Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Muwiixuttihe Aniinyu

 YOOSOMA 1

Esiiri Emosa Yootepa Ohakalaliha

Esiiri Emosa Yootepa Ohakalaliha

Niireke nyuwo mootoko oleeliwa etthu ni nvekeliwa wira muhimuleele mutthu? * Akhala ti siiso, etthu eyo eniitthaniwa esiiri, maana atthu akina khanisuwela. Biibiliya onnilavula sa esiiri yootepa otthuneya enikhuma wa Muluku. Hata malaikha yaaniphavela osuwela esiiri eyo. Niireke nyuwo munniphavela osuwela esiiri eyo?—

Niireke moosuwela etthu xeeni malaikha ala yaaphavela aya osuwela?

Khalai, Muluku aahimpattuxa mulopwana ni muthiyana oopacerya: Adamu ni Eva. Muluku ahaapweha opuro wooreera wiitthaniwa ejardim ya wEedeni. Aakhanle wira Adamu ni Eva yaahimwiiwelela Muluku, awo ni anaaya yampaka elapo yotheene okhala eparayiisu ntoko ejardim ele. Nave, awo yaarowa okhalaka mParayiisu mmo okathi wotheene. Masi munnuupuwela ele Adamu ni Eva yaapanke aya?—

Adamu ni Eva khiyaamwiiwelenle Muluku. Ti maana aya nihinkhala ahu mparayiisu olelo-va. Masi Muluku aahihimya wira elapo yotheene yaarowa okhala yooreera; ni atthu otheene yaarowa okhalaka mahiku otheene ni moohakalala. Muluku aarowa opaka sai eyo? Okhuma khalai, atthu khiyaasuwela esiiri eyo.

Okathi Yesu aaryaawe valaponi, aahiwiixuttiha atthu voohimya sa esiiri eyo. Owo aahimyale wira esiiri eyo ti Omwene wa Muluku. Yesu aahaaleela atthu wira yahaana ovekelaka wira Omwene wa Muluku orwe. Omwene owo onoopaka elapo ya vathi okhala eparayiisu.

Niireke munnihakalala mwaha wosuwela esiiri ela?— Muupuweleke wira atthu yaale animwiiwelela Yehova tanrowa okhala mParayiisu. Biibiliya onninleela sa alopwana ni athiyana anceene yaamwiiwelenle Yehova. Niireke munniphavela wiixutta itthu sikina sa atthu awo?— Nrowe niwehe moota atthu awo saari aya ni moota ninrowa ahu waatakiha.

MUSOME MBIIBILIYANI MWANYU

  • Marko 4:11

  • 1 Pedru 1:12

  • Maphattuwelo 1:26-28; 2:8, 9; 3:6, 23

  • Matheyo 6:9, 10

  • Esalimo 37:11, 29

^ etti. 3 Okathi onisoma anyu ebroxura ela, munoophwanyaka etrasu ela (—) ni nikoho. Nto owo okathi wooreerela wira munvekele mwaninyu wira ohimye etthu enisuwela awe.