Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Waakhuliwa wa Makoho 10 Yaawo Anikohiwa ni Amiravo

 NIKOHO 2

Kiireke ti Vootthekeya Oxankiheya ni Erutthu Aka?

Kiireke ti Vootthekeya Oxankiheya ni Erutthu Aka?

XEENI VARI AYA VOOLOKA WUUPUWELA NIKOHO NLO?

Sihaavo itthu sikina sootepa otthuneya ovikana ele eniweha anyu valoolani.

NYUWO MWAAROWA OPAKA EXEENI?

Muupuwele ela: Anamuyari awe ni apatthani awe Júlia animakela omuleela wira owo ori muthala ene, masi okathi oniiweha awe valoolani, onnoona wira khoreere oneneva. Owo onnilavula so: “Kihaana wootta vakhaani”.

Okathi vakhaani ovinre Júlia aahimpaka palano wira aarowa olyaaka vakhaani paahi wira ovukule erutthu awe ikiilu 5. Vano Júlia oniphavela omwaakhwaniherya palano owo wira ovukule ikiilu iyo hata ovoliwaka etala . . .

Vaakhanle wira mwa Júlia, mwaarowa opaka exeeni?

MUUPUWELE SAANA!

Moota muniweha anyu erutthu anyu pooti olikanaka ni eloola enimukumiherya mutthu oohekemana

Khahiyo vootthekeya oxankiheya ni erutthu anyu. Biibiliya onnaaromola alopwana ni athiyana yaawo yaari ooreera ntoko: Sara, Rakheli, Abigayili, Yosefe, ni Davidi. Nave Biibiliya onihimya wira aahikhala muthiyana aitthaniwa Abixagi yoowo aari “òrerexa”.1 Mamwene 1:4.

Masi, amiravo anceene annixankiheya mootepana ni makhalelo a erutthu aya. Eyo ennakumiherya mixankiho sinceene. Muthokorerye ela:

  • Yootokosa emosa yaapakiwe yoonihenrye wira nnaamwi aximwali 58 pursento yuupuwelaka wira khareere oneneva ovikana mitita, masi anenenve tthiri ari 17 pursento.

  • Yootokosa ekina enooniherya wira athiyana 45 pursento yaawo yoottale vakhaani, yaakupali wira yaahootta mootepana.

  • Amiravo akina, okathi aniimananiha aya ovukula ikiilu sa erutthu aya wira yootte, anniphwanya oretta oniitthaniwa anorexia, eyo piiyo, oretta onimwiiriha mutthu ohiphavela olya ni oniiva.

 Akhala wira munoona wira moopacerya okhalana oretta owo aahiiso khamuniphavela olya, muhaana oveka nikhaliheryo. Pooti omuleela namuyari anyu aahiiso mutthu mukina oororomeleya. Biibiliya onihimya so: “Mpatthani onnimphenta mpatthani awe okathi t’ukathi: onnisuwanyeya okhala mun’awe okathi w’oxanka”.Miruku 17:17.

MMANANIHEKE OKHALANA MIKHALELO SOOREERA!

Enimwiiriha mutthu oreera ni ophwaneliwa, murima awe ohiya erutthu. Mmuupuwele Absalomi, mwanawe Mwene Davidi. Biibiliya onihimya so:

“Kharivo mutthu òrera witho onlikana n’Absalomi: Okhuma va muru mpakha inawu sawe ari òrerene”.2 Samuweli 14:25.

Hata vari siiso mmiravo owo aari mutthu oowiixinnuuha, nanrima, ni mulavilavi! Biibiliya onnimuromola Absalomi ntoko mutthu oohiiwelela, ni oolupattha.

Ti maana aya Biibiliya onnivaha awe miruku iya:

‘Nware omutthu wa nanano’.aKolosi 3:10.

“Orera wanyu ohikhaleké wa mwerutthuni . . . , orera wanyu okhalé murim’anyu”.1 Pedru 3:3, 4.

Khahiyo vootthekeya ophavela okhala mutthu oophwaneliwa, masi etthu yootepa otthuneya murima anyu. Mwali oniitthaniwa Phylicia, ohimmye so: “Tthiri okhalana mikhalelo sooloka ti etthu enirowa waasivela akina ohiya ikuru, aahiiso oreera owiitho. Oreera wanyu pooti waasivela anamunceene, masi etthu eniwiiriha ohooliyalani ti makhalelo anyu ooloka ni murima anyu”.

MUTOKOSE ERUTTHU ANYU

1 Niireke nyuwo khamunsiveliwa ni moota erutthu anyu siri aya?

2 Mootoko ompaka palano wira mooperariwe aahiiso mulyeeke eyoolya vakhaani wira mulokiherye etthu ehinoosivelani mwerutthuni mwanyu?

3 Vaakhanle wira munniwerya, itthu xeeni mwaarowa anyu olokiherya sa erutthu anyu? (Muthanle moolumo aniphavela anyu anittharelana.)

  • ORAKAMA WALA OKHUVEYA

  • OLEMELA

  • IKHARARI

  • ERUTTHU

  • OWIITHO

  • EKOORE YA ERUTTHU

Akhala wira muhaakhula wira “aayo” wa makoho 1 ni 2, ni khuthanla etthu emosa aahiiso sinceene wa nikoho 3, waaniheryasa muniiweha mwa enamuna yoohikhalela moovirikana ni ele atthu akina aniweha aya. Musyake otepiha itthu ni oxankiheya mootepana ni erutthu anyu.1 Samuweli 16:7.