Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mwiixutte Myaha sa Biibiliya

 YOOSOMA 56

Yosiya Aaniphenta Malamulo a Muluku

Yosiya Aaniphenta Malamulo a Muluku

Yosiya aarina paahi iyaakha 8 vaavo aakhanle awe mwene. Mahiku ale, atthu yaanipaka maxitta ni yaanikokhorela ilatarato. Okathi Yosiya aarina awe iyaakha 16, aahimananiha wiixutta moota woomukokhorela Yehova mwa enamuna yooloka. Orina ene iyaakha 20, owo aahipwexakasa ilatarato ni altari elapo awe yotheene. Okathi aarina awe iyaakha 26, Yosiya aahipaka mareheryo wira elokiheriwe etemplo ya Yehova.

Hilikiya yoowo aari muulupale a anamukuttho, aahiphwanya mutemplo eroolu ya Malamulo a Yehova. Woonasa wene eyo yaari eroolu yaalempwale ni Moise. Xafani, yoowo aari mulipa-oolepa a mwene, aahimuroihela eroolu ele Yosiya ni aahipacerya osoma moowiiwanyeya. Nuumala Yosiya wiiwa moolumo ale, aahoona wira atthu yaahihiya omwiiwelela Yehova mwa iyaakha sinceene. Mwene Yosiya aahimuleela Hilikhiya wira: ‘Yehova oonanariwa vanceene ni hiyo. Murowe mwamulavulihe. Yehova onoonileela ele nikhanle ahu oopaka’. Yehova aahimuruma profeta mwaamuthiyana aitthaniwa Hulda omuleela mwene wira: ‘Tthiri, atthu a oYuda aakihiya. Awo anoohukhummwa, masi khanirowa ohukhummwa Yosiya oryeene mwene, okhala wira owo ohiiyeviha’.

Nuumala Yosiya wiiwa ihapari iyo, aahirowa otemplo ni aahaathukumanya atthu otheene oYuda. Moottharelana aahisoma Malamulo a Yehova moowiiwanyeya ohoolo waya. Yosiya ni atthu otheene yaahileiherya omwiiwelelaka Yehova ni murima aya wotheene.

 Okathi ole, atthu a oYuda yiira ehiyale ene mwa iyaakha sinceene omwiira Paasikha. Masi, Yosiya asomakaru Malamulo, aahiweha wira Paasikha aahaana wiiriwa khula eyaakha. Nto aahaaleela atthu otheene wira: ‘Otheene ahu nihaana omwiira Paasikha a Yehova’. Nuumala-vo, Yosiya aahipaka mareheryo wira sivahiwe mikuttho sinceene ni ekhale alipa-oowiipa mutemplo. Moottharelana, atthu otheene yaahimwiira Paasikha nuumala-vo yaahipaka Efesta ya Iphaawu soohiheliwa miropo mpakha mahiku 7. Okhuma mahiku a profeta Samuweli, khaatonko wiiriwa Paasikha ntoko ole. Tthiri Yosiya aanisiiveliwa ni Malamulo a Muluku. Niireke vannoosivelani wiixutta nuulumo na Yehova?

“Masu anyu ti muthuko onikettiha: seiyo sinnimwalela ephiro enviraka”.​—Esalimo 119:105

MWIIXUTTE SIKINA

MUWIIXUTTIHE ANIINYU

Yosiya Eetta ni Apatthani Ooloka

Biibiliya onnihimya wira, mmiravo Yosiya aahoona ovila opaka itthu sooloka. Musuwele moota apatthani awe yaamukhalihenrye aya.