Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Etthoko Anyu Enoowerya Okhala Yoohakalala

 MPANTTA 6

Moota Xeeni Anamwane Anirukunuxa Aya Etthoko

Moota Xeeni Anamwane Anirukunuxa Aya Etthoko

‘Anamwane nivahiwe ni Yehova’.Esalimo 127:3

Oyariwa wa mwaana pooti okhala etthu yoohakalaliha masi-tho yooxankiha wa anamathelana. Ntoko anamuyari asya, pooti otikinihiwa mwaha woosuwela wira vano munoovirihaka okathi munceene wira mmukhapelele mwaninyu. Ohirupa ni mixankiho sa mmuupuweloni pooti otteettheiha ekasamento anyu. Nave nyuwo ni ole othelanne anyu, munoopaka marukunuxo wira mmukhapelele mwaninyu ni ekasamento anyu. Biibiliya onrowa wookhaliheryani sai wira nvilele mixankiho iyo?

 1 MWIIWEXEXE MOOTA MWAANA ONIRUKUNUXA AWE OKUMI ANYU

ELE BIIBILIYA ONIHIMYA AWE: “Ole omphenta t’òvilela, t’òwarumela akhw’awe”. Nave onnihimya-tho wira “ole omphenta . . . khamphavela murerelo awe, khaniviruwa”. (1 aKorinto 13:4, 5) Ntoko maama a niinano, moohaaniherya nyuwo munrowa omuthokoreryaka mwaninyu vanceene. Masi, iyanyu pooti opacerya woonaka wira khonicaliwa. Nto muhiliyaleke wira nuuwo ohaana othokoreriwa. Moopixa murima ni mooreerela, munoowerya omukhaliherya woona wira munnimucalela hata mmukhapelelaka mwaana.

‘Nyuwo alopwana, mukhaleke ni nlema ni axaarinyu musuwelaka makhalelo aya’. (1 Pedru 3:7) Musuweleke wira amwaarinyu anoorumeelaka ikuru saya sinceene mwaha wa mwaana. Awo vano ahaana miritti isya. Nto iyo pooti waaxankiha, waakhulumula, ni waariipiha murima. Ikwaha sikina, awo pooti olavula etthu ehinoosivelani. Masi mmananiheke omaaleleya, maana “erayi mutthu òpixa murima onvikana nakhotto òtupa”. (Miruku 16:32) Mukhaleke a miruku ni mmukhaliheryeke mwaarinyu.Miruku 14:29.

ELE EKHANLE ANYU OOPAKA:

  • Axitiithi: Mmukhaliheryeke mwaarinyu orweela mwa omukhapelela mwaana, pooti okhala ohiyu. Nvukule okathi oniviriha anyu nvaraka miteko sikina. Eyo enimookhaliheryani oviriha okathi munceene muryeene ni mwaarinyu ni mwaninyu.

  • Aximaama: Okathi iyanyu oniphavela awe wookhaliheryani mwaana, mweemye nikhaliheryo nawe. Akhala wira khonivara saana muteko owo, muhimunyohole, masi mooreerela mmooniherye moota woovara.

 2 MULIPIHE EKASAMENTO ANYU

ELE BIIBILIYA ONIHIMYA AWE: ‘Òwanli aya anokhala ntoko mutthu mmosaru’. (Maphattuwelo 2:24) Nnaamwi murina ene mutthu musya, muupuweleke wira nyuwo nuule othelanne anyu nlelo muri “ntoko mutthu mmosaru”. Mwiimananiheke vanceene wira mulipihe ekasamento anyu.

Nyuwo aximaama, mwaaxukhureleke axiiyanyu mwaha wa nikhaliheryo anoovahaayani. Masu anyu ooxukhurela pooti olipiha ekasamento. (Miruku 12:18) Nyuwo alopwana, mwaaleeleke amwaarinyu wira munnaaphenta ni waavaha efaita vanceene. Mwaattottopeleke mwaha wa moota anikhapelela aya etthoko.Miruku 31:10, 28.

“Ahikhale omphavela oreriwa wawe, nto aphaveleke sinaphwanyiha oreriwa akhw’awe”. (1 aKorinto 10:24) Mmakeleke opaka etthu mmureerelo wa ole othelanne anyu. Nviriheke okathi woovaanela, ottottopelana, ni onwiriyana mukhwiinyu. Muhiphaveleke mureerelo anyu paahi voohimya sa orupihana. Muthokoreryeke sootthuneya sa ole othelanne anyu. Biibiliya oni: “Muhikhottaneké, vahikhaleru wira murimwìwanana”. (1 aKorinto 7:3-5) Nto, nvaanele saana mwaha ola ni ole othelanne anyu. Opixa wanyu murima ni wiiwexexa onoolipiha ekasamento anyu.

ELE EKHANLE ANYU OOPAKA:

  • Muhiliyaleke wiivaha okathi wooviriha hoothe ni ole othelan-ne anyu

  • Mpakeke itthu pooti okhala saamukhaani sinrowa omwiiriha iyanyu wala mwaarinyu woona wira munnimphenta; ntoko olepa epaphelo yaamukhaani wala onvaha etthu

 3 MMWIIXUTTIHE MWANINYU

ELE BIIBILIYA ONIHIMYA AWE: “Okhuma enamwane anyu, mosuwela solempwa sowarya: seiyo sinniwerya [owoopolani]”. (2 Timótheyo 3:15) Mumpake palano voohimya sa ele enirowa anyu omwiixuttiha mwaninyu. Owo ookhalana owerya wowiixutta etthu, hata ohinatthi oyariwa. Mwaana ori mmirimani, onoowerya wiiwa nsu nanyu, ni soophavela sanyu. Musomeke etthu ohoolo wa mwaninyu pooti oryeene mwaamukhaani. Hata akhala wira khoniiwexexa ele enisoma anyu, eyo enoomukhaliherya osiveliwa osoma annuwa vale.

Mwaana khoniyeva vahinreerela awe owiiwani mulavulaka sa Muluku. Mmuhiye mwaninyu wira oowiriyanekeni vaavo muninvekela anyu Yehova. (Otumererya 11:19) Hata okathi onithweela anyu ni mwaana, mulavuleke itthu Muluku opanke awe. (Esalimo 78:3, 4) Vaavo mwaana oninnuwa awe, onimoona wira munnimphenta Yehova nto onimwiixutta opaka etthu emosaru.

ELE EKHANLE ANYU OOPAKA:

  • Munvekele Muluku wira oovaheeni miruku wira mmwiixuttihe mwaninyu

  • Mulavuleke ikwaha sinceene itthu sootthuneya wa mwaninyu; nto owo onoopacerya wiixutta etthu moohipisa