Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Ihapari Sooreera Sinikhuma wa Muluku!

 YOOSOMA 10

Munrowa Osuwela Sai Etiini Yekeekhai?

Munrowa Osuwela Sai Etiini Yekeekhai?

1. Niireke etiini yekeekhai eri emosa paahi?

“Mwipasope n’atthu anìpaka maprofeta”.MATHEYO 7:15.

Yesu aawiixuttinhe atthareli awe etiini emosa paahi yekeekhai. Etiini yekeekhai enilikana ni ephiro eniphwanyiha okumi woohimala. Yesu aahimmye so: “amphwanya ephiro yeyo ari vakhani”. (Matheyo 7:14) Muluku oneemya paahi okokhorela wekeekhai onivarihana ni Nuulumo nawe na ekeekhai. Otheene animukokhorela Muluku ni ekeekhai, waamini waya ti wowiiraana.Mmusome Yohani 4:23, 24; 14:6; aÉfeso 4:4, 5.

2. Yesu aahimmye exeeni sa maKristau owootha?

“Awo annihimya wira annimusuwela Muluku, nto miteko saya sothene ti somukhotta Muluku”.TITO 1:16.

Yesu aahihimya wira maprofeta owootha yaamuhonona eKristau yekeekhai. MaKristau awo annoothererya okhala ekeekhai. Ikerexa saya sinihimmwa wira ti sa eKristau. Masi sowiira saya sinnooniherya mukhalelo aya. Moota xeeni? Okokhorela wekeekhai paahi torina MaKristau ekeekhai arina mweettelo ni mukhalelo wooloka.Mmusome Matheyo 7:13-23.

3. Munrowa waasuwela sai arumeyi ekeekhai a Muluku?

Thokoreryani sowooniherya iya thanu:

  • Arumeyi ekeekhai annimoona Biibiliya okhala Nuulumo na Muluku. Anniimananiha weettela sooruma sa Biibiliya. Nto etiini yekeekhai ennivirikana ni etiini eneettela soophavela sa pinaatamu. (Matheyo 15:7-9) Anamakokhorela ekeekhai, khanilaleya etthu emosa, khiyavara etthu ekina.Mmusome Yohani 17:17; 2 Timótheyo 3:16, 17.

  •   Atthareli ekeekhai a Yesu, annivuwiha nsina na Muluku, Yehova. Yesu aanivuwiha nsina na Muluku vaavo aasuweliha awe atthu. Owo anaakhaliherya atthu omusuwela Muluku ni aaniwiixuttiha ovekelaka wira nsina na Muluku nivuwihiwe. (Matheyo 6:9) Nto muttetthe onikhala anyu, ti pani aniwiixuttiha atthu nsina na Muluku?Mmusome Yohani 17:26; aRoma 10:13, 14.

  • MaKristau ekeekhai annilaleya Omwene wa Muluku. Muluku aahimuruwa Yesu valaponi wira alaleerye ihapari sa Omwene wa Muluku. Omwene owo tori nlipelelo noororomeleya wa apinaatamu othene. Yesu aahivikaniha olaleya Omwene owo mpakha nihiku na okhwa wawe. (Luka 4:43; 8:1; 23:42, 43) Owo aahimmye wira atthareli awe yaarowa olaleya Omwene owo. Nto akhala wira onnoorwa mutthu anawiixuttihani sa Omwene wa Muluku, nyuwo muniira mutthu owo oneetta etiini xeeni?Mmusome Matheyo 24:14.

  • Atthareli a Yesu, khaniira mpantta ni elapo ela yootakhala. Munoowerya waasuwela mwaha wa ohiirela waya mpantta myaha sa epoliitika, wala owana-wana oniiraneya mulaponi. (Yohani 17:16) Ohiya-vo, mweettelo aya khonitthara makhalelo ni soophavela soohiloka sa mulaponi.Mmusome Yakobo 4:4.

  • MaKristau ekeekhai anniphentana saana. Awo ahiixutta mBiibiliyani wira ahaana waaphentaka atthu a maloko otheene. Moovirikana ni itiini sowootha siniirela mpantta owana-wana wa mulaponi, arumeyi ekeekhai a Muluku annikhootta owana ekhotto. (Mikeya 4:1-3) MaKristau ekeekhai kharina nrima, tivonto, annirumeela okathi aya, mihakhu saya wira yaakhaliherye ni waalipiha akina.Mmusome Yohani 13:34, 35; 1 Yohani 4:20.

4. Nto vano munniwerya osuwela etiini yekeekhai?

Etiini xeeni sowiixuttiha saya sotheene sinikhuma mBiibiliyani, enivuwiha nsina na Muluku, ni enilaleya Omwene wa Muluku okhala nlipelelo wa apinaatamu otheene? Ekrupu xeeni ya maKristau enooniherya niphento nuulupale nto khiyakhootta owana ikhotto? Tuuvi ori muupuwelo anyu?Mmusome 1 Yohani 3:10-12.