Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mwiixutte Myaha sa Biibiliya

 YOOSOMA 55

Nlaikha na Yehova Naahimwaakiha Ezekiya

Nlaikha na Yehova Naahimwaakiha Ezekiya

Mwene a wAsiria aahikuxa mittetthe sotheene sa mahimo muloko a omwene wa Isarayeli. Vano Senakeribi mwene a wAsiria aaphavela okuxa mahimo makina manli a omwene wa oYuda. Owo aahipacerya okuxa emosa-emosa ipooma iye sa oYuda. Masi epooma aaphavelexa awe yaari ya oYerusalemu. Senakeribi khaasuwela wira Yehova aanaakiherya epooma ele.

Ezekiya, mwene a oYuda, aahimuliva Senakeribi musurukhu munceene wira ahituphele epooma ele. Nnaamwi, Senakeribi aakhenle musurukhu ole, owo aahivikaniha waaruma anakhotto awe ootupa wira yatuphele epooma ya oYerusalemu. Atthu a epooma ele yaahoova, mwaha woowi anakhotto a wAsiria yaanaattamela. Ezekiya aahaaleela atthu awe wira: ‘Muhoove. Ekeekhai wira anakhotto a wAsiria tootupa, masi Yehova onooniiriha okhala ootupa waavikana awosa’.

Senakeribi aahimuruma murumeyi awe muulupale, Rabsake, orowa oYerusalemu wira awoopopihe atthu. Rabsake aaheemela vate va epooma ele ni aahikhuwela ohimyaka so: ‘Yehova khonookhaliheryani. Muhihiye mootothiwaka ni Ezekiya. Khuuvo muluku oniwerya owoopolani mmatatani mwahu’.

Ezekiya aahimukoha Yehova etthu yoopaka. Yehova aakhunle so: ‘Muhoove mwaha wa itthu sihimyalyawe Rabsake. Senakeribi khonimutuphela Yerusalemu’. Nuumala-vo Ezekiya aahaakhela epaphelo yaakhuma wa Senakeribi. Eyo yaahimya so: ‘Mwaataane ni miyo. Yehova khoniwerya owoopolani’. Ezekiya aahinvekela Yehova ohimyaka so: ‘Xontte Yehova, munoopole. Siiso atthu otheene anoosuwela wira nyuwo paahi mwa Muluku eekeekhai’. Yehova aahimwaakhula so: ‘Senakeribi mwene a wAsiria khonikela oYerusalemu. Miyo kinimwaakiha epooma aka!’

Senakeribi aaroromela wira anwerya omuxintta Yerusalemu. Masi ohiyu omosa, nlaikha na Yehova  naahirowa opuro yaamanke aya anakhotto a wAsiria, vate va epooma ya oYerusalemu. Nlaikha nlo naahiwiiva anakhotto 185.000. Mwene a wAsiria aahipweteiwa anakhotto awe ootupa. Owo khaarina yoothanla ekina, nto aahitthikela elapo awe ooxinttiwa ene. Yehova aahimukhapelela Ezekiya ni Yerusalemu, sintoko aaleihenrye awe. Niireke vaakhanle wira okathi ole mwaari oYerusalemu, mwammuroromela Yehova?

“Malaikha a Muluku annasuka ale animurumela, anniwàkiherya sotakhala sothene”.​—Esalimo 34:8

MWIIXUTTE SIKINA

MOVIES

Khoo Yehova, ‘Kinoororomelani Nyuwo’

Exeeni eniixutta anyu ni ntakiheryo na Ezekiya voohimya sa omuroromela Yehova Muluku moomalela?