Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mwiixutte Myaha sa Biibiliya

 YOOSOMA 97

Kornelio Aahaakhela Munepa Wootteela

Kornelio Aahaakhela Munepa Wootteela

OKesareya aahikhala mukhulupale a anakhotto a oRoma yoowo aitthaniwa Kornelio. Nnaamwi ahaakhanle muYuda, aanittittimihiwa vanceene ni aYuda. Owo aanaakhaliherya atthu oohaawa. Kornelio aanimwaamini Yehova ni aanimulompa mahiku otheene. Nihiku nimosa, naahimukhumelela nlaikha na Yehova khumuleela wira: ‘Muluku onniiwa mavekelo anyu. Vano mwaarume alopwana erowe oYope, opuro oryaawe Pedru, ni yanvekele orwe owannyu’. Okathi ene yoowo, Kornelio aahaaruma alopwana araru orowa oYope, epantte enikhuma epheyo, ikiloomo 50 erakamelo aya.

Oryeene oYope, Pedru aahooniheriwa etthu moolohani. Owo aahiweha inama seiyo aYuda yaheemereriwa aya okhuura, nto aahiiwa nsu naahimya wira okhuure. Pedru aahikhootta oriki: ‘Masi miyo nkinaakhure enama ya mwiikho’. Nto nsu nno naahihimya so: ‘Muhiitthaneke inama iya okhala sa mwiikho. Muluku ooreeriha’. Pedru aahileeliwa-tho wira: ‘Aakhala alopwana araru aari vamukhora vanyu. Murowe mwakumane naawo’. Pedru aahirowa vamukhora nto aahaakoha alopwana awo etthu yaarwenle aya opuro ole. Awosa yaahaakhula wira: ‘Nirummwe ni Kornelio, mukhulupale a anakhotto a oRoma. Muhaana orowa owannyawe oKesareya’. Pedru  aahiwaakhela alopwana ale nto yaahirupa opuro yoole. Mmeeloni mwaya, Pedru aahivenya naawo orowaka oKesareya, vamosa ni anna akina yaakhuma oYope.

Okathi Kornelio aamoonale awe Pedru, aahuurama ohoolo wawe ophavelaka omukokhorela. Masi Pedru aahihimya so: ‘Nvenye! Miyo ka mutthu ntoko nyuwo! Muluku ookileela wira kirwe owannyu, nnaamwi aYuda ahiphiyaka vatthokoni va amalapo. Xontte vano mukileele etthu ekiihanenle anyu’.

Kornelio aahimuleela Pedru wira: ‘Masuri okathi kaamulompa aka Muluku, naahikikhumelela nlaikha, nikiruma owiitthanani. Xontte muniixuttihe moolumo a Yehova’. Pedru aahimmye so: ‘Vano koosuwela wira Muluku khanimuthanla mutthu. Owo onnimweemererya khula mutthu oniphavela omukokhorela’. Pedru aahiwiixuttiha itthu sinceene voohimya sa Yesu. Nto Kornelio ni atthu otheene yaari nuuwo, yaahaakhela munepa wootteela ni otheene aya yaahibatiziwa.

“Muluku onnaphenta atthu a nloko ti nloko, yale animuttittimiha, enettela exariya”.​—Miteko 10:35