Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mwiixutte Myaha sa Biibiliya

 YOOSOMA 96

Yesu Aahimuthanla Saulo

Yesu Aahimuthanla Saulo

Saulo aari muRoma. Masi aayariwe elapo ya oTarso. Owo aari nFarisi aasuwela saana Malamulo a aYuda, ni aanaanyokha maKristau. Saulo owo aanaakumiha alopwana ni athiyana maKristau mmawannyeya ni aanaatthukwela mukhatteya. Nave-tho Saulo aaheemela onaweha okathi atakhali yanvonyakasa aya maluku mwiixutti Siteefano mpakha omwiiva.

Masi Saulo khaaphiyeriwa ni waavara maKristau oYerusalemu paahi. Owo aahinvekela muulupale a anamukuttho wira omweemiherye orowa epooma ya oDamaasiko, aamala-malihe maKristau. Aattamelaka epooma eyo, Saulo aahoona waarya wuulupale, nto owo aahimorela vathi. Moottharelana, aahiiwa nsu naahimya so: ‘Saulo, munikilupatthelani?’ Saulo aahikoha wira: ‘Nyuwo ti pani?’ Nsu nlo naahaakhula so: ‘Miyo ka Yesu. Vano murowe oDamaasiko, munoosuwela etthu ekhanle anyu oopaka’. Naananoru, Saulo aahipacerya ohoona, nto aahivareliwa ntata wira ophiye oDamaasiko.

ODamaasiko, aahikhala mulopwana oowaamini aitthaniwa Ananiya. Moolohani aahileeliwa ni Yesu wira: ‘Murowe ephiro eniihaniwa Yowookowa, owannyawe Yuda, mwamphavele Saulo’. Ananiya aahihimya wira: ‘Pwiya, miyo koosuwela itthu sotheene mulopwana ola opanke awe! Owo onnaatthukwela awiixutti anyu mukhatteya!’ Masi Yesu aahimuleela wira: ‘Rowani, mwakumane nuuwo. Miyo koomuthanla Saulo wira aalaleerye ihapari sooreera atthu a maloko manceene’.

Vano Ananiya aahimphwanya Saulo ni aahihimya so: ‘Saulo, munna aka, Yesu ookiruma orwa otthukula maitho anyu’. Naananoru Saulo aahitthikela woona. Owo aahiixutta voohimya sa Yesu ni khukhala mwiixutti awe. Nuumala obatiziwa khukhala muKristau, Saulo aahipacerya olaleerya musinagoga, vamosa ni awiixutti akina. AYuda yaahitikinihiwa vanceene vaavo yanwenhe aya Saulo awiixuttihaka atthu ihapari sa Yesu. Awosa yaahihimya wira: ‘Ola khahiyo mulopwana yoole aalupattha awiixutti a Yesu?’

 Mwa iyaakha 3, Saulo aahaalaleerya atthu a oDamaasiko. AYuda yaanimunyokha Saulo ni yaahimpaka palano wira amwiive. Masi okathi anna yaasuwenle aya sa palano owo, yaahimukhaliherya otthyawa. Awo yaahimuhela muttankani, amukuruxela vathi va exiri ya epooma ele.

Okathi Saulo aaphiyale awe oYerusalemu, aaniphavela othukumana ni axinna a weiwo. Masi awo yaanimoova. Nto mwiixutti mmosa aihaniwa Baarnaba aahimukuxa Saulo khumurowana wa arummwa ni aahimeerya wira owo aahituruka mweettelo awe. Saulo aahipacerya mwa nthiti olaleya ihapari sooreera vamosa ni muloko wa oYerusalemu. Muhoolo mwaya aahisuweliwa okhala Paulo.

“Yesu Kristu orwiye mulaponi-mu wira awòpole alipa-òttheka, wa yawo ti miyo kikhanle òpajerya”.​—1 Timótheyo 1:15