Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Waakhuliwa wa Makoho 10 Yaawo Anikohiwa ni Amiravo

 NIKOHO 4

Kiireke Kihaana Ovitha Soovonya Saka?

Kiireke Kihaana Ovitha Soovonya Saka?

XEENI VARI AYA VOOLOKA WUUPUWELA NIKOHO NLO?

Weemererya soovonya sanyu onoowiirihani okhala mutthu a miruku ni oororomeleya.

NYUWO MWAAROWA OPAKA EXEENI?

Muupuwele ela: Tino onimmana boola ni apatthani awe, nto murima onnimwaaluwa onammana vanceene mpakha opwexa eviidru ya ejanela ya namwaattamanani awe.

Vaakhanle wira nyuwo mwa Tino, mwaarowa opaka exeeni?

MUUPUWELE SAANA!

NYUWO POOTI OTHANLA ETTHU EMOSA:

  1. Otthyawa.

  2. Onvaha nthowa mutthu mukina.

  3. Orowa omuleela mwaneene etthu ekhumelenle, ni wiivahererya omuliva.

Nyuwo pooti woonaka okhweya othanla enamuna 1. Masi ti vooloka weemererya soovonya sanyu, hata eri ene opwexa ejanela wala etthu ekina.

 ITTHU 3 SINOONIHERYA OTTHUNEYA WAYA WEEMYA SOOVONYA SAHU

  1. Ti vooloka opaka eyo.

    Biibiliya onihimya so: “Mahiku othene ni miteko sothene ephwanyiweke òrumeyene ni òroromeleya”.Tito 2:10.

  2. Atthu anceene waasivela waalevelela ale aneemererya soovonya saya.

    Biibiliya onihimya so: “Onvithavitha sonanara sawe, khankelela oholo: ole onìhimya, attharuwaka, onnimoreliwa ikharari”.Miruku 28:13.

  3. Etthu yootepa otthuneya ori omuhakalaliha Muluku.

    Biibiliya onihimya so: “Tthiri Apwiya [Yehova] anniphweliwa n’atakhali: annipatthana n’atthu òloka”.Miruku 3:32.

Katarina, orina iyaakha 20, aahilivihiwa muulutha mwaha wa wuupiha ekaaro mootepana. Owo aahivitha muulutha owo wira paapawe ohisuwele. Masi muhoolo mwaya, mwaha owo waahisuweliwa. Katarina onihimya so: “Nuuvira eyaakha emosa, apaapa yaahoona wira miyo kaahikhalana muulutha, nto yaahinanariwa vanceene mwaha wa mweettelo aka!”

Exeeni nniixutta ahu? Katarina onihimya so: “Ovitha ele etthenke anyu, khonikhaliherya, masi onootepiha. Pooti vapisaka, munooliva ele etthenke anyu!”

MWIIXUTTE ETTHU VOOHIMYA SA SOOVONYA SANYU

Biibiliya onihimya so: “Othene ahu ninnittheka n’inamuna sinjene”. (Yakobo 3:2) Nave-tho sintoko ninweha ahu, onitthuneya wiiyeviha ni wiiwexexa nuulumo na Muluku wira mutthu eemererye soovonya sawe.

Nivalo ninttharelana ti wiixutta orweela wa soovonya sanyu. Mwali mmosa oniitthaniwa Vera ohimmye so: “Kinnimananiha wiixutta itthu sinceene orweela wa soovonya saka. Soovonya iyo sinkhala ntoko nikuruta ninrowa okikhaliherya oxintta khula muxankiho okhanle ookhumelela muhoolo”. Nrowe niwehe moota mukhanle anyu oopaka eyo.

Akhala wira apapinyu aawoolihani bisikeleta nto khunteya, munrowa opaka exeeni?

  • Kinrowa omaala paahi wira apaapa ehisuwele.

  • Kinrowa waaleela apaapa ele ekhumelenle.

  • Kinrowa waaleela apaapa ele ekhumelenle ni onvaha nthowa mutthu mukina.

Akhala wira moopaka eporova oxikola ni mphwanya enoota yaamukhaani, mwaha woohiilokiherya munrowa opaka exeeni?

  • Kinrowa ohimya wira eporova ti yaavinle.

  • Kinrowa weemya wira nkaalokihenrye myaha sa oxikola.

  • Kinrowa ohimya wira prusoore ole khonikiphavela.

Mutthu onimakela wuupuwelela soovonya sawe sa khalai, onilikana ni mulipa-oneettiha ekaaro yoowo okathi wotheene oniweha eloola enikhala muhina mwa ekaaro

 Vano nitakiherye wira nyuwo (1) mwa paapa anyu ni (2) mwa prusoore. Paapa anyu ni prusoore anyu onrowa wuupuwela exeeni akhala wira nyuwo munneemererya soovonya sanyu? Mwavitha-vale soovonya sanyu, awosa anirowa woonela sai?

Vano muupuwele itthu soohiloka mpanke anyu mmwaisana ni mwaakhule makoho ala anittharelana.

Exeeni mwaapanke anyu okathi mwaatthenke anyu?

  • Kaaroovitha.

  • Kanvahale nthowa mutthu mukina.

  • Kaaheemererya yoovonya aka.

Akhala wira khamweemyale yoovonya eyo, moonenle sai?

  • Kaahihakalala maana nkaahaaxiwe!

  • Kaahikhalana nthowa maana kaahaana ohimya ekeekhai.

Munoonela sai, mwaarowa ophuka sai muxankiho ole mwa enamuna yooloka?

Exeeni muxuntte anyu voohimya sa soovonya sanyu?

MUNOONELA SAI?

Xeeni atthu anceene ahineemererya aya soovonya saya?

Atthu akina anirowa wuupuwela sai, akhala wira munimakela ovitha soovonya sanyu aahiiso weemererya?Luka 16:10.