Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mwiixutte Myaha sa Biibiliya

 YOOSOMA 85

Yesu Aahaapenuxa Aretta Nihiku na Saabadu

Yesu Aahaapenuxa Aretta Nihiku na Saabadu

AFarisi yaanimunyokha Yesu nto yaaniphavela omphwanyana nthowa wira anvare. Awo yaahimya wira khiweemiheriwa waapenuxa atthu nihiku na eSaabadu. Esaabadu emosa, Yesu aahimphwanya mulopwana ahoona. Owo aahaahimeerya awiixutti awe wira: ‘Nwehe owerya wa Muluku moota onrowa aya omukhaliherya mulopwana ola’. Yesu aaheetheya etthaya ni isene sawe, khusirikela maitho a mulopwana ole. Yesu aahimuleela wira: ‘Murowe mwarapihe maitho anyu vatthiyani ya oSilowé’. Mulopwana owo aahipaka eyo, nto aahipacerya woona.

Atthu yaahixanka. Awo yaahimya wira: ‘Ola khahiyo mulopwana yoole aakilaathi khiyaveka esimola, wala mutthu mukina onlikanana awe?’ Nto owo aahaakhula wira: ‘Ti yoomi kaayariwe kihoonaka!’ Atthu yaanimukoha wira: ‘Maitho anyu atthukunwe sai?’ Okathi aahimmye awe etthu yaamwiiranenle, atthu ale yaahimuroiha wa aFarisi.

Mulopwana ole aahaaleela aFarisi wira: ‘Yesu aaheetheya etthaya, kuhela mmaithoni mwaka ni khukihimeerya wira kirowe kakuse. Kaahipaka eyo ni kaahipacerya woona’. AFarisi yaahimmye so: ‘Okhala wira Yesu oohoovonihani esaabadu, weeso owerya wawe khonikhuma wa Muluku’. Masi akina yaanihimya-tho so: ‘Vaakhanle wira owerya wawe khonikhuma wa Muluku, aarowa owerya sai waapenuxa atthu ala ootheene?’

AFarisi yaahiwiitthana anamuyari awe mulopwana ole ni yaahaakoha so: ‘Mwaninyu oniwerya sai woona vano?’ Anamuyari awe yaanoova maana aFarisi yaahimya wira ale  yaamwaamini Yesu yaahaana woomoliwa musinagoga. Nto yaahaakhula wira: ‘Hiyo khaninsuwela. Mmukoheke mwaneene ola’. AFarisi yaahimukoha-tho makoho manceene mpakha mulopwana ole ohimya wira: ‘Kihoohimeeryani sotheene kinisuwela aka. Xeeni othipelelaka okikoha?’ AFarisi yaahinanariwa vanceene, ni yaahimoomolela vate.

Yesu aahimphavelasa mulopwana ole, ni aahimukoha wira: ‘Nyuwo munnimwaamini Mesiya?’ Mulopwana owo aahaakhula wira: ‘Kaamusuwela kammwaamini’. Yesu aahihimya so: ‘Miyo ka Mesiya’. Niireke ele Yesu aapanke awe khahiyo ooniherya oreera murima? Yesu khahiyo paahi anvoninhe mulopwana ole, masi-tho aahimukhaliherya okhalana waamini.

“Nyuwo movonya, mana khamunsuwela solempwa sa Muluku, nnákhala owerya wawe”.​—Matheyo 22:29