Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mwiixutte Myaha sa Biibiliya

 YOOSOMA 30

Rahabi Aahiwiipithiha Anamahottela

Rahabi Aahiwiipithiha Anamahottela

Okathi anamahottela a wIsarayeli yaaronwe aya epooma ya oYerikho, yaamanke owannyawe muthiyana aitthaniwa Rahabi. Nuumala mwene a oYerikho wiiwa, owo aahaaruma anakhotto orowa owannyawe Rahabi. Rahabi aahiwiipithiha anamahottela ale vataratoni ni aahaaleela anakhotto ale wira yaatthimakeleke epantte ekina. Owo aahaaleela anamahottela ale wira: ‘Kinimookhaliheryani maana koosuwela wira Yehova ori ni nyuwo ni wira ohoovahani elapo ela. Vano mukilaphele wira munoowoopola amusi aka’.

Anamahottela ale yaahimuleela Rahabi wira: ‘Hiyo ninnilapha wira khuuvo mutthu onrowa okhala mpaani mwanyu onrowa wiiviwa, nto mutthukwelele mukhoi ola wooxeerya vaxanelani va empa ela, wira amusi anyu yoopoliwe’.

Rahabi aahaakhaliherya anamahottela ale okhuruwa vaxanelani arumeelaka mukhoi. Awo yaahirowa omwaako khumaliha mahiku 3, nuumala-vo yaahitthikela wa Yoxuwa. AIsarayeli yaahilapuwa muro  Yordani ni yaahiilokiherya wira ekuxe elapo ele. Yerikho yaari epooma yoopacerya yaaxinttale aya. Yehova aahaaleela aIsarayeli wira erukureryeke epooma ele ekwaha emosa khula nihiku, mpakha ovira mahiku 7. Vano nihiku nookiserya, yaahaana orukurerya ikwaha 7. Nto alipa a mukuttho yaahoopa malope aya, nave anakhotto yaahikhuwela vanceene. Moohipisa ixiri sa epooma saahimora! Masi empa ya Rahabi, yeeyo yaattamenle exiri sa epooma khiyaamonre. Rahabi ni amusi awe yaahoopowa okhala wira yaahimuroromela Yehova.

“Siso-tho vahimwiranela Rahabi . . . Owo khakhalihiwe naxariya mwaha wa sowira sawe? Tthiri ahavaha opuro aYuda òwehaweha, khwakhaliherya otthyawela ephiro ekina”.​—Yakobo 2:25