Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Ihapari Sooreera Sinikhuma wa Muluku!

 YOOSOMA 13

Ihapari Xeeni Sooreera Voohimya sa Etiini?

Ihapari Xeeni Sooreera Voohimya sa Etiini?

1. Niireke wira itiini sotheene ti sooloka?

Ekeekhai wira khula etiini aakhala atthu ooreera murima. Nto etthu yooreera, osuwela wira Muluku onniwoona atthu awo otheene. Masi, etthu yootakhala okhala wira apinaatamu annirumeela etiini wira apakeke itthu soohiirya. (2 aKorinto 4:3, 4; 11:13-15) Soohimmwa sinooniherya wira itiini sikina sinniwiiva atthu ahitthenke, owiiva atthu nloko notheene, owana ekhotto ni waararuxa anamwane. Tthiri itthu iyo sinnaaxankiha ale animwaamini Muluku!Mmusome Matheyo 24:3-5, 11, 12.

Etiini yekeekhai enninvuwiha Muluku, masi etiini yoowoka ennimunanara; mwaha wowiixuttihaka itthu sihikhanle mBiibiliyani, voohimya sa Muluku ni mukhalelo wa alipa-ookhwa. Yehova oniphavela wira atthu esuwele ekeekhai voohimya sa owo.Mmusome Ezekiyeli 18:20, 1 Timótheyo 2:3-5.

2. Ihapari xeeni sooreera voohimya sa etiini?

Ti voohakalaliha osuwela wira Muluku khoniwokeya ni itiini sinoothererya omphenta Muluku, masi siphentaka olumwenku wa Satana. (Yakobo 4:4) Biibiliya onihimya itiini sotheene soowoka okhala “Babilonia Mulupale”, mwaha wookhuma oBabeli, muttetthe wa khalai, nuuvira Mutaaseke a Mahiku a Nowe. Moohipisa, Muluku onrowa omala-maliha itiini sotheene sowootha sinaawoka apinaatamu.Mmusome Wisupulula 17:1, 2, 5, 16, 17; 18:8.

Masi sookhala ihapari sikina sooreera. Yehova khaaliyanle atthu ooreera murima ale aniwokiwa ni itiini sowootha sa mulaponi. Muluku onniwiixuttiha ekeekhai nto awo khiyakhala oowiiraana.Mmusome Mikeya 4:2, 5.

 3. Nto atthu ooreera murima anivekeliwa opaka exeeni?

Etiini yekeekhai enniwiiraaniha atthu

Yehova onnaakhapelela ale aniphenta itthu sooloka ni ekeekhai. Owo onnaalopola wira akhume mutiinini yoowootha. Tthiri atthu animphenta Muluku, annirukunuxa mweettelo aya wira amuhakalalihe.Mmusome Wisupulula 18:4.

Eseekulu yoopacerya, atthu ooreera murima yaiwale ihapari sooreera ni awiixutti a Yesu, yaahitteeliwa murima. Yehova aahiwiixuttiha mweettelo musya, woohakalaliha, waarina yoolakela aya ni nlipelelo. Nto atthu awo aanivaha ntakiheryo nooloka, okhala wira yahiiwelela ihapari sooreera, khoona okhala etthu yootepexa otthuneya mookumini mwaya.Mmusome 1 aTesalonika 1:8, 9; 2:13.

Yehova onniwaakhela atthu anihiya etiini yoowootha khiyeetta ni atthu aneettela etiini yekeekhai. Akhala wira munnaakhulela nlattulo noophenta na Yehova, munrowa okhala mpatthani awe, wataana ni arumeyi a Yehova ni ophwanya okumi woohimala.Mmusome Marko 10:29, 30; 2 aKorinto 6:17, 18.

4. Muluku onrowa oruuha sai ohakalala elapo yotheene?

Ophukeliwa wa etiini yoowootha onniirela mpantta wa ihapari sooreera. Okhala wira onooruuha murettele wa atthu anihaaxiwa. Khenrowa-tho okhala etiini yoowoka wira yaawokeke ni waakawanya atthu. Atthu otheene valaponi, anrowa okhala oowiiraana ni omukokhorela Muluku mmosa paahi ekeekhai.Mmusome Wisupulula 18:20, 21; 21:3, 4.