Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Etthoko Anyu Enoowerya Okhala Yoohakalala

 MPANTTA 3

Moota Woophuka Mixankiho

Moota Woophuka Mixankiho

“Mukhaleleke nthiti ophentana, okhala wira ophentana onnikhunela itampi, sinakhalaru sinjene”.1 Pedru 4:8

Vaavo nyuwo ni ole othelanne anyu munipacerya anyu okhala vamosa, sinookhumelela mixankiho. Iyo pooti okhumelela mwaha wa moota khuta mutthu onuupuwela awe, ni moota ohuuwale awe. Aahiiso, mixankiho pooti okhuma opuro mukina wala mootutuxerya.

Nto mutthu pooti ophavela ohiphuka mixankiho, masi Biibiliya onnitumererya wira niphukeke mixankiho sahu. (Matheyo 5:23, 24) Malakiheryo a Biibiliya anoowerya wookhaliheryani ophuka mixankiho sa ekasamento anyu.

 1 NVAANELE VOOHIMYA SA MUXANKIHO OWO

ELE BIIBILIYA ONIHIMYA AWE: ‘Wokhala okathi wolavula’. (Musuweli 3:1, 7) Nviriheke okathi mulavulaka sa muxankiho owo. Moohivitha etthu mmuleeleke ole othelanne anyu moota sinuupuwela anyu ni ele munuupuwela anyu mmwaha owo. Okathi wotheene ‘mulavuleke ekhweli’. (aÉfeso 4:25) Hata ekhumelaka etthu eniwiirihani onanariwa, musyake onyakulihana wala owana. Waakhula woomaaleleya pooti okhaliherya wira ovaanela okhumele saana ohiya onyakulihana.Miruku 15:4; 26:20.

Hata muheemyaka mwaha owo, mulavuleke mooreerela ni muhiliyaleke wooniherya ophenta ni nttittimiho. (aKolosi 4:6) Mmananihe ophuka muxankiho owo moohipisa, ni muhihiye ovaanela ni ole othelanne anyu.aÉfeso 4:26.

ELE EKHANLE ANYU OOPAKA:

  • Mwaavye okathi onireerela othokorerya muxankiho owo

  • Waphiya okathi anyu woowiriyana, musyake omukwasa masu mukhwiinyu. Maana onoophiya okathi anyu woolavula

 2 NWIRIYANEKE NI WIIWEXEXA

ELE BIIBILIYA ONIHIMYA AWE: ‘Murerelaneke murima, mulipiheryeke ottittimihana mukina ni mukhw’awe’. (aRoma 12:10) Moota oniwiriyana anyu ti vootepa otthuneya. Mmananihe wiiwexexa moonelo wa ole othelanne anyu ‘mophenta ni mowìyeviha’. (1 Pedru 3:8; Yakobo 1:19) Muhoothererye wira munninwiriyana mukhwiinyu. Vaaweryaneyaka, muhiye itthu sotheene munivara anyu nto munwiriyane saana ole othelanne anyu, wala munvekele akhala wira pooti ovaanela okathi mukina. Akhala wira munnimoona ole othelanne anyu okhala mwaapara anyu ohiya munyokhani, khamunrowa ‘wakuvaka onanariwa’.Musuweli 7:9.

ELE EKHANLE ANYU OOPAKA:

  • Munwiriyaneke ole othelanne anyu ni muupuwelo wooloka, hata akhala wira ele enilavula awe khenoosivelani

  • Mwiiwexexeke ele eniphavela awe ohimya ole othelanne anyu. Nweheke moota sinithoonyasa awe ni moota sinilavula awe

3 MPAKE ELE MWIIWANANNE ANYU

ELE BIIBILIYA ONIHIMYA AWE: “Muteko ti muteko onnimurerela mutthu: okakaruwa onkumiherya osikhini pahi”. (Miruku 14:23) Wiiwanana moota woopaka etthu paahi khoniphiyerya. Muhaana opaka ele mwiiwananne anyu. Eyo enivekela wiimananiha vanceene, masi opaka eyo onnikumiherya mureerelo. (Miruku 10:4) Akhala wira munoovara muteko mowiiwanana, munoophwanya “oreriwa” mwaha wa wiimananiha wanyu.Musuweli 4:9.

ELE EKHANLE ANYU OOPAKA:

  • Muthanle itthu soovareleya muteko munrowa anyu opaka wira mphuke muxankiho anyu

  • Okathi mukina, mutokoseke orowa vanyu vahoolo