Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Waakhuliwa wa Makoho 10 Yaawo Anikohiwa ni Amiravo

 NIKOHO 1

Miyo ka Pani?

Miyo ka Pani?

XEENI VARI AYA VOOLOKA WUUPUWELA NIKOHO NLO?

Wiisuwela saana ni osuwela malamulo aneettela anyu onimookhaliheryani opaka soothanla sa miruku okathi munikhanyereriwa anyu opaka itthu soohiloka.

NYUWO MWAAROWA OPAKA EXEENI?

Muupuwele ela: Carla ori ofestani, masi nuuvira minutu 10 paahi onniiwa nsu na mutthu onimusuwela awe nriki:

“Muniirani-vo mekhinyu?”

Okathi Carla onirukunuwa awe, onninweha mpatthani awe Jéssica okunxe ene igarafa piili sa cerveja. Jéssica onninvaha egarafa emosa nto onahimya so: “Munwuryeke ola, vano nyuwo muhinnuwa, muhakalaleke”.

Carla oniphavela okhootta, masi khoniphavela wooniwa ni Jéssica okhala ntoko mulolo. Awosa apatthani eekeekhai. Nto akhala wira Jéssica onoowurya, khiivo enirowa ohononeya. Carla onuupuwela so: ‘Ola cerveja paahi, khahiyo olya mirette soohapala’.

Vaakhanle wira nyuwo mwa Carla, mwaarowa opaka exeeni?

MUUPUWELE SAANA!

Wira mpake etthu yooloka voohimya sa mwaha ntoko ola, muhaana osuwela vamurimani vanyu wira nyuwo ti pani, ni malamulo xeeni aneettela anyu. Osuwela itthu iyo onimoovahani ikuru wira mpakeke itthu sooloka, ohiya waahiya atthu akina yeettihaka okumi anyu.1 aKorinto 9:26, 27.

Munrowa owerya sai opaka eyo? Makoho anittharelana animookhaliheryani vanceene.

 ITTHU XEENI KINWERYA AKA OPAKA?

Wuupuwelela itthu sinisuwela anyu ni siniwerya anyu opaka onimookhaliheryani olipa murima.

NTAKIHERYO NA MBIIBILIYANI: Murummwa Paulo aalempe so: “Ohiya miyo ohilavulaka orattene, nto korattela itthu sa Muluku”. (2 aKorinto 11:6) Paulo aanisuwela saana Nuulumo na Muluku, nto eyo yaanimukhaliherya okhala oolipa okathi aavaanyihiwa awe. Owo kheemya wira moolumo oohiloka a atthu akina emutteettheihe.2 aKorinto 10:10; 11:5.

MWIITOKOSE: Mulepe vathi-vo itthu munisuwela anyu aahiiso mikhalelo sooloka murina anyu.

Mukhalelo xeeni muulupale murina anyu? Mutthokiherye. (Mwa ntakiheryo, niireke mwa mutthu oophenta? Oovaha? Ooreera murima? Oororomeleya?)

2 ITTHU XEENI KIHINWERYA AKA OPAKA?

Sootteettheya sa mutthu pooti olikanyihiwa ni mukwitha. Owo pooti wuulaana ni ohonona eyuuma yotheene. Vamosaru, weemya wira sootteettheya sanyu soolamulelekeni, pooti ohonona omutthu anyu wotheene.

NTAKIHERYO NA MBIIBILIYANI: Paulo aanisuwela sootteettheya sawe. Owo aalempe so: “Mmurimani mwaka kinnisiveliwa n’ikano sa Muluku: nto kinnona mwerutthuni mwaka makhalelo makina anvirikanya simphavelaya murim’aka. Makhalelo awo annikikhaliha epottha ya ikano s’etampi, eri mwerutthuni mwaka”.aRoma 7:22, 23.

MWIITOKOSE: Sootteettheya xeeni munoona anyu wira muhaana oxintta?

 3 TI SIVI SIRI SOOLUKAMA SAKA?

Nilikanyihe wira muniphavela weetta mukwaha. Niireke mwanwela ekaaro yeeyo enirukurerya opuro omosa paahi ehirowaka otthu, mpakha omala disel? Opaka eyo waarowa okhala ololo, ni mwaamuxeleliwa!

Exeeni eniixutta ahu? Soolukama sinimookhaliheryani osuwela opuro onrowa aya okumi anyu ohiya omakela okhala opuro omosa. Maana moosuwela opuro onrowa anyu ni moota woophiya.

NTAKIHERYO NA MBIIBILIYANI: Paulo aalempe so: “Miyo-tho kinnitthimaka, nto koosuwela ontthimakelaka-wo”. (1 aKorinto 9:26) Paulo khaahiyale wira itthu sikhumeleke mekhaya mweekumini, masi aahikhalana soolukama ni aaniimananiha wira ophwanye soolukama iyo.aFilipi 3:12-14.

MWIITOKOSE: Mulepe vathi-vo soolukama tthaaru muniphavela anyu waakhwaniherya mwaakha owo.

4 ITTHU XEENI KINIKUPALI AKA?

Osuwela saana ele eri vamurimani vanyu, onlikana ni mwiri orina mitathaari soolipa. Iyo sinnikhaliherya mwiri owo hata okathi wa epheyo yuulupale

Mutthu ohirina sookupali sawe, na mirima miili. Ntoko namanriya onituruka ekoore awe, nyuwo munrowa oturuka sookupali sanyu wira mulikaneke ni apatthani anyu. Ole onipaka eyo khonisuwela omutthu awe.

Masi, okathi munipaka anyu etthu moovarihana ni sookupali sanyu, munnittittimiha okumi anyu ohiya weettihiwaka ni atthu akina.

NTAKIHERYO NA MBIIBILIYANI: Okathi Daniyeli aari awe mwammiravo, aahirakamelana ni anamuyari awe. Hata vari siiso, owo aahithanla “mmurimani mwawe” omwiiwelela Muluku. (Daniyeli 1:8) Eyo enooniherya wira Daniyeli aanisuwela omutthu awe. Owo aakhala moovarihana ni ele aakupali awe.

MWIITOKOSE: Itthu xeeni munikupali anyu? Mwa ntakiheryo, niireke munnikupali wira Muluku ohaavo? Mwaha aya? Etthu xeeni enookupalihani wira Muluku ookhala?

Niireke munnikupali wira malamulo a Muluku apakeliwe wookhapelelani? Akhala wira munnikupali, exeeni enookupalihani?

Vano, nyuwo muniphavela okhala ntoko exeeni: Mwiri woolipa ohinimora okathi wa epheyo yuulupale, aahiiso nikukhu noowuuma nenno ninvavihiwa ni khula epheyo? Mwavarexexa ele enikupali anyu munrowa olikanaka ni mwiri. Eyo enimookhaliheryani waakhula nikoho noowi: Miyo ka pani?