ni ororomeleya. Ovara muteko ni nthiti ni wiixutta ovara saana muteko owo, pooti onikumiherya mareeliho manceene. Ikwaha sinceene mapatarau anaaphavela anamuteko a nthiti ni anivara muteko oratteene. (Miruku 12:24; 22:29) Okhala wira na maKristau eekeekhai, nihaana ororomeleya omutekoni wahu, niire so, ohimwiiyerya  patarau musurukhu, itthu sa omutekoni, aahiiso wiiya okathi. (aÉfeso 4:28) Ntoko noonale ahu muru ovinre, ororomeleya onnikumiherya mareeliho. Vannivila namuteko oororomeleya woomoliwa omutekoni. Hata patarau ahu oonaka nthiti nahu aahiiso ohoonaka, hiyo pooti ohakalala mwaha wookhalana ‘yowuupuxerya ya murima yooloka’, ni osuwela wira mweettelo ahu onnimusivela Muluku onimphenta ahu.aHéberi 13:18; aKolosi 3:22-24.

13. Mweettelo anyu wooloka opuro onivara anyu muteko, onrowa okumiherya exeeni?

13 Osuwela wira mweettelo anyu onninvuwiha Muluku. Vaavo vanooniherya ahu mweettelo wooloka wa eKristau opuro  onivara ahu muteko, nto atthu awaattamenleni animoona mweettelo owo. Exeeni enrowa okhumelela? Mweettelo owo onoowiiriha atthu awo ‘ottittimiha mwixuttiho wa Muluku Mòpoli ahu’. (Tito 2:9, 10) Tthiri, mweettelo ahu wooloka pooti owiiriha atthu akina woona wira okokhorela wahu ti wooloka, nto khiyawiiriha atthu awo ottittimiha. Nkahaya muupuwele moota munrowa anyu ohakalala, akhala wira mutthu onivarana anyu muteko onimwaakhulela ekeekhai mwaha wa mweettelo anyu wooloka woonihenrya anyu omutekoni! Nave-tho, nwehe etthu ela yootthuneyexa: Niireke khamunrowa ohakalala vanceene mwasuwela wira mweettelo anyu wooloka onninvuwiha ni omuhakalaliha Yehova?Musome Miruku 27:11; 1 Pedru 2:12.

MOOTA WOOTHANLA SAANA MUTEKO AHU

14-16. Okathi onithanla ahu muteko, nthokoreryeke makoho xeeni ootthuneya?

14 Biibiliya khonivaha malakiheryo otheene voohimya sa muteko oneemerereya wa maKristau aahiiso ohineemerereya. Hata vari siiso, eyo khentaphulela wira nihaana weemererya miteko sotheene. Biibiliya pooti onikhaliherya othanla muteko wooloka onikumiherya etthu, ni onimuhakalaliha Muluku, nisyakaka muteko ohinimusivela. (Miruku 2:6) Okathi onithanla ahu muteko, aakhala makoho manli ootthuneya, anireerela ahu othokorerya.

15 Kiireke ovara muteko ola, waamulikanaka ni ovara itthu sinikhoottihiwa mBiibiliyani? Nuulumo na Muluku ninnikhoottiha wiiya, wootha, ni waapaka amuluku eethiru. (Okhuma 20:4; Miteko 15:29; aÉfeso 4:28; Wisupulula 21:8) Nto, hiyo khinaarowa weemererya muteko yoole onivekela opaka itthu iyo. Okhala wira ninnimphenta Yehova, khininkhala-khala neemereryaka muteko yoole onipakiwa itthu sinitthekela sooruma sa Muluku.Mmusome 1 Yohani 5:3.

16 Niireke ovara muteko ola waamuniiriha wiirela mpantta  aahiiso waatumererya akina opaka itthu soohiloka? Muthokorerye ntakiheryo nimosa. Ovara muteko ntoko mulipa-oniwaakhela atthu vampereesani pooti ohitthekeya. Masi, sai akhala wira muKristau onivekeliwa owaakhela atthu exipitaali emosa enivariwa-tho muteko wa oyiihiwa irukulu? Ekeekhai wira muteko awe khahiyo oyiiha irukulu. Masi, niireke omakelaka ovara muteko exipitaali ele, khiwaarowa omwiiriha okhaliherya muteko wooyiiha irukulu, onikhoottihiwa mBiibiliyani? (Okhuma 21:22-24) Okhala wira  ninnimphenta Yehova, hiyo khanimphavela ovara muteko onikhaliherya itthu sinikhoottihiwa mBiibiliyani.

17. (a) Itthu xeeni sinireerela othokorerya okathi oniphavela ahu muteko? (Nwehe ekaaxa eri “ Kihaana Weemererya Muteko Ola?”) (b) Moota xeeni yowuupuxerya ya murima ahu enrowa aya onikhaliherya opaka soothanla sinimusivela Muluku?

17 Othokorerya saana makoho ari ittima 15 ni 16, anoonikhaliherya waakhula makoho anireerela ahu opaka okathi oniphavela ahu muteko. Nave-tho, sookhala itthu sikina sinireerela ahu wuupuwelela saana okathi oniphavela ahu muteko. * Hiyo nihilipeleleke wira murumeyi oororomeleya ni ankhili, onrowa ovaha malakiheryo a khuta etthu enikhumelela.  Okathi oniphavela ahu muteko ti vootthuneya waarumeela ankhili ahu. Ntoko niixuntte ahu Muru 2, hiyo nihaana okhalana wiihiiha ni wiixuttiha yowuupuxerya ya murima ahu, niphavelaka osuwela moota woweettela Nuulumo na Muluku khuta nihiku. Akhala wira nnoowiixuttiha ankhili ahu ni ‘walimaleliha’, yowuupuxerya ya murima ahu enoonikhaliherya opaka soothanla sinimusivela Muluku, ni okhala moophentani mwawe.aHéberi 5:14.

OKHALANA MUUPUWELO WOOLOKA VOOHIMYA SA MUTEKO

18. Nthowa xeeni vanivila aya okhalana muupuwelo womunepani ni woweereryaneya?

18 Khivankhweya ovikaniha okhalana muupuwelo wooloka mmukhalelo womunepani, okhala wira ninkhala “okathi wokiserya” ni ‘mahiku òxankiha’. (2 Timótheyo 3:1) Olelo-va, ti voovila ophwanya muteko ni khiyavikaniha nivaraka yoowo. Okhala wira na maKristau eekeekhai, hiyo ninnisuwela wira ti vootthuneya ovara muteko wira nikhapelele etthoko ahu. Masi naahikhalane ephoole, apatthani oomutekoni ni ophavela othaaciri pooti ohonona miteko sahu somunepani. (1 Timótheyo 6:9, 10) Nrowe nthokorerye moota wookhalana muupuwelo woweereryaneya, nisuwelaka othanla “itthu sintepa ophwanela”.aFilipi 1:10.

19. Nthowa xeeni varyaaya vootthuneya omuroromela Yehova, nto ororomela iwo onrowa onikhaliherya osyaka exeeni?

19 Omuroromela Yehova ni murima wotheene. (Musome Miruku 3:5, 6.) Niireke khahiyo vootthuneya omuroromela Yehova? Mwekeekhai, Yehova onninikhapelela. (1 Pedru 5:7) Owo onnisuwela vanceene sootthuneya sahu onivikana hiyo, ni khiivo enooceela awe opaka. (Esalimo 37:25) Tivonto, ti vootthuneya wiiwelela vaavo Nuulumo nawe vannuupuxerya aya wira: “Murim’anyu ohettihiweké ni milili, muhakalaleke n’itthu sirinanyu, okhala wira Muluku mwanene òhimya wira: ‘Miyo nkinonyanyalani-tho, kinimojalani mahiku othene’”. (aHéberi 13:5) Arumeyi anceene yaawo  anirumeela okathi wotheene mmuteko wa Muluku, anneemererya wira Muluku onnikhapelela tthiri. Naakupaliki tthiri wira Yehova onrowa onikhapelela, hiyo khaninrowa oxankaka vanceene voohimya sa moota onrowa ahu okhapelelaka etthoko ahu. (Matheyo 6:25-32) Khaninrowa-tho weemererya wira muteko wa mulaponi oniirihe ohicalela miteko  somunepani, ntoko olaleerya ihapari sooreera ni orowa omithukumanoni.Matheyo 24:14; aHéberi 10:24, 25.

20. Ontaphulela exeeni okhalana niitho nooluluwanya, nto munrowa okhalana sai niitho siiso?

20 Okhalana niitho nooluluwanya. (Mmusome Matheyo 6:22, 23.) Okhalana niitho nooluluwanya ontaphulela ohiixaattiherya itthu mookumini mwahu. MuKristau orina niitho nooluluwanya oniwehexexa etthu emosa paahi, eyo piiyo, opaka yootthuna ya Muluku. Akhala wira niitho nahu ninluluwanya itthu somunepani, hiyo khaninrowa ophavelaka paahi muteko oniphwanyiha musurukhu munceene, aahiiso othaaciri. Khaninrowa oxankaka vanceene nnakhala owokiwa ni alipa-animulaleya nakoso, yaawo aniphavela onikupaliha wira okhalana itthu sinaamukhumaru tonikumiherya ohakalala. Nto munrowa okhalana sai niitho nooluluwanya? Musyakeke omakela okopha-kophasa. Musyakeke ophavelasa itthu siniiya okathi anyu ni siniwiirihani ohivaha ephoole itthu somunepani. Mwiiweleleke miruku sa Biibiliya sinihimya wira nihakalaleke “nakhalanaka yolya ni sowara”. (1 Timótheyo 6:8) Mphaveleke okhweeherya okumi anyu.

21. Nthowa xeeni vanitthuneya ahu opweha khuta etthu opuro aya, ni etthu xeeni enitthuneya okhala opuro woopacerya?

21 Mpweheke opuro woopacerya itthu somunepani. Okhala wira sookhala itthu sinceene sinipaka ahu mookumini mwahu, nihaana opweha khuta etthu opuro aya. Naahiire siiso, itthu sihirina efaita yinceene pooti ohonona okathi waarowa ahu opaka itthu sootthuneya. Exeeni enitthuneya okhala opuro woopacerya mookumini mwahu? Atthu anceene mulaponi anitumererya wira osoma oniversidade, ti ephiro emosa paahi enrowa oniphwanyiha muteko oniphwanyiha musurukhu munceene. Masi, Yesu aatumerenrye atthareli awe wira “mpajeryeke ophavela omwene wa Muluku”. (Matheyo 6:33) Tthiri, hiyo maKristau eekeekhai ninnipweha Omwene wa Muluku opuro woopacerya mookumini mwahu. Mweettelo wa okumi ahu, eyo piiyo, soothanla sahu, soolukama sahu, ni miteko sahu, sohaana wooniherya wira miteko sa  Omwene ni yootthuna ya Muluku, itthu sa faitaxa ovikana itthu sa werutthuni.

OLALEERYA NI NTHITI

Ninnooniherya omphenta Yehova vaavo vanipweha ahu muteko woolaleerya opuro woopacerya mookumini mwahu

22, 23. (a) Muteko muulupalexa wa maKristau eekeekhai tuuvi, nto ninrowa wooniherya sai wira muteko ola ti wootthuneya? (Nwehe ekaaxa eri “ Yoothanla Aka Yookiphwanyiha Ohakalala.”) (b) Exeeni ehinrowa anyu weemererya voohimya sa muteko wa mulaponi?

22 Okhala wira ninkhala wanikisa wa mukhalelo ola, nihaana ovaraka mooluttuweliwa muteko wootthuneya wa maKristau, eyo piiyo, olaleerya ni waapaka awiixutti. (Matheyo 24:14; 28:19, 20) Nimutakihaka Yesu, yoowo ori Ntakiheryo nahu, nihaana oluttuweliwa mmuteko ola onoopola ikumi sa atthu. Ninrowa wooniherya sai wira muteko ola ti wootthuneya vanceene wa hiyo? Anamunceene animurumeela Muluku, annilaleerya ni murima wotheene ntoko anamalaleya a mmulokoni. Akina aalokiherya miteko saya wira arumeeleke ntoko mapioneero aahiiso mamisionaario. Mwaha woosuwela wira muteko wa Yehova ti wootthuneya vanceene, anamuyari anceene annaatumererya anaaya okela muteko wa orummwa wa okathi wotheene. Niireke anamalaleya awo annihakalala ni muteko aya? Aayo, annihakalala! Omurumeela Yehova ni murima wotheene, ti etthu eniphwanyiha ohakalala, ni mareeliho oohikontareya.Musome Miruku 10:22.

23 Anceene a hiyo ninniviriha okathi munceene nivaraka muteko wa mulaponi, wira niphwanye etthu enniiriha waakhaliherya atthu a vatthokoni vahu. Muupuweleke wira Yehova oniphavela wira nihakalaleke ni muteko ahu. Vaavo vanilokiherya ahu muupuwelo ni sowiira sahu moovarihana ni moonelo ni malakiheryo a Muluku, hiyo nnoowerya ohakalala ni muteko ahu. Nto, niheemererye muteko wa mulaponi onikhoottiherya ovara muteko ahu wootthuneya vanceene, eyo piiyo, olaleya ihapari sooreera sa Omwene wa Muluku. Vaavo vanipweha ahu opuro woopacerya muteko woolaleerya, hiyo ninnooniherya wira ninnimphenta Yehova, nto wira siiso onniniiriha okhala moophentani mwawe.

^ etti. 6 Nuulumo na eGriki noowi “kalapintero”, okhala wene ninrumeeliwa “nihimmwaka mutthu yoole onivara ni ithaapwa wira oteke ipa, aahiiso itthu sikina sa vatthokoni sinipakiwa ni ithaapwa”.

^ etti. 17 Mwaphavela soohimmwa sikina voohimya sa itthu sinireerela ahu othokorerya okathi oniphavela ahu muteko, munwehe A Sentinela 15 a Abril, 1999, ipaaxina 28-30, ni A Sentinela 15 a Janero, 1983, epaaxina 26.