Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Etthoko Anyu Enoowerya Okhala Yoohakalala

 Mpantta 7

Moota Womwiixuttiha Mwaninyu

Moota Womwiixuttiha Mwaninyu

“Molumo [ala] anovahakani olelo: mulepe mmuruni ni mmurimani mwanyu: mwalakiheryeke an’inyu”.Otumererya 6:6, 7.

Okathi Yehova aakumihenrye awe ekasamento yoopacerya, aahaavaha anamuyari muritti wa waahuwa anamwane. (aKolosi 3:20) Ntoko namuyari, nyuwo mookhalana muritti wa owiixuttiha aniinyu wira amphenteke Yehova ni okhala mutthu oniwerya wuupuwela mekhawe. (2 Timótheyo 1:5; 3:15) Nave, muhaana osuwelaka ele eri vamurimani va mwaninyu. Moohaaniherya, ntakiheryo nanyu nooloka ti nootthuneya. Nyuwo munoowerya omwiixuttiha saana mwaana Nuulumo na Yehova, akhala wira wanipacerya munoopweha Nuulumo nlo vamurimani vanyu.Esalimo 40:9.

 1 ANIINYU YOONEKE OKHWEYA OLAVULA NI NYUWO

ELE BIIBILIYA ONIHIMYA AWE: “Khula mutthu ohana wakuvela owiriyana, masi apiseke olavula”. (Yakobo 1:19) Tthiri, nyuwo muniphavela wira aniinyu yooneke okhweya olavula ni nyuwo. Awo yooneke wira nyuwo muri oolikaneene wira mwaawiriyane okathi aniphavela aya olavula ni nyuwo. Nto wira anamwane yooneke okhweya olavula etthu, makhalelo eetthoko akhaleke oomaaleleya. (Yakobo 3:18) Akhala wira awo anoona wira nyuwo munrowa onanariwa wala waapwapwela, khanrowa otaphuwaka okathi woolavula ni nyuwo. Nto mpixeke murima ni mwaaleeleke wira munnaaphenta.Matheyo 3:17; 1 aKorinto 8:1.

ELE EKHANLE ANYU OOPAKA:

  • Mukhaleke oolikaneene okathi aniinyu aniphavela aya olavula ni nyuwo

  • Nvaaneleke ni aniinyu moohihiyererya, ohiya paahi okathi anikhalana aya mixankiho

2 MMANANIHE WIIWEXEXA ELE ENIPHAVELA AYA OHIMYA

ELE BIIBILIYA ONIHIMYA AWE: “Waphavela ankhili onniphwanyiha oreriwa”. (Miruku 19:8) Ikwaha sikina, wira mwiiwexexe miyuupuwelo sekeekhai sa aniinyu, muhaana osuwela ele eniwiiriha olavula masu awo. Amiravo annipaka wala olavula itthu sahaaphavela aya. “Onakhula ahinatthi wiwa, muloló”. (Miruku 18:13) Muhaakuveke onanariwa.Miruku 19:11.

ELE EKHANLE ANYU OOPAKA:

  • Muhimukwaseke masu mwaninyu wala onanariwa mootepana, hata olavulaka itthu sihinoosivelani

  • Mmananihe wuupuwelela ele yaari ya faita wa nyuwo okathi mwaarina anyu iyaakha ntoko sa mwaninyu

 3 MWAALAKEKE ANIINYU MOWIIWANANA

ELE BIIBILIYA ONIHIMYA AWE: “Mwan’aka, nwiriyane molumo òlaka àtith’inyu: muhithanyeké miruku sinvahiwanyu n’amam’inyu”. (Miruku 1:8) Nyuwo anamuyari, Yehova ohoovahani okhulupale wowaalamulela anamwane. Nto muhaana owiixuttiha anamwane wira yoottittimihekeni ni owiiwelelani. (aÉfeso 6:1-3) Anamwane annisuwela akhala wira anamuyari ‘khaniiwanana vomalela ni mupuwelo mmosaru’. (1 aKorinto 1:10) Akhala wira khamuneemya ele enihimya awe ole othelanne anyu, muhooniherye eyo ohoolo wa aniinyu, maana eyo pooti owiiriha ohoottittimihani.

ELE EKHANLE ANYU OOPAKA:

  • Nvaanele ni mwiiwanane ni ole othelanne anyu wa moota wowaalaka anamwane

  • Akhala wira nyuwo nuule othelanne anyu mookhalana moonelo woovirikana wa moota wowiixuttiha anamwane, mmananihe wiiwexexa moonelo wa ole othelanne anyu

 4 MUMPAKE PALANO

ELE BIIBILIYA ONIHIMYA AWE: ‘Mmwixuttihe mmiravo ephiro onrowa awe wettela’. (Miruku 22:6, BE) Owiixuttiha anamwane saana khoniiraneya mekhaya. Nyuwo muhaana okhalana palano oowiixuttiha anamwane, ohela muhina moota wowaalaka. (Esalimo 127:4; Miruku 29:17) Omulaka mwaana khontaphulela onvaha ehukhumu paahi, masi onitaphulela omukhaliherya wira aiwexexe mathowa aya apakiwe aya malamulo vatthokoni. (Miruku 28:7) Nave, muwiixuttihe ophenta Nuulumo na Yehova ni osuwela malakiheryo aya. (Esalimo 1:2) Eyo enimwaakhaliherya okhalana yowuupuxerya ya murima yooloka.aHéberi 5:14.

ELE EKHANLE ANYU OOPAKA:

  • Muttittimiherye wira aniinyu annimoona Muluku ntoko Mutthu eekeekhai akhanle aya oomuroromela

  • Mwaakhaliherye wira yiixutte moota woosuwela ni osyaka sowoopiha sa orupihana woohiloka, ntoko iye siniphwanyaneya orweela mwa Internet ni redes sociais. Mwaakhaliherye moota wowaasyaka ale aniphavelaka waarupiha anamwane

‘Mmwixuttihe mmiravo ephiro onrowa awe wettela’