Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

“Mukhaleke Mophentani Mwa Muluku”

 MURU 7

Munnivaha Efaita Okumi Ntoko Muluku Onivaha Awe?

Munnivaha Efaita Okumi Ntoko Muluku Onivaha Awe?

“Maphattuwelo èkumi ti nyuwo”.ESALIMO 36:10.

1, 2. Etthu xeeni evahiwa ahu ni Muluku eri yootepexa otthuneya olelo-va, ni nthowa xeeni?

TIITHI ahu a wiirimu oonivaha etthu yoottepexa otthuneya: ekumi erina ahu ntoko apinaatamu arina ankhili, yaawo aniwerya wooniherya mikhalelo sa Muluku. (Maphattuwelo 1:27) Mwaha wa yoovaha ela, hiyo ninniwerya wiiwexexa saana malakiheryo ari mBiibiliyani. Ovarihela muteko malamulo awo anoriiriha okhala owunnuwela momunepani, ntoko atthu animphenta Yehova ni arina ‘ankhili anisuwela othanla sorera ni sotakhala’.aHéberi 5:14.

2 Osuwela orumeela saana malakiheryo a Biibiliya ti vootthuneya olelo-va, okhala wira olumwenku onootepa okhala wooxankiha. Tivonto hata yaakhanle malamulo manceene khivaaweryaneya ovarihela muteko khuta muxankiho onikhumelela. Siensia a myaha sa oloola iretta onnooniherya saana mwaha ola, vanceenexa voohimya sa mirette ni inamuna sa oloola erumeeliwaka ephome. Ola mwaha wootthuneya wa otheene yaale aniphavela omwiiwelela Yehova. Masi, akhala wira ninniiwexexa oratteene malakiheryo ootthuneya a Biibiliya, hiyo nnoowerya opaka soothanla sinrowa oniiriha okhalana yowuupuxerya ya murima yoomaaleleya, ni okhala moophentani mwa Muluku. (Miruku 2:6-11) Nrowe nithokorerye malakiheryo makina.

EKUMI NI EPHOME TI SOOTTHUNEYA WA MULUKU

3, 4. Biibiliya opacenrye liini olavula sa ekumi okhala ya faita, nto malakiheryo xeeni a Biibiliya anilipiha mmwaha ola?

3 Okathi vakhaani nuumala Kayini omwiiva Abeli, Yehova taapacenrye awe wooniherya ovarihana wuulupale okhanle wa okumi  ni ephome, ni okhala waya sootthuneya wa Muluku. Muluku aahimuleela Kayini wira: “Mwirale-ni? Ephome ya muhim’anyu emwarenxanyu ennikikhuwelela miyo”. (Maphattuwelo 4:10) Yehova anoona ephome ya Abeli ntoko ekumi yaapwetexiwe vootakhalexa. Tivonto, vanihimmwa aya wira okumi wa Abeli waahikhuwela wira Muluku ophuke mwa exariya.aHéberi 12:24.

4 Nuumala Mutaaseke a mahiku a Nowe, Muluku aahiweemererya apinaatamu okhuura enama, masi aahikhootiha olya ephome. Muluku aahimyale so: “Nto muhikhureké enama enari n’iphome aya, ehinatthi ohitiwa. Vano kinokumiha mulattu mwaha w’omwiva mutthu”. (Maphattuwelo 9:4, 5) Yooruma ela yaahela muhina osuulu wotheene wa Nowe, ni atthu a mahiku ala. Enninuupuxerya-tho ele Muluku aahimyale awe wa Kayini wira erooho, eyo piiyo, ekumi ya atthu ni inama eri mphomeni mwaya. Nlamulo nle ninnooniherya oratteene wira Yehova yoowo ori mwaneene ekumi, onimwaaphukela apinaatamu otheene ahinithokorerya saana ephome ni ekumi.Esalimo 36:10.

5, 6. Nlamulo na Moise nooniherya sai wira ephome ti yootthuneya wa Muluku? (Nwehe-tho ekaaxa eri “ Muttittimiheke Okumi wa Inama.”)

5 Nlamulo na Moise ninnooniherya malakiheryo manli maalupale. Eliivuru ya Onamukuttho 17:10, 11 enihimya so: “Akhalá mutthu . . . onkhura ephome, kinonviruwela, kinomukumiha munlokoni mwawe. Tthiri ekumi ya khula enama enikhala mphomeni mwaya: tivó vorumalyakani wira mmwarexele ephome v’altari, wira muleveleliwe itampi sanyu; mana ephome ekumi enttipiha etampi”. *—Nwehe ekaaxa eni “ Owerya Orina Ephome wa Ottipiha Itampi.”

6 Akhala wira ephome ya mwaamunama oowiiviwa khiyaarowa orumeeliwa valtari; eyo yahaana omwarexeliwa vathi. Opaka eyo waathoonyerya wira ekumi yaattikiheriwa wa Mwaneene. (Otumererya 12:16; Ezekiyeli 18:20) Masi nwehe wira  nnaamwi anaIsarayeli yaakhoottiheriwa olya ephome, khiyaataphulela wira yahaana okumiha ephome yotheene ya enama eyo yaarowa aya okhuura. Akhala wira enama eyo yaahihitiwa oratteene ni khumwarexiwa vathi ephome aya, mwIsarayeli aaneemiheriwa okhuura enama eyo vohoova omutthekela Muluku, okhala wira omwarexa ephome moota owo wooniherya omuttittimiha ole Onivaha Okumi.

7. Davidi oonihenrye sai wira ephome ehaana efaita aya?

 7 Davidi, yoowo ‘ari mulopwana ettela murima’ wa Muluku, aanisuwela saana malakiheryo ari mpuwa mwa yooruma ya Muluku voohimya sa ephome. (Miteko 13:22) Okathi omosa aavoliwa awe ntthona, anakhotto awe araru yaahivira eriyari ya muttetthe wa awanani aya, khurowa orika maasi weehimeni, khumuroihela Davidi. Nto Davidi aapanke exeeni? Owo aahimmye so: “Apwiya ekitakhalihe, katthuná owurya màsi ala: wamulikana n’uwurya ephome y’atthu ala araru, yalenve ekumi aya erowaka orika”. Davidi oona wira owurya maasi ale waarowa olikanaka ni owurya ephome ya atthu ale yaalenve okumi aya wira yarike. Tivonto, nnaamwi aavoliwe ntthona, owo “ahiyeherya vathí màsi awo vowattittimiha Apwiya”.2 Samuweli 23:15-17.

8, 9. Niireke nuumala okhumelela muloko wa eKristau moonelo wa Muluku voohimya sa ekumi ni ephome wooturukeya? Mutthokiherye.

8 Iyaakha 2.400 nuumala Muluku omuleela Nowe efaita ya ephome, ni iyaakha 1.500 nuumala ovahiwa Nlamulo na wataana, Yehova aahuupuxerya nikhuuru noolamulela na muloko wa eKristau wa eseekulu yoopacerya olepa wira: “Eroho yowarya ni hiyo mmansihu nihìwanana ohoreyani muritti mukina, sihikhanle itthu iya sinònahu otepa okhweleya. Muhikhureké inama siheleliwe mukuttho amuluku èthiru, muhilyeké ephome, nnákhala inama sohihitiwa; muhetteké onamuttompe”.Miteko 15:28, 29.

9 Tthiri, nikhuuru noolamulela na eseekulu yoopacerya naahisuwela wira ephome ehaana efaita wa Muluku, nto orumeela voohiloka onlikana ni etampi ya waakokhorela amuluku eethiru wala orupihana woohiloka. MaKristau eekeekhai olelo-va arina moonelo mmosaru. Okhala wira annimananiha ovarihela muteko malakiheryo a Biibiliya, ohiya otthara paahi malamulo anihimya vowiiweya etthu ene yoopaka, awo annimuhakalaliha Yehova vaavo vanipaka aya soothanla voohimya sa ephome.

ORUMEELIWA WA EPHOME OXIPITAALI

Kinrowa omutthokiherya sai meedico soothanla saka voohimya sa orumeela ifrasau sa ephome?

10, 11. (a) Anamoona a Yehova anoonela sai oheleliwa ephome, ni ipantte xexe suulupale sa ephome? (b) Voohimya sa ephome, itthu xeeni maKristau waaniheryasa anikhalana aya moonelo woovirikana?

10 Anamoona a Yehova annisuwela wira ‘ohilya ephome’  onitaphulela okhootta oheleliwa ephome wala ovaha, aahiiso osuka ephome aya wira yarumeeliwe okathi mukina. Mwaha wa weettela nlamulo na Muluku, awo khaneemya ipantte xexe suulupale sa ephome: iglobulo sooxeerya, iglobulo sootteela, iplaqueta ni plasma.

11 Olelo-va, vanniweryaneya weekiwa ipantte iya xexe suulupale sa ephome, nto khiyakhumelela ifrasau samukhaanixa, seiyo sinirumeeliwa mwa inamuna soovirikana. Niireke muKristau ohaana weemererya ifrasau iyo? Niireke ohaana woonaka okhala “ephome” ntero? Khuta mutthu ohaana opaka yoothanla awe mmwaha ola. Nave-tho, khuta mutthu ohaana opaka yoothanla awe voohimya sa inamuna sa olooliwa ntoko hemodiálise, hemodiluição, ni recuperação intra-operatória de células, yeeyo enihela muhina mutthu olooliwa erumeeliwaka ephome awe, masi ohiya yoosukiwa khalai ene.—Munwehe Apendise mwaha “Ifrasau sa Ephome ni Inamuna sa Operasau.”

12. Nooneleke sai ni nipakeke exeeni myaha seiye khuta mutthu onitthara awe yowuupuxerya ya murima awe?

 12 Niireke Yehova khonicalela myaha seiye mutthu mwaneene onipaka awe yoothanla? Nnaari, okhala wira onnicalela muupuwelo ahu ni ele enniiriha opaka soothanla iyo. (Musome Miruku 17:3; 24:12.) Nuumala onvekela Yehova wira onilakiherye, ni otokosa oratteene voohimya sa murette woolya aahiiso enamuna yoolooliwa, nto nihaana wiiwelela yowuupuxerya ya murima ahu, yeeyo yiixuttihiwe ni Biibiliya. (aRoma 14:2, 22, 23) Masi, ohikhaleke onnikhanyererya otthara muupuwelo awe, nave nihimukoheke mutthu wira: “Mwaari mwa nyuwo mwaarowa opaka exeeni?” Mmyaha iyo, khuta muKristau “onokohiwa mwaha wa mwettelo awe”. *aGalasia 6:5; aRoma 14:12; nwehe ekaaxa eni “ Kinnoona Ephome Okhala ya Efaita wa Muluku?

MALAMULO A YEHOVA ANNOONIHERYA OPHENTA WAWE NTOKO TIITHI

13. Etthu xeeni malamulo ni malakiheryo a Yehova anooniherya aya voohimya sa Muluku? Nvahe ntakiheryo.

13 Malamulo ni malakiheryo ari mBiibiliyani, anooniherya wira Yehova ta miruku ni Mulipa-oovaha malamulo ni Tiithi oophenta, yoowo onaakhapelela anaawe. (Esalimo 19:8-12) Nnaamwi yooruma ya ‘ohilya ephome’ yahaakumiheriwe ntoko malakiheryo a okhapelela ekumi, nlelo eyo enninikhapelela mixankiho sa ekumi sinikhumelela mwaha wa oheleliwa ephome. (Miteko 15:20) Tthiri, mameedico manceene anihimya wira omwiira operasau ehirumeeliwaka ephome eri “enamuna yoolokexa” ya vano ya oloola iretta. Wa maKristau eekeekhai, orowa vahoolo wa siensia onttittimiherya osuwela wuulupalexa wa Yehova ni ophenta wawe ntoko tiithi.Mmusome Yesaya 55:9; Yohani 14:21, 23.

14, 15. (a) Malamulo xeeni yooniherya wira Muluku aanaaphenta aIsarayeli? (b) Munrowa ovarihela sai muteko malakiheryo ala ari ntoko mathipelo a sooruma anikhaliherya osyaka ihasara?

14 Malamulo manceene a Muluku yaanooniherya wira Muluku aaniphavela okhala saana wa nloko na Isarayeli. Mwa ntakiheryo,  owo aavekela wira ipa sa aIsarayeli sikhalaneke muuri, wira ehikhumelele ehasara; maana saanivariwa miteko sinceene vasulu va empa. (Otumererya 22:8; 1 Samuweli 9:25, 26; Nehemiya 8:16; Miteko 10:9) Nave-tho, Muluku aahiruma wira inyompe soolopwana soowali saahaana okhapeleliwa saana. (Okhuma 21:28, 29) Ohiiwelela soovekela iya wanooniherya wira mutthu owo khaacalela okhala saana wa atthu akina, nto eyo yammwiiriha mutthu okhalana nthowa mwaha wa omwarexiwa ephome.

15 Munrowa ovarihela sai muteko malamulo ala ari ntoko mathipelo a sooruma? Muhaana okhapelela ekaaro anyu, inama sanyu, empa anyu, opuro onivara anyu muteko, ovarerya moota oneettiha anyu ekaaro, ni matthekulelo anithanla anyu. Ilapo sikina, ihasara sinnooneya okhala ti etthu enitepa owiiva amiravo mwaha woohikhalana ephoole. Tivonto, amiravo aniphavela ovikaniha okhala moophentani mwa Muluku, annivaha efaita okumi ni khaniphavela wiihakalaliha apakaka itthu sowoopiha. Awo kharina muupuwelo woololo woowi amiravo khanoona owereya. Masi, annihakalala ni omiravo aya, okathi onisyaka aya ihasara iyo.Musuweli 11:9, 10.

16. Malakiheryo xeeni a Biibiliya anivareleya muteko voohimya sa omwarexa erukulu? (Nwehe-tho enoota.)

16 Hata okumi wa mwaana nlelo ohiyariwe ohaana efaita wa Muluku. Khalai, wIsarayeli, akhala wira mutthu aahinvulaliha muthiyana oorupala, nto muthiyana owo aahiiso mwanawe khukhwa, Muluku oona wira mutthu ole aari mulipa-oowiiva, nto ‘ekumi yahana oliviwa n’ikumi’. * (Musome Okhuma 21:22, 23.) Nkahaya muupuwele moota Yehova onoonela awe okathi onoona awe irukulu sinceene simwarexiwaka khuta mwaakha, anamwane anceene yiiviwaka mwaha wa nrima na anamuyari aya, wala mwaha wa orupihana woohiloka.

17. Nyuwo mwaarowa omulipiha sai mutthu yoole aamwarexale erukulu ohinatthi wiixutta malamulo a Muluku?

17 Sai voohimya sa muthiyana aatonko omwarexa erukulu ohinatthi  wiixutta ekeekhai ya mBiibiliyani? Niireke khoniphwanela oleveleliwa ni Muluku? Nnaari, khahiyo siiso! Maana mutthu ottharunwe tthiri, ohaana okupali wira Yehova onoomulevelela orweela mwa ephome ya Yesu. (Esalimo 103:8-14; aÉfeso 1:7)  Kristu mwaneene aahimmye so: “Miyo nkirwenle owihana atthu òrera murima, masi alipa-òttheka, wira erukunuxe murima”.Luka 5:32.

MUSYAKE MUUPUWELO WOOMUNYOKHA MUTTHU!

18. Biibiliya onooniherya sai etthu eniiriha oyiihiwa ephome yinceene?

18 Ohiya osyaka waahaaxa atthu akina paahi, Yehova oniphavela wira nikumihe vamurimani vahu etthu eniiriha oyiiha ephome, eyo piiyo, waanyokha akina. Murummwa Yohani olempe so: “Othene ale ananyokha akhw’aya, awo anamwiva”. (1 Yohani 3:15) Mutthu siiso khahiyo wira onimunyokha munnawe paahi, masi onniphavela-tho wira munnawe okhwe. Omunyokha wawe pooti wooneyaka orweela mwa omulavula voohiloka, omootherya vootakhala-vo, itthu seiyo siniphwanela ophukeliwa ni Yehova akhala wira tthiri sihiireya. (Onamukuttho 19:16; Otumererya 19:18-21; Matheyo 5:22) Tthiri ti vooreera ophavela omala-maliha khuta muupuwelelo wootakhala ori vamurimani vahu!Yakobo 1:14, 15; 4:1-3.

19. Mutthu oneettihiwa ni malakiheryo a Biibiliya onoonela sa soolepa ntoko Esalimo 11:5 ni aFilipi 4:8, 9?

19 Otheene yaale anithokorerya ekumi ntoko siisaale Yehova onithokorerya awe, ni anikhala moophentani mwawe, annisyaka inamuna sotheene sa owali. Esalimo 11:5 enihimya wira: “Apwiya . . . anniphweliwa n’alipa-òwali”. Yoolepa ela khenihimya omutthu wa Muluku paahi; masi yookhalana yoolakiherya ekhanle ooweettiha ekumi ahu. Enniwiiriha ale animphenta Muluku osyaka matthekulelo anitumererya owali. Vamosaru, masu oowi Yehova ti ‘Muluku a murettele’, anniwiiriha arumeyi awe wuupuwelaka paahi itthu siri soophenteya, soophwanelela, ni soottottopeleya, seiyo sinikumiherya murettele.Mmusome aFilipi 4:8, 9.

MUHIIRELEKE MPANTTA MULOKIHERYO ORINA MULATTU WA EPHOME

20-22. MaKristau anoonela sai myaha sa mulaponi, ni nthowa xeeni?

20 Mmoonelo wa Muluku, elapo yotheene ya Satana yookhalana mulattu wa ephome. Mukhalelo aya wa epoliitika, yoowo mBiibiliyani  onithoonyeriwa ni inama sootakhala, onniwiiva atthu imilyau sinceene, waahela muhina arumeyi a Yehova. (Daniyeli 8:3, 4, 20-22; Wisupulula 13:1, 2, 7, 8) Alipa-anakoso a mulaponi ni orowa vahoolo wa siensia, onnikhaliherya iguvernu iya sinlikana ni inama soowali, wira sipakeke hoothe ikapwitthi suulupale sootakhala, etthu yeeyo eniwiiriha ophwanya musurukhu munceene mwaha wa ikapwitthi seiyo. Tthiri, “elapo yothene enniweriwa ni Mutakhali”!1 Yohani 5:19.

21 Okhala wira atthareli a Yesu ‘khaniirela mpantta’ myaha sa epoliitika ni ikhotto, awo annisyaka okhalana mulattu wa ephome, vaavo vahiniitakaaha aya ni atthu a muttetthe aya wira apakeke itthu sootakhala. * (Yohani 15:19; 17:16, NM) Amutakihaka Kristu, okathi onilupatthiwa aya khanaatuphela atthu awo. Ohiya-vo, annaaphenta awanani aya, ni annaavekelela.Matheyo 5:44; aRoma 12:17-21.

22 Mwa sotheene, maKristau eekeekhai annisyaka wiitakaaha ni ‘Babilonia Mulupale’, yoowo ori olamulelo wa itiini soowoka sa  molumwenkuni ni orina mulattu wa ephome ovikana itthu sotheene. Nuulumo na Muluku ninnilavula sa Babilonia, wira: “Mwa nyuwo yophwanyiwa ephome ya maprofeta ni y’atthu òwarya n’iphome y’atthu othene aiviwe mulaponi-mu”. Tivonto, ninlopoliwa ahu wira: “Nyuwo, atthu aka, mukhume muttetthe owo”.Wisupulula 17:6; 18:2, 4, 24.

23. Okhuma mBabilonia Muulupale onihela mpuwa exeeni?

23 Okhuma mBabilonia Muulupale onihela muhina itthu sinceene, ohiya paahi ottipihiwa nsina nanyu naalempwale ni nikhuuru nlo . Onihela-tho muhina othanya miteko sootakhala ntoko orupihana woohiloka, wiikeliha muhina myaha sa epoliitika, ni ophavela muhakhu mwa enamuna enooniherya nrima. (Musome Esalimo 97:10; Wisupulula 18:7, 9, 11-17) Tthiri ikwaha sinceene itthu iya sinnikumiherya omwarexiwa ephome!

24, 25. Exeeni enitthuneya awe opaka wira oleveleliwe ole orina nthowa na ephome masi ottharunwe, nto murehereryo xeeni waari wIsarayeli?

24 Nihinatthi wiixutta ekeekhai, khuta mmosa a hiyo, mwa inamuna soovirikana aanikhaliherya mukhalelo ola wa Satana, nto vanayevaru aahikhalana nthowa na ephome. Masi, okhala wira noorukunuxa mweettelo ahu, khwaamini mukuttho wowoopola wa Kristu, ni khivahererya okumi ahu wa Muluku, hiyo noomoreliwa ikharari ni Muluku, nto ninnaakiheriwa itthu saarowa ohonona wataana wahu ni Yehova. (Miteko 3:19) Waakiheriwa iwo, onlikana ni isidade sa khalai wIsarayeli, seiye mutthu saatthyawela awe wira aakiheriwe.Mothakoni 35:11-15; Otumererya 21:1-9.

25 Murehereryo waari sai? Akhala wira voohilakelela mwIsarayeli aahimwiiva mutthu, nto aahaana otthyawela mittetthe saathanliwe. Nuumala makhulupale oophwanelela ophuka mwaha owo, ole iivale moohilakela aahaana okhala mmuttettheni mwa ntthyawelo mpakha okhwa mukhulupale aanamukuttho. Nuumala-vo, aanitaphuwa wira akhaleke opuro aaphavela awe. Tthiri, nla ntakiheryo nuulupale na omoriwa ikharari wa Muluku ni nnooniherya wira Muluku onnivaha efaita yuulupale okumi waapinaatamu! Mittetthe iyo sootthyawela sinthoonyerya marehereryo a Yehova okhanle olelo-va, orweela mwa mukuttho wowoopola wa Kristu, yoowo onnaakiherya okhwa, vaavo moohilakela vanitthekela  ahu nlamulo na Yehova voohimya sa okumi ni ephome. Niireke nyuwo munnixukhurela murehereryo owo? Nto munrowa wooniherya sai wira munnixukhurela? Enamuna emosa ori waalattula atthu akina okhalaka ni nyuwo mmittetthe iyo sootthyawela sa nthoonyeryo, vanceenexa mwaha woowi “maxakha malupale” annitepa waattamela.Matheyo 24:21; 2 aKorinto 6:1, 2.

NVAHEKE EFAITA OKUMI MULALEERYAKA IHAPARI SA OMWENE

26-28. Enamuna xeeni mukhalelo ahu olelo-va onlikana aya ni ole wa profeta Ezekiyeli, nto ninrowa ovikaniha sai okhala moophentani mwa Muluku?

26 Mukhalelo wa atthu a Muluku olelo-va, onnuupuxerya ole wa profeta Ezekiyeli, yoowo Yehova aamurumme awe waaleela aIsarayeli masu oolopola a Muluku. Owo aamulenle so: “Nwiriyane molumo anohimeryakani, mwalopole atthu anyu ni nsina naka”. Vaakhanle wira Ezekiyeli aamukhootta muteko owo, aamukhalana nthowa na ephome ya atthu ale yaarowa okhwa okathi Yerusalemu aarowa awe ophukeliwa. (Ezekiyeli 33:7-9) Masi Ezekiyeli aahiiwelela, tivonto ahaarina awe nthowa na ephome.

27 Olelo-va, ninnaattamela wanikisa wa olumwenku wotheene wa Satana. Tivonto, Anamoona a Yehova annithokorerya okhala yookhanyererya ni eparakha olaleya “nihiku na ikuhu” na Muluku, moovarihana ni ihapari sa Omwene. (Yesaya 61:2; Matheyo 24:14) Niireke munniirela mpantta moomalela muteko ola? Murummwa Paulo aanithokorerya oratteene muteko awe woolaleerya. Tivonto vaawerya awe ohimya wira: “Miyo nkina mulattu. Tthiri nkikhontte wileva wira kolalèryeni otthuna wothene wa Muluku”. (Miteko 20:26, 27) Tthiri nlo ntakiheryo noolokexa ninreerela ahu otthara!

28 Tthiri, wira nivikanihe okhala moophentani mwa Yehova yoowo ori tiithi oophenta, nihaana opaka itthu sikina ohiya woonaka paahi ekumi ni ephome ntoko siisaale Yehova sinoona awe. Nihaana-tho ovikaniha okhala ooloka aahiiso ooratta mmoonelo wa Yehova, ntoko sinrowa ahu othokorerya muru onittharelana.

^ etti. 5 Voohimya sa moolumo a Muluku oowi “ekumi ya khula enama enikhala mphomeni mwaya”, exornaale Scientific American ehimmye so: “Nnaamwi varya ene ekeekhai wira ephome pooti olavuliwaka ntoko nlikanyiho wala ethoonyeryo ya ekumi, masu awo khahiyo nthoonyeryo, okhala wira khuta muthinto wa iseelula sa ephome ti wootthuneya wira ekhale ekumi”.

^ etti. 12 Munwehe Despertai! Agosto 2006, ipaaxina 3-12, onikumiheriwa ni Anamoona a Yehova.

^ etti. 16 Alipa anitokosa mattaava a mBiibiliyani anihimya wira masu a eHeeberi arumeeliwe va Okhuma 21:23, “woonasa wene khahiyo anihimya ehasara enikumiheriwa maama paahi”. Nwehe-tho wira Biibiliya khonihimya wira Yehova aarowa omuhukhumu mutthu aakumihenrye ehasara ottharihelaka munnuwelo wa mwaana aarupaliwe.

^ etti. 70 Mwaphavela soohimmwa sikina munwehe “Ifrasau sa Ephome ni Inamuna sa Operasau”.