Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mwiixutte Myaha sa Biibiliya

 YOOSOMA 68

Elizabeti Aahikhalana Mwaana

Elizabeti Aahikhalana Mwaana

Sivinre ene iyaakha 400 nuumala otthikela otekiwa ixiri sa oYerusalemu, namukuttho mmosa aitthaniwa Zakariya ni mwaarawe, Elizabeti, yaahimaka waattamela epooma ele. Saahivira iyaakha sinceene Zakariya omuthenle ene Elizabeti, masi awosa khiyaarina anamwane. Nihiku nimosa, vaavo Zakariya aapaha awe erupani mpaani mwa Muluku, naahimukhumelela nlaikha niitthaniwa Gabriyeli. Zakariya aahoova vanceene, masi Gabriyeli aahimuhimeerya so: ‘Muhoove. Kihaana ihapari sooreera sinikhuma wa Yehova. Mwaarinyu, Elizabeti onookhalana mwaana mwaamulopwana, nto nsina nawe onrowa okhala Yohani. Yehova oomuthanlela Yohani muteko wa vameekhaaya’. Zakariya aahimukoha wira: ‘Kinrowa ororomela sai etthu ela? Miyo ni mwaaraka nihuuluvala’. Gabriyeli aahimwaakhula so: ‘Kirummwale ni Muluku wira kooleeleni ihapari iya. Masi okhala nyuwo khamunkikupali, munookhala muhilavulaka mpakha oyariwa mwaana owo’.

Zakariya aahimaliha iwoora sinceene ori ene nipuro noowaarya ovikana mahiku makina. Vaavo aakhumenle awe vate, atthu yaamulipelela yaahimananiha osuwela etthu yaamukhumelenle. Zakariya khaawerya olavula. Owo aamuthoonyasa paahi, ohiweryaka olavula. Nto atthu ale yaahikupali wira Zakariya aaleeliwe ihapari saakhuma wa Muluku.

Vaavirale aya mahiku vakhaani, Elizabeti aahirupala ni aahimuyara mwaana mwaamulopwana, sintoko nlaikha naahimmye aya. Apatthani ni anamwaattamanani aya yaahirowa onweha mwaana ole. Awosa yaahitteeliwa murima mwaha wa mwaana ole. Elizabeti aahihimya wira: ‘Mwaana ola nsina nawe Yohani’. Atthu yaahinvaanyiha ehimyaka so: ‘Nnaari, mweemusini mwanyu khaavo oniihaniwa Yohani. Ninvahe nsina na apapawe, Zakariya’. Masi Zakariya aahilepa so: ‘Nsina nawe ti Yohani’. Naananoru Zakariya aahitthikela olavula! Ihapari voohimya sa mwaana ole saahimwareela muttetthe wotheene wa oYudeya, vano atthu yaanikohana wira: ‘Mwaana ola annuwa vale onrowa okhala pani?’

 Zakariya aahisareya munepa wootteela. Aahilavula so: ‘Attottopeliwe Yehova. Maana aahimmanela natiri Abrahamu wira aarowa omuruma moopoli, Mesiya wira onaakihe. Yohani onrowa okhala profeta ni onrowa olokiherya ephiro enrowa awe ovira Mesiya’.

Nave-tho etthu ekina yootikiniha yaahimwiiraneela Maria mmusi awe Elizabeti. Mwaha owo nnoothokorerya muru onittharelana.

“Etthu ila atthu annojela: masi Muluku khivo enojelawe”.​—Matheyo 19:26

MWIIXUTTE SIKINA

MWIIXUTTE MYAHA SA BIIBILIYA

Yohani Aahilokiherya Ephiro

Yohani aahinnuwa khukhala profeta. Owo aahiixuttiha wira Mesiya aahirwa. Atthu yoonenle sai ihapari aalaleya awe?