Murowe mpantta wa sirimuhina

Murowe mpantta wa myaha sirimuhina

Anamoona a Yehova

Muthanle nttaava Emakhuwa

 YOOSOMA 7

Niireke Mootoko Oriipiwa Murima ni Woova?

Niireke Mootoko Oriipiwa Murima ni Woova?

Nkahaya munwehe mwanamwane ola valataratoni-va. Owo onikhala ntoko onnoova ni ooriipiwa murima. Nyuwo mootoko okhala siisa?— Eyo pooti oniiraneela ikwaha sikina. Biibiliya onnaaromola atthu yaari apatthani a Yehova, masi yaariipiwe murima ni woova. Mmosa a yaawo aari Eliya. Nrowe nimusuwele.

Yezabeli aaphavela omwiiva Eliya

Eliya aakhala wIsarayeli khalai, ohinatthi oyariwa Yesu. Okathi owo, Akhabi aari mwene a wIsarayeli ni khaamurumeela Muluku ekeekhai, Yehova. Akhabi ni mwaarawe, Yezabeli, yaamulompa muluku eethiru Bayali. Nto aIsarayeli anceene yaamurumeela Bayali. Pwiyamwene Yezabeli aari ootakhala ni aaniphavela owiiva arumeyi a Yehova, omuhela muhina Eliya! Nyuwo munnisuwela exeeni Eliya aapanke awe?—

Eliya aahitthyawa! Aahirowa mutakhwani ni ahiipitha munikhukuni. Nyuwo munnisuwela nthowa naya?— Aayo,  owo aamoova. Masi Eliya aahaana olipa murima. Mwaha wa xeeni? Mwaha woowi owo aanisuwela wira Yehova ammukhaliherya. Yehova aahitoko omooniherya Eliya owerya wawe. Ekwaha emosa, Yehova aahaakhula nivekelo na Eliya vaavo aakuminhe awe mooro wiirimu. Nto Yehova anwerya omukhaliherya Eliya!

Yehova aamukhalihenrye sai Eliya?

Okathi Eliya aari awe munikhukuni, Yehova aahimukoha wira: ‘Muniirani-mu?’ Eliya aahaakhula wira: ‘Miyo paahi kihanle kolompakani. Nto kooriipiwa murima ni kinoova wiiviwa’. Eliya uupuwela wira arumeyi otheene a Yehova, yahiiviwa. Masi Yehova aahimuleela wira: ‘Enihimya anyu khahiyo ekeekhai’. Ahaavo atthu 7.000, yaawo anikiiwelela. Muhoove. Sihaavo itthu sinceene kiniphavela aka woorumani!’ Niireke Eliya aahihakalala mwaha wa wiiwa masu awo?—

Exeeni eniixutta anyu sa ele yaamwiiranenle Eliya?— Muhiriipiweke murima ni woova. Nyuwo mookhalana apatthani animphenta Yehova ni anoophentani. Yehova ookhalana owerya wuulupale ni onimookhaliheryani! Kiireke khamunihakalala mwaha woosuwela wira khahiyo muri mekhinyu?—

MUSOME MBIIBILIYANI MWANYU