Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Ihapari Sooreera Sinikhuma wa Muluku!

 YOOSOMA 2

Muluku ti Pani?

Muluku ti Pani?

1. Xeeni vanitthuneya ahu omukokhorela Muluku?

Muluku ekeekhai, topattunxe itthu sotheene. Muluku khorina wanipacerya wala wanikisa. (Esalimo 90:2) Owo tonikumiherya ihapari sooreera siri mBiibiliyani. (1 Timótheyo 1:11) Mwaha woonivaha ekumi, hiyo nihaana omukokhorelaka yoowo paahi.Mmusome Wisupulula 4:11.

2. Muluku ori sai?

Khuuvo pinaatamu otonko omoona Muluku maana owo khonooneya, eyo piiyo, makhalelo awe toovirikana saana ni itthu sotheene sinooneya sipattunxe awe valaponi. (Yohani 1:18; 4:24) Masi, hata ori muulupalexa, hiyo nnoowerya osuwela makhalelo awe orweela mwa itthu sipattuxale awe. Mwa ntakiheryo: ovirikana wa mithinto sa mihokorokho ni ifilori, ontaphulela wira owo toophenta ni amiruku. Wunnuwa wa elapo epattunxe awe, onooniherya owerya wawe.Mmusome aRoma 1:20.

Omusoma Biibiliya ti etthu enrowa onikhaliherya osuwela mikhalelo sa Muluku. Tthiri Biibiliya paahi tonrowa onooniherya omutthu wa Muluku, niire so, moota owo onaakhapelela awe atthu ni moota onipaka awe itthu mwa inamuna soovirikana, moovarihana ni itthu siniiraneya.Musome Esalimo 103:7-10.

3. Niireke Muluku ookhalana nsina?

Yesu aahimmye so: “Tith’ihu, muri wirimu! Nsina nanyu nivuwihiwe”. (Matheyo. 6:9) Nnaamwi Muluku orina ene maihaneliwo manceene, owo orina nsina nimosa paahi. Moota wooromola nsina nno onnivirikana wa khuta nttaava. Mwa nttaava na Emakhuwa, nsina na Muluku ti “Yehova”, wala “Yahvéh”.Musome Esalimo 83:19, Biblya Exirima.

ABiibiliya akina nsina na Muluku nookumihiwa khuranttelihiwa ni moolumo oowi Apwiya, wala Muluku. Masi okathi aalempwa awe Biibiliya, nsina noowi Yehova naaniphwanyaneya etthu yowiiraka 7.000. Ohiya vo,  Yesu Kristu, aanasuweliha atthu nsina nlo okathi awiixuttiha awe sooruma sa Muluku.Mmusome Yohani 17:26.

4. Niireke Yehova onninoonela vatthu?

Ntoko tiithi ola oophenta, vano Muluku onireherya itthu mwa mureerelo ahu woohimala.

Niireke ohaawa wuulaanale onooniherya wira Yehova khoniwoonela vatthu apinaatamu? Akina anihimya wira Muluku onniniphwanyiha maxakha wira oneehererye, masi eyo khahiyo ekeekhai.Mmusome Yakobo 1:13.

Muluku ohaavaha apinaatamu eparakha ya othanla sowiira mootaphuwa. Nto eyo ehaana oniirihaka ophavela othanla omurumeela Muluku. (Yoxuwa 24:15) Masi, atthu anceene annithanla owiirela akina itthu soohiloka, tivonto otakhala wuulanne aya. Itthu iyo sinnimunanara vanceene Yehova.Musome Maphattuwelo 6:5, 6.

Tthiri Yehova onninoonela vatthu. Owo oniphavela wira nikhaleke saana. Moohipisa onoomaliha ohaawa, ni ale anikumiherya ohaawa iwo. Masi yookhala etthu enimwiiriha mpakha va ohimaliha maxakha ala. Hiyo ninrowa osuwela etthu eyo mwa yoosoma ya 8.Mmusome 2 Pedru 2:9; 3:7, 13.

5. Ninrowa wataana sai ni Muluku?

Yehova oniphavela wira nimwaattamele, nimulompaka wala olavula ni yena. Yehova, onnimuthokorerya khula mutthu. (Esalimo 65:3; 145:18) Muluku onnilevelela itampi sa mutthu. Owo onnoona wiimananiha wahu wira nimuhakalalihe, hata okathi mukina nivonyaka moohilakela. Nto, hata niri atthu oottheka vanooweryaneya wataana ni Muluku.Musome Esalimo 103:12-14; Yakobo 4:8.

Yehova oonivaha okumi, tivonto nihaana omphentaka vanceene onvikana mutthu mukina. (Marko 12:30) Nto vaavo vanooniherya anyu omphenta Muluku, mwiixuttaka ni weettela sooruma sawe, nyuwo munootepaka wataana nuuwo.Mmusome 1 Timótheyo 2:4; 1 Yohani 5:3.

MWIIXUTTE SIKINA

IHAPARI SOOREERA SINIKHUMA WA MULUKU!

Niireke Muluku Ookhalana nsina?

Muluku ookhalana miitthaneliwo manceene a nttittimiho, ntoko Nanwerya Sotheene, Mpattuxa, ni Pwiya. Eviidiyu ela enittittimiherya nsina na Muluku nenno nimphwanyaneya ikwaha sinivikana 7,000 mBiibiliyani.