Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Muwiixuttihe Aniinyu

 YOOSOMA 11

Alopwana a Khalai Yaalempe sa Yesu

Alopwana a Khalai Yaalempe sa Yesu

Nyuwo munnaaweha alopwana ari valataratoni-va?— Masina aya taala: Matheyo, Marko, Luka, Yohani, Pedru,Yakobo, Yuda, ni Paulo. Otheene aya yaakhala okathi wa Yesu ni aalepa itthu voohimya sa owo. Nrowe noone itthu alempe aya.

Exeeni enisuwela anyu sa alopwana ala?

Araru a yaawo yaari arummwa yaalaleerya ni Yesu. Nyuwo munnisuwela masina aya?— Awo aniitthaniwa Matheyo, Yohani, ni Pedru. Matheyo ni Yohani yaanimusuwela  saana Yesu. Awo aalepa iliivuru sinilavula sa okumi awe. Yohani oolepa eliivuru eniitthaniwa Wisupulula, ni ipaphelo 3 siniitthaniwa Epaphelo Yoopacerya ya Yohani, Epaphelo Yanenli ya Yohani, ni Epaphelo ya Neeraru ya Yohani. Murummwa Pedru oolepa ipaphelo piili siri mBiibiliyani. Iyo siniitthaniwa: Epaphelo Yoopacerya ya Pedru, ni Epaphelo ya Nenli ya Pedru. Mwa epaphelo awe ya nenli, Pedru oolepa sa okathi Yehova aalavunle awe wiirimu oriki: ‘Ola mwanaka onimphenta aka: Onnikitteeliha murima’.

Nave-tho, ahaavo alopwana akina ari valataratoni, alempe iliivuru sinilavula okumi wa Yesu. Mmosa a yaawo ti Marko. Waaniheryasa owo aari ni Yesu vaavo aavariwa awe, ni aahiweha itthu sotheene siiraneyale. Mulopwana mukina ti Luka. Owo aari meediku, waaniheryasa aakenle eKristau ahinatthi Yesu okhwa.

Alopwana akina anli munaaweha anyu valataratoni, yaari axinnawe Yesu. Nyuwo munnisuwela masina aya?— Awo ti Yakobo ni Yuda. Wanipacerya awo khiyaamwaamini Yesu. Yuupuwela wira aaroovahuwa. Masi muhoolo mwaya, yaahimwaamini Yesu ni khukhala maKristau.

Mulopwana ookiserya ori valataratoni, ti Paulo. Ohinatthi okhala muKristau, aitthaniwa Saulo. Owo aanaahaaxa maKristau ni aari mulopwana ootepa otakhala. Munnisuwela exeeni yaamwiirinhe Paulo okela eKristau?— Nihiku nimosa, Paulo iira eettaka orowaka oDamaasiko. Nto mootutuxerya aahiiwa nsu naakhuma wiirimu. Nsu nlo naari na Yesu! Nto Yesu aahimukoha Paulo wira: ‘Xeeni nyuwo munaahaaxa anyu ale anikaamini?’ Nuumala-vo, Paulo aahirukunuxa okumi awe khukhala muKristau. Paulo oolepa iliivuru 14 sa mBiibiliyani, okhuma aRoma mpakha aHéberi.

Hiyo ninnimusoma Biibiliya khula nihiku, kiira?— Nto vaavo nimmusoma ahu Biibiliya, ninniixutta itthu sinceene Yesu aapanke awe. Niireke munniphavela wiixutta itthu sikina voohimya sa Yesu?—

MUSOME MBIIBILIYANI MWANYU

  • 2 Pedru 1:16-18

  • Marko 3:21; 14:51

  • Yuda 1

  • Miteko 9:1-18