Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Ihapari Sooreera Sinikhuma wa Muluku!

 YOOSOMA 6

Nlipelelo Xeeni Nikhanle wa Atthu Akhwiiye?

Nlipelelo Xeeni Nikhanle wa Atthu Akhwiiye?

1. Ihapari xeeni sooreera voohimya sa alipa ookhwa?

Okathi Yesu aaphiyale awe oBethania waattamela oYerusalemu, yiira evinre ene mahiku maxexe, nuumala okhwa Laazaro mpatthani a Yesu. Yesu aahirowa omahiye ni Martha ni Maria axirokorawe namukhwi ole. Niinanoru muttitthi wa atthu waahithukumana. Nkuupuwelani moota Martha ni Maria yaahakalanle aya nuumala Yesu omuhihimuxa Laazaro!Mmusome Yohani 11:21-24, 38-44.

Martha aanisuwela ihapari sooreera voohimya sa ale akhwiiye. Aanisuwela-tho wira alipa ookhwa anrowa ohihimuxiwa wira atthikele okhala elapo ya vathi.Mmusome Yobi 14:14, 15.

2. Tuuvi ori mukhalelo wa alipa ookhwa?

Muluku aahimuleela Adamu wira: “Tthiri nyuwo mw’ètthayá, munotthikela-tho mutthayani memmo”.MAPHATTUWELO 3:19.

Muluku ohaapaka apinaatamu orumeelaka etthaya. (Maphattuwelo 2:7; 3:19) Hiyo khanipakiwe wira nikhalaneke munepa. Hiyo nirina erutthu ya pinaatamu paahi, tivonto khiivo etthu enikhuma nuumala okhwa. Okathi onikhwa ahu, ottoopare ahu onnookhwa, ni miyuupuwelo sahu sinnimala. Tthiri nuumala ohihimuwa, Laazaro khaahimyale etthu sa wukhwaani okhala wira alipa-ookhwa khanisuwela etthu.Musome Esalimo 146:4; Musuweli 9:5, 6, 10.

Niireke Muluku onnaahukhumu atthu omooroni nuumala okhwa? Okhala wira Biibiliya onihimya wira namukhwi khonisuwela etthu, Yowiixuttiha eyo ti yeethiru, ni ennimunyohola Muluku. Vannimuhiirya Muluku wuupuwela paahi etthu eyo.Mmusome Yeremiya 7:31.

 3. Niireke alipa-ookhwa anniwerya olavula ni hiyo?

Mutthu okhwiiye khonilavula ni khoniiwa etthu. (Esalimo 115:17) Masi malaikha makina tootakhala, tivonto awo pooti olavula ni atthu akumi yoothereryaka okhala atthu yaale akhwiiye. (2 Pedru 2:4) Yehova onnikhoottiha weererya olavula ni atthu ookhwa.Mmusome Otumererya 18:10, 11.

4. Tani onrowa waattikiherya ekumi alipa-ookhwa?

Atthu oowiiraka imilyau sene akhwiiye, anootthikela okhala akumi valaponi. Hata ale yahaamusuwela Muluku nto khupaka itthu soohiloka, anrowa ohihimuxiwa.Mmusome Luka 23:43, Biblya Exirima; Miteko 24:15.

Atthu anrowa ohihimuxiwa, animwiixuttihiwa masu a Muluku wira emwaamini Yesu ni omwiiwelela. (Wisupulula 20:11-13) Akhala wira atthu awo, anoopaka itthu sooloka, anoophwanya okumi woohimala valaponi.Mmusome Yohani 5:28, 29.

5. Ohihimuxiwa, onniixuttiha exeeni voohimya sa Yehova?

Mwaha woomurumiha mwanawe wira okhwe mwaha wa hiyo, Muluku ookumiherya nlipelelo wa ale akhwiiye. Nto, ohihimuwa onniixuttiha wira Yehova toophenta, ni tooreera murima. Nto okathi wa ohihimuxiwa alipa-ookhwa, ti pani oniphavela anyu onweha?Mmusome Yohani 3:16; aRoma 6:23.