Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mwiixutte Myaha sa Biibiliya

 YOOSOMA 36

Natiri a Yefte

Natiri a Yefte

AIsarayeli yaahihiya-tho omurumeela Yehova nto khupacerya waakokhorela amuluku eethiru. Vaavo aIsarayeli yaatupheliwa aya ni atthu a wAmoni, amuluku ale eethiru khiyaapaka etthu wira yaakhaliherye. Mwa iyaakha sinceene, aIsarayeli yaahihaaxiwa. Nuumala-vo, awo yaahimuleela Yehova wira: ‘Noottheka! Xontte munoopole’. AIsarayeli yaahipwexa ilatarato saya sotheene ni yaahitthikela omukokhorela Yehova. Nto Yehova khaaphavela waaweha avikanihaka ohaawa.

Nakhotto mmosa aitthaniwa Yefte, aahithanliwa wira okhale muhooleli a aIsarayeli okathi yaarowa aya owana ni atthu a wAmoni. Owo aahimuleela Yehova wira: ‘Mwanikhaliherya oxintta ekhotto ela, miyo kinnimmana natiri wira okathi kintthikela aka owaani,  kinimoovahani mutthu yoole onirowa opacerya okhuma mpaani mwaka arwaaka okumana ni miyo’. Yehova aahiiwa nivekelo na Yefte ni aahimukhaliherya waaxintta awanani awe.

Okathi Yefte aatthikenle awe owaani, mutthu aapacenrye omutthimakela aari mwanawe mwaamuthiyana, mmoseene. Owo aaniina ni woopa nlapa. Exeeni Yefte aapanke awe? Owo aahimuupuwela natiri awe ni aahihimya wira: ‘Kootakhaliwa, mwanaka! Nyuwo moohonona murima aka. Miyo kommanela natiri Yehova. Wira kimmaliherye natiri owo, kihaana wooroihani wira mwarumeeleke otabernaakulu ya oSilo’. Masi mwanawe ole aahaakhula wira: ‘Paapa, akhala wira mommanela natiri Yehova, muhaana opaka etthu eleihenrye anyu. Mukivahe myeeri miili paahi wira kirowe kahakalale omwaako vamosa ni axaapara aka. Nuumala-vo kiroweke otabernaakulu’. Mwaana a Yefte aahirumeela otabernaakulu okumi awe wotheene. Khula eyaakha axaapara awe yaanirowa omuxukurya oSilo.

Ole “onimphentexa mwan’awe mwamulopwana, walá mwan’awe mwamuthiyana ovikana okiphenta miyo, khamphwanela okhala awaka”.​—Matheyo 10:37

MWIIXUTTE SIKINA

MUWIIXUTTIHE ANIINYU

Mwaana Aamuhakalalinhe Paapawe Vamosa ni Yehova

Yooleiherya xeeni mwaana mwaamuthiyana a Yefte aiwelenle awe? Ninrowa omutakiha sai?