Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Muwiixuttihe Aniinyu

 YOOSOMA 4

Mwaana Aamuhakalalinhe Paapawe Vamosa ni Yehova

Mwaana Aamuhakalalinhe Paapawe Vamosa ni Yehova

Exeeni Yefte onimuleiherya awe Yehova?

Khahiyo vaari vookhweya, masi mwaana mwaamuthiyana a Yefte aahimuhakalaliha paapawe

Niireke munnimoona mwaaruusi ola valataratoni-va?— Apapawe aniitthaniwa Yefte. Biibiliya khonnihimeerya nsina nawe. Masi ninnisuwela wira owo aahimuhakalaliha paapawe vamosa ni Yehova. Nrowe niwehe ele eniixutta ahu sa mwaana ola ni apapawe.

Yefte aari mulopwana ooreera murima. Owo aahimwiixuttiha mwanawe mwaamuthiyana masu a Yehova. Nave, Yefte aari mulopwana oowerya ni muhooleli ooreera murima. Nto, aIsarayeli yaahinvekela wira aahoolele owana ekhotto na awanani aya.

Yefte aahinvekela Muluku wira omukhaliherye. Nto, Yefte aahilavula so: ‘Katthikela owaani kixinttale ene, nto ole onrowa opacerya okhuma mpaani mwaka, kinonvaha Yehova. Owo onrowa okhalaka ni ovara muteko okumi awe wotheene otabernaakulu’.  Otabernaakulu waari opuro yoowo atthu yaamulompa aya Muluku. Nto, Yefte aahixintta ekhotto ele! Munoonela sai, ti pani aapacenrye omwaakhela okathi aatthikenle awe owaani?—

Aayo, aari mwanawe mwaamuthiyana! Yefte aarina mwaana mmosa paahi. Nto vano aahaana omuleva. Eyo yaahimuriipiha murima vanceene. Masi muupuweleke wira Yefte aahilavula wira atthikela owaani oxinttale ene, ole aarowa opacerya okhuma mpaani, aamunvaha Yehova. Nto mwanawe aahaakhula wira: ‘Paapa, okhala wira moomuleela Yehova masu awo; mukiiriheke ntoko silavunle anyu’.

Khula mwaakha, apatthani a mwaana mwaamuthiyana a Yefte yaanirwa omuxukurya

Nave-tho mwaana a Yefte aahiriipiwa murima. Otabernaakulu, owo khaarowa otheliwa ni okhalana anamwane. Masi owo aaniphavela omwiiwelela paapawe ni omuhakalaliha Yehova. Tthiri, owo aanoonela efaita opaka eyo ovikana otheliwa ni waayara anamwane. Tivonto, owo aahirowa otabernaakulu onakhala weiwo okumi awe wotheene.

Niireke mwaana mwaamuthiyana a Yefte, aahimuhakalaliha paapawe ni Yehova?— Eyo ekeekhai! Akhala wira munoomwiiwelela ni omphenta Yehova, munoomutakiha mwaana mwaamuthiyana a Yefte. Nave, munimwaahakalaliha anamuyari anyu, vamosa ni Yehova.

MUSOME MBIIBILIYANI MWANYU

  • Otumererya 6:4-6

  • Makhulupale 11:30-40

  • Matheyo 19:10, 11